ម្ទេសប្លោក ជាប្រភេទម្ទេសម្យ៉ាងដែលមានរូបរាងធំជាងម្ទេសហឹរធម្មតា ជាពិសេសគេអាចកែច្នៃវាទៅជាម្ទេសឆ្អើរ ឬម្ទេសក្រៀម ដែលអាចរក្សាទុកបានយូរ និងបន្ថែមឱជារសដល់ម្ហូបអាហារបានយ៉ាងប្រសើរ ខណៈដែលតម្រូវការទីផ្សារក៏មានច្រើនផងដែរ។ អាស្រ័យដោយមើលឃើញពីតម្រូវបែបនេះ ទើបធ្វើឱ្យបងប្អូនប្រជាកសិករជាច្រើន ជាពិសេសអ្នករស់នៅក្នុងស្រុកជលគិរី ខេត្តកំពង់ឆ្នាំង បាននាំគ្នាដាំដំណាំម្ទេសប្លោកនេះ ត្បិតថាវាអាចប្រមូលផលបានច្រើន ហើយតម្លៃដែលទទួលបានពីការលក់ក៏មានភាពសមរម្យ។

 អ្នកស្រី យូ រ៉ាវ៉ាន់ ជាម្ចាស់ចំការម្ទេសប្លោកមួយរូបនៅស្រុកជលគីរី ខេត្តកំពង់ឆ្នាំង បានមានប្រសាសន៍ថា ៖

«យើងដាំម្ទេសប្លោកនេះ ២៥ឆ្នាំមកហើយ ដោយសារវាជាមុខរបរប្រចាំគ្រួសាររហូតមក ហើយតម្លៃម្ទេសស្រស់អាចលក់បាន ១០០០-១៣០០រៀលក្នុងមួយគីឡូក្រាម ខណៈដែលតម្លៃម្ទេសក្រៀមអាចលក់បានចាប់ពី ១៣ ០០០-១៤​ ០០០រៀលក្នុងមួយគីឡូក្រាម ប៉ុន្តែបើទុកដល់រដូវវស្សាអាចលក់បានរហូតដល់ ២៥០០០-៣០០០០រៀលក្នុងមួយគីឡូក្រាមក៏មាន»។

អ្នកស្រីបន្តថា៖

«ដំណាំនេះមិនពិបាកដាំប៉ុន្មានទេ តែក៏ត្រូវការថែទាំដែរទើបបានផលល្អ ដូចជាការស្រោចទឹកឱ្យបានគ្រប់គ្រាន់ ដាក់ជីបំប៉ន និងបាញ់ថ្នាំការពារសត្វល្អិត។ ក្រៅពីនេះ គេត្រូវការសាបកូនម្ទេសទើបដាំបានល្អ ដោយគេត្រូវការពេលប្រមាណ ២ខែកន្លះទើបអាចប្រមូលផលបាន ហើយនៅពេលដើមដៃយើងអាចប្រមូលផលបានប្រមាណ ១តោនកន្លះ ក្នុងមួយសប្ដាហ៍ និងចុះបន្តិចម្ដងៗរហូតដល់អស់ផ្លែត្រឹមរយៈពេលប្រមាណ ៣ខែ»។

ម្ចាស់ចំការខាងលើរៀបរាប់ទៀតថា នៅក្នុងស្រុកជល់គីរី ខេត្តកំពង់ឆ្នាំងមានអ្នកដាំ និងកែច្នៃច្រើន ហើយអ្នកស្រីក៏មិនខុសពីគេដែរ ដោយនៅពេលម្ទេសបានផលគឺយកលក់ស្រស់ខ្លះ និងលក់ជាប្រភេទម្ទេសឆ្អើរ ឬម្ទេសខ្លះ ដើម្បីបានដើមទុនទុកបង្វិលសម្រាប់ដាំដំណាំផ្សេងទៀត តែបើអ្នកមានដើមទុនគ្រប់គ្រាន់ គេអាចទុកម្ទេសឆ្អើរលក់នៅរដូវវស្សាគឺលក់បានកាន់តែថ្លៃ។

ជាចុងក្រោយ អ្នកស្រី យូ រ៉ាវ៉ាន់ បានចូលរួមជាមតិដែរថា សម្រាប់កសិករដទៃទៀត បើចង់ដាំដំណាំម្ទេសប្លោក គឺអាចដាំបាន ដោយសារម្ទេសប្លោកមានទីផ្សារល្អ ហើយបើកែច្នៃជាម្ទេសក្រៀមក៏រឹតតែលក់បានថ្លៃ ប៉ុន្តែសម្រាប់អ្នកធ្វើត្រូវតស៊ូបន្តិចទាំងការដាំ ទាំងការផលិតម្ទេសឆ្អើរ ព្រោះវាអាចប្រឈមនឹងអាការក្រហាយដៃ និងភ្នែក ។ អ្វីដែលសំខាន់ កសិករមិនគួរដាំម្ទេសប្លោកតែមួយមុខនោះទេ ប៉ុន្តែគួរដាំដំណាំម្ទេសពូជផ្សេងទៀត ដូចជាប្រភេទម្ទេសស, ម្ទេសភូមា ជាដើម ព្រោះនៅពេលណាម្ទេសមួយមុខធ្លាក់ថ្លៃ គេអាចលក់បានម្ទេសប្រភេទផ្សេងមួយទៀត ដើម្បីអាចទប់ទល់នឹងស្ថានភាពប្រឈមនៅលើទីផ្សារ៕