សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ អាម៉េរិក និងកោះតៃវ៉ាន់ បានចុះហត្ថលេខាលើកិច្ចព្រមព្រៀងពាណិជ្ជកម្មរួមគ្នា ដោយអាម៉េរិកយល់ព្រមទម្លាក់ពន្ធលើការនាំចូលពីកោះតៃវ៉ាន់ពីអត្រា ២០% មកនៅត្រឹម ១៥% ខណៈដែលដែលកោះតៃវ៉ាន់ បានដោះដូរជាមួយនឹងការដកពន្ធនាំចូលពីអាម៉េរិកស្ទើរតែ ៩៩% ជាពិសេស លើទំនិញឧស្សាហកម្ម និងកសិកម្ម ក៏ដូចជាផ្តល់សិទ្ធិអនុគ្រោះឲ្យមហាអំណាចមួយនេះចូលមកក្នុងទីផ្សាររបស់ខ្លួន។ នេះបើយោងតាមសេចក្ដីរាយការណ៍ពី CNBC ។
ក្រៅពីការដោះដូរខាងលើនេះ កោះតៃវ៉ាន់ ក៏មានគម្រោងទិញទំនិញអាម៉េរិករហូតដល់ជាង ៨៤ ពាន់លានដុល្លារក្នុងមួយឆ្នាំ(រហូតដល់ឆ្នាំ២០២៩) រួមមាន ឧស្ម័នធម្មជាតិរាវ ប្រេងឆៅ យន្តហោះ និងគ្រឿងសម្ភារៈក្នុងវិស័យថាមពលផងដែរ។ ទន្ទឹមនឹងនេះ ការិយាល័យតំណាងពាណិជ្ជកម្មរបស់អាម៉េរិកបានលើកឡើងថា កោះតៃវ៉ាន់ បានប្តេជ្ញាដករបាំងពាណិជ្ជកម្មមិនមែនពន្ធក្នុងរយៈពេលយូរ ដូចជា ការទទួលយកស្តង់ដារសាងសង់យានយន្តរបស់អាម៉េរិកដោយគ្មានដាក់កំហិតច្បាប់បន្ថែមណាមួយឡើយ។
កិច្ចព្រមព្រៀងពាណិជ្ជកម្មនេះធ្លាប់ត្រូវបានប្រកាសជាលើកដំបូងនៅក្នុងខែមករា នៅពេលដែលក្រុមហ៊ុនបច្ចេកវិទ្យា និងបន្ទះឈីបរបស់កោះតៃវ៉ាន់ប្តេជ្ញាចិត្តវិនិយោគសរុបយ៉ាងហោចណាស់ ២៥០ ពាន់លានដុល្លារទៅក្នុងផលិតកម្មនៅទឹកដីអាម៉េរិក ជាមួយនឹងការគាំទ្រផ្នែកឥណទានរបស់រដ្ឋាភិបាលដើម្បីជួយសម្រួលដល់ការវិនិយោគបន្ថែមរបស់ក្រុមហ៊ុន ខណៈដែលប្រទេសចិននៅតែបន្តចាត់ទុកកោះតៃវ៉ាន់ជាផ្នែកនៃទឹកដីរបស់ខ្លួន និងបានរិះគន់ថា កិច្ចព្រមព្រៀងនេះអាចធ្វើឱ្យប៉ះពាល់ដល់ផលប្រយោជន៍សេដ្ឋកិច្ចរបស់កោះតៃវ៉ាន់តែប៉ុណ្ណោះ ដោយសារអាម៉េរិកព្យាយាមគ្រប់គ្រងឧស្សាហកម្មឈីបរបស់កោះមួយនេះ។ សូមរំលឹកថា កាលពីខែធ្នូកន្លងទៅនេះ អាម៉េរិកបានអនុម័តលក់អាវុធក្នុងតម្លៃជាង ១១,១៥ ពាន់លានដុល្លារទៅឱ្យកោះតៃវ៉ាន់ ដែលធ្វើឲ្យចិនខឹងសម្បារ និងចោទប្រកាន់ថា អាម៉េរិកបានរំលោភលើគោលការណ៍ចិនតែមួយ ឬ One China Principle។
យ៉ាងណាមិញ អាម៉េរិក និង កោះតៃវ៉ាន់ ហាក់មានទស្សនៈផ្សេងគ្នាលើខ្សែសង្វាក់ផ្គត់ផ្គង់បន្ទះឈីប ដោយសារអាម៉េរិកមានគោលដៅចង់បាន ៤០% នៃខ្សែសង្វាក់ផ្គត់ផ្គង់ឈីបទាំងមូលរបស់កោះតៃវ៉ាន់ទៅកាន់ទឺកដីរបស់ខ្លួន។ លើសពីនេះ អាម៉េរិកធ្លាប់ដាក់សម្ពាធថា ក្រុមហ៊ុនឈីបរបស់កោះតៃវ៉ាន់ដែលមិនសាងសង់នៅក្នុងទឺកដីអាម៉េរិកទំនងជាប្រឈមនឹងពន្ធ ១០០% ។ ជាការឆ្លើយតប កោះតៃវ៉ាន់បានរុញច្រានចោលសំណើនោះក្រោមហេតុផលថា ការផ្លាស់ប្តូរចំណែក ៤០% នៃខ្សែសង្វាក់ផ្គត់ផ្គង់ឈីបទាំងមូលរបស់ខ្លួនទៅអាម៉េរិកគឺមិនអាចទៅរួចទេ។
ឧបនាយករដ្ឋមន្ត្រី លោកស្រី Cheng Li-chiun បានលើកឡើងថា ប្រព័ន្ធអេកូឡូស៊ីឈីបរបស់កោះតៃវ៉ាន់បានសាងសង់អស់ជាច្រើនទសវត្សរ៍មកហើយ ដោយឡែក ការផ្លាស់ប្តូរទីតាំងមិនអាចធ្វើទៅបានដោយងាយស្រួលនោះទេ។ មិនត្រឹមតែប៉ុណ្ណោះ កោះតៃវ៉ាន់ នៅតែមានបំណងពង្រីកខ្លួននៅអន្តរជាតិកាន់តែធំជាងបច្ចុប្បន្ន ខណៈដែលការវិនិយោគក្នុងស្រុកនៅតែបន្តមាន៕
Account
Security
Favourite Content