សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រវាញ គឺជារុក្ខជាតិដែលដុះនៅតាមតំបន់ការពារធម្មជាតិ និងដែលរងការគំរាមកំហែងពីការដកហូត លើសកម្រិតរបស់ប្រជាពលរដ្ឋដែលរស់នៅជុំវិញនោះ ដោយសារវាជារុក្ខជាតិដែលមានតម្រូវការខ្ពស់ ហើយគេក៏អាចប្រើជាគ្រឿងទេសក្នុងការចម្អិនអាហារក៏បាន និងអាចយកទៅធ្វើជាឱសថក៏បាន។
កន្លងមក គេធ្លាប់សាកល្បងដាំដុះរុក្ខជាតិប្រភេទនេះដែរតែមិនបានផល ប៉ុន្តែវាក៏មិនមែនបានន័យថា គេមិនអាចដាំបាននោះដែរ។ ដើម្បីលើកស្ទួយជីវភាពសហគមន៍ ក្រសួងបរិស្ថានបានចាត់តាំងក្រុមការងារក្នុងការបង្ហាត់បង្រៀន ក៏ដូចជាផ្ដល់កូនក្រវាញសម្រាប់សហគមន៍ចំនួនពីរយកទៅដាំដុះ។
សហគមន៍ទាំងពីរនេះ គឺសហគមន៍តំបន់ការពារធម្មជាតិភូមិទំព័រ ស្ថិតនៅក្នុងខេត្តពោធិ៍សាត់ និងសហគមន៍តំបន់ការពារធម្មជាតិអូរជាំ ស្ថិតនៅក្នុងខេត្តបាត់ដំបង។ ការដាំដុះនឹងផងដែរ នឹងត្រូវធ្វើឡើងលើផ្ទៃដីដែលជាកម្មសិទ្ធិរួមរបស់សហគមន៍ និងស្ថិតក្រោមការគ្រប់គ្រងរបស់គណៈកម្មការ សហគមន៍។
គិតចាប់ពីអំឡុងខែមករា ដើមឆ្នាំ២០២៣ រហូតមកដល់ពេលនេះ ការដាំដុះក្រវាញនៅក្នុងសហគមន៍តំបន់ការពារធម្មជាតិភូមិទំព័រ មានការលូតលាស់ល្អ និងអាចចែកចាយបន្តទៀតសម្រាប់ដាំដុះនៅក្នុងសហគមន៍ផងដែរ។
លោក ទេស ថន ប្រធានសហគមន៍តំបន់ការពារធម្មជាតិភូមិទំព័រ បានលើកឡើងថា ក្នុងការបណ្តុះ ២ វគ្គកន្លងមក ពោលគឺចាប់ពីខែមករា ដល់ខែកុម្ភៈ ឆ្នាំ២០២៣ នេះ បានចំនួនកូនក្រវាញសរុប ៦៨០០ កូន ហើយលោកសង្ឃឹមថា តាមរយៈការបណ្តុះកូនក្រវាញនេះ និងការចែកចាយសម្រាប់ការយកទៅដាំនៅថ្ងៃខាងមុខនឹងទទួលលទ្ធផលល្អមិខាន។
ជាមួយគ្នានេះដែរ លោកនឹងជំរុញដល់ប្រជាសហគមន៍ក្នុងការដាំក្រវាញឱ្យកាន់តែច្រើន ដើម្បីបង្កើនចំនួនពូជក្រវាញក្នុងតំបន់សហគមន៍ និងពិសេសជាងនេះ គឺការផ្គត់ផ្គង់អាហារក្រវាញប្រចាំសហគមន៍របស់លោកកាន់តែសម្បូរបែបថែមទៀត។ សម្រាប់សហគមន៍តំបន់ការពារធម្មជាតិអូរជាំវិញ ក៏កំពុងតែដាំដុះកូនក្រវាញដែលផ្ដល់ដោយក្រសួងបរិស្ថាននៅលើផ្ទៃដីចំនួន ៥ហិកតា ហើយមកដល់ពេលនេះគឺក្រវាញមានការលូតលាស់ល្អ។
លោក គីម សុង ប្រធានសហគមន៍តំបន់ការពារធម្មជាតិអូរជាំបានឲ្យដឹងថា លោកមានបំណងចង់ផ្សុំាកូនក្រវាញឲ្យបានកាន់តែច្រើន ដើម្បីអាចមានលទ្ធភាពចែកចាយឲ្យប្រជាជានក្នុងសហគមន៍បានដាំដុះគ្រប់គ្នា។ ជំហានបន្ទាប់ គឺចែកចាយទៅដល់សហគមន៍ផ្សេងៗទៀត នៅទូទាំងប្រទេសតែម្ដង។
គួរបញ្ជាក់ថា ប្រជាពលរដ្ឋនៅមូលដ្ឋាន ជាពិសេសអ្នកដែលរស់នៅក្នុងតំបន់ជួរភ្នំក្រវាញតែងតែចេញទៅប្រមូលផលក្រវាញ នៅតាមជួរភ្នំនៅរដូវភ្លៀងធ្លាក់ ដោយក្នុងរយៈពេល២ ទៅ៣ខែ ពួកគេអាចរកចំណូលប្រមាណចាប់ពី ៣០០ដុល្លារ ទៅ៥០០ដុល្លារ។ ក្នុងនោះ ក៏មានប្រជាពលរដ្ឋដែលអាចរកចំណូលប្រមាណ ១ ០០០ ទៅ ១ ៥០០ដុល្លារពីក្រវាញផងដែរ។ សម្រាប់ដើមក្រវាញខ្ចីមានតម្លៃចាប់ពី ១០ ០០០រៀល ទៅ ១៥ ០០០រៀល រីឯផ្លែក្រវាញមិនទាន់ស្ងួត លក់បាន១គីឡូ ១ម៉ឺនរៀល ខណៈផ្លែក្រវាញក្រៀមមានតម្លៃចាប់ពី៤ ទៅ៥ម៉ឺនរៀល៕
Account
Security
Favourite Content