បរទេស ៖ យុវជនជនជាតិសៀរ៉ាឡេអូន (Sierra Leone) ម្នាក់មានឈ្មោះថា​ Alhaji Siraj Bah កំពុងជាប់ឈ្មោះជាយុវជនឆ្នើមម្នាក់នៅក្នុងសកម្មភាពបែបប្រយុទ្ធប្រឆាំងទៅនឹងបញ្ហាបម្រែបម្រួលអាកាសធាតុក្នុងបរិបទដែលប្រទេសនៅទ្វីបអាហ្វ្រិកមួយនេះកំពុងប្រឈមមុខទៅនឹងគ្រោះហានីភ័យធ្ងន់ធ្ងរដោយសារតែគ្រោះធម្មជាតិ។

សៀរ៉ាឡេអូន ជាប្រទេសស្ថិតនៅភាគខាងលិចនៃទ្វីបអាហ្វ្រិក ហើយក៏ជាប្រទេសដែលបានបាត់បង់ព្រៃឈើដល់ទៅ ៧០ភាគរយនៃព្រៃឈើដែលខ្លួនធ្លាប់មានកាលពីជិត៥ទសវត្សរ៍ ហើយជាលទ្ធផល ប្រទេសនេះបាន និងកំពុងប្រឈមមុខទៅនឹងគ្រោះធម្មជាតិជាច្រើនបូករួមទាំងទឹកជំនន់, ខ្យល់ព្យុះ ជាពិសេស ការរអិលបាក់ដី ដែលបានសម្លាប់ពលរដ្ឋសៀរ៉ាឡាអូនរាប់ពាន់នាក់ជារៀងរាល់ឆ្នាំរួមទាំងក្រុមគ្រួសាររបស់យុវជន Bah កាលពីឆ្នាំ២០១៧ផងដែរ។

ដោយសារភាពទីទ័លក្រធ្វើឲ្យ Bah បង្ខំចិត្តធ្វើដំណើរមករស់នៅទីក្រុង Freetown តាំងតែពីតូចដើម្បីស្វែងរកចំណូលជួយគ្រួសារ ប៉ុន្តែសំណាងអាក្រក់ឪពុកម្តាយ និងក្រុមគ្រួសារដែលចិញ្ចឹមបីបាច់ Bah ក្នុងពេលដែលគាត់រស់នៅក្នុងទីក្រុងត្រូវបានបាត់បង់ជីវិតនៅក្នុងហេតុការណ៍ឆ្នាំ២០១៧នោះ។ ហេតុការណ៍ឆ្នាំនោះបានដក់ជាប់ក្នុងចិត្តរបស់ Bah និងបានជំរុញទឹកចិត្តយុវជនរូបនេះឲ្យចាប់ផ្តើមខិតខំស្វែងរកវិធីនិងស្រាវជ្រាវវិធីសាស្ត្រជាច្រើនដើម្បីអាចទប់ស្កាត់ និងរារាំងគ្រោះធម្មជាតិរអិលបាក់ដីបែបនេះឲ្យបាន។

នៅទីបំផុត កាលពីដើមឆ្នាំ២០២១យុវជន Bah បានបើកអាជីវកម្មថ្មីមួយដែលគាត់ជឿជាក់ថាអាចជួយកាត់បន្ថយគ្រោះរអិលបាក់ដីដែលកើតឡើងដោយសារតែសកម្មភាពរបស់ពលរដ្ឋក្នុងការកាប់បំផ្លាញព្រៃឈើយកធ្វើអុសដុត។ អាជីវកម្មថ្មីនេះគឺជាការកែច្នៃកាក់សំណល់ពីផ្លែដូងដែលមានដូចជាស្រកីដូង និងសំបកដូងទៅផលិតជាធ្យូងអនាម័យ និងអាចប្រើប្រាស់ជំនួសអុសបាន។

Bah ចំណាយពេលជាច្រើនខែក្នុងការសាកល្បង និងទទួលយកភាពបរាជ័យ ប៉ុន្តែការជំរុញ និងលើកទឹកចិត្ត ជាពិសេសការមើលឃើញពីបញ្ហាដែលចាំបាច់សម្រាប់ពលរដ្ឋសៀរ៉ាឡេអូន បច្ចុប្បន្នបានធ្វើឲ្យយុវជនខាងលើនេះខិតខំរហូតរកឃើញបច្ចេកទេសថ្មីដោយជោគជ័យក្នុងការផលិតបានជាធ្យូងអនាម័យមានគុណភាពខ្ពស់មួយប្រភេទចេញពីកាកសំណល់នៃផ្លែដូង។

យ៉ាងណាក៏ដោយ បើទោះជាវាមានតម្លៃថ្លៃជាងធ្យូងធ្វើពីឈើធម្មតាដល់ទៅ៤ដង ប៉ុន្តែធ្យូងអនាម័យរបស់ Bah ក៏អាចប្រើប្រាស់បានយូរជាធ្យូងធម្មតាបានដល់ទៅ៤ដងផងដែរ ហើយមិនប៉ះពាល់ទៅដល់បរិស្ថាន ជាពិសេស គឺអាចជួយកាត់បន្ថយការកាប់បំផ្លាញព្រៃឈើទាំងស្រុងប្រសិនបើគាត់អាចពង្រីកអាជីវកម្មនេះបានទៅទូទាំងប្រទេស។ កាកសំណល់ដែលគាត់ប្រមូលបានដោយមិនមានការចំណាយលុយសូម្បីមួយកាក់ ហើយជារៀងរាល់សប្តាហ៍គាត់អាចប្រមូលបានជាង២តោន និងដាក់ផែនការឲ្យបាន១០តោន។ បច្ចុប្បន្នអាជីវកម្មរបស់ Bah បានប្រើប្រាស់បុគ្គលិកពេញម៉ោងចំនួន១០នាក់ និង៤០នាក់ជាក្រុមការងារក្រៅម៉ោង ហើយអាជីវកម្មផលិតធ្យូងអនាម័យនេះគាត់អាចរកចំណូលបានទៅដល់ពី ៤ ០០០ ទៅ ៤ ៥០០ដុល្លារក្នុងមួយខែ ខណៈដែលធ្យូងអនាម័យរបស់គាត់មានតម្លៃលើទីផ្សារប្រមាណជា៧០សេនក្នុងមួយគីឡូ៕