សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ត្បិតជាសិក្ខាកាមធ្លាប់ទៅធ្វើការនៅប្រទេសជប៉ុនក៏ពិតមែន យុវជនខ្មែរមួយរូបបានខិតខំក្រេបយកចំណេះដឹង បច្ចេកទេសក្នុងការដាំមើមឈូកនៅប្រទេសជប៉ុន និងពាំនាំជំនាញទាំងនោះមកអនុវត្តផ្ទាល់នៅប្រទេសកំណើតវិញ ដែលជាកសិដ្ឋានថ្មីមួយមានដាំឈូកយកមើមជាមួយនឹងការទទួលបានលទ្ធលជោគជ័យ ហើយទិន្នផលក៏មានទីផ្សារខ្ពស់។
លោក ឡុង គន្ធា ម្ចាស់កសិដ្ឋានមើមឈូក ខេ ធី ស្ថិតនៅស្រុកកំចាយមារ ខេត្តព្រៃវែង បានមានប្រសាសន៍ឱ្យដឹងថា៖
៖«យើងសម្រេចចិត្តដាំមើមឈូកនេះដោយសារតែយើងមើលឃើញពីអត្ថប្រយោជន៍ និងទីផ្សាររបស់វា ហើយយើងក៏បានចាប់អារម្មណ៍សិក្សាពីប្រភេទពូជរបស់ឈូកដែលមានមើម និងអាចដាំនៅប្រទេសយើងបាន»។
លោកបន្តថា កាលដើមឡើយលោកជាអ្នកធ្វើការនៅប្រទេសជប៉ុនប្រមាណ ៧ឆ្នាំដែលលោកចាប់យកជំនាញដាំឈូកនេះតែមួយមុខប៉ុណ្ណោះ ហើយនេះជាឱកាសមួយកំឡុងពេលធ្វើការក៏ដូចជារៀនជំនាញពីប្រទេសជប៉ុន ដើម្បីអាចយកមកអនុវត្តបាននៅពេលត្រឡប់មកស្រុកខ្មែរវិញ ហើយក្នុងការត្រៀមខ្លួន លោកបានត្រៀមច្រើនដំណាក់ ទាំងការដាំដុះ ការថែទាំ ការវេចខ្ចប់ ពោលគឺត្រូវព្យាយាមរៀនសូត្រ និងមើលឃើញពីឱកាសទីផ្សារ និងឆ្លៀតពេលសួរពីអ្នកជំនាញ សិក្សា និងស្រាវជ្រាវបន្ថែមផងដែរ។
សម្រាប់ការការសិក្សា លោកបន្ថែមថា គឺចំណាយពេលប្រមាណ ២ឆ្នាំ ដោយបានឆ្លងកាត់ការបរាជ័យផង ទើបអាចបន្តការដាំជោគជ័យដូចបច្ចុប្បន្ន។ ចំណែកពូជវិញ ដំបូងឡើយជាពូជរបស់ជប៉ុនផ្ទាល់ តែក៏អាចធ្វើការបង្កាត់តាមបច្ចេកទេសឱ្យស័ក្ដិសមនឹងអាកាសធាតុនៅស្រុកខ្មែរបានផងដែរ។
បច្ចុប្បន្ន កសិដ្ឋានេះអាចប្រមូលផលបានប្រមាណ ៥០-១០០គីឡូក្រាមតាមការកុម្ម៉ង់ ដែលភាគច្រើនគេទិញទៅសាកល្បងទទួលទានសិន និងមានអាជីវករផ្សេងៗទិញយកទៅលក់បន្ត ក៏ដូចជាដាក់លក់តាមម៉ាត (mart) ថែមទៀតផង។ រីឯតម្លៃមើមឈូកគឺ អាចលក់បានប្រមាណ ១ម៉ឺនរៀលក្នុងមួយគីឡូក្រាម ហើយមើមឈូកពីកសិដ្ឋាននេះទាល់តែមានការកម្ម៉ង់ទើបដកភ្លាមៗ ទើបលាងសម្អាត កាត់ និងវេចខ្ចប់។
អ្វីដែលកាន់តែពិសេស អាកាសធាតុនៅប្រទេសកម្ពុជាអំណោយផលដល់ការដាំឈូកដែលគេអាចដាំបានគ្រប់រដូវ ឱ្យតែមានទឹកគ្រប់គ្រាន់ ហើយគុណភាពរបស់មើមឈូកក៏មានរសជាតិផ្អែមជាង និងចម្អិនឆាប់ចេញជាតិជាងមើមឈូកនៅប្រទេសជប៉ុនថែមទៀតផង ដែលគេអាចច្នៃចម្អិនបានច្រើនមុខ អាចយកទៅក្រឡុកធ្វើជាភេសជ្ជៈក៏បាន និងធ្វើជាអាហារបំប៉នគឺកាន់តែពិសេស។
ពាក់ព័ន្ធនឹងបច្ចេកទេសដាំដុះ លោក គន្ធា រៀបរាប់ថា អ្នកដាំត្រូវការទីតាំងដែលមានសណ្ឋានដីជាប្រភេទដីល្បាប់ មានប្រភពទឹកគ្រប់គ្រាន់ ចៀសវាងដីគ្រួសដែលអាចប៉ះពាល់ដល់សោភ័ណភាពមើម។ ក្រៅពីនេះគេក៏ត្រូវការការថែទាំ ដកស្មៅ និងបន្ថែមជីធម្មជាតិដើម្បីឱ្យដីផុសល្អ មើមឈូកក៏លូតលាស់បានល្អ។
ចំពោះដើមទុនវិញ ម្ចាស់កសិដ្ឋានរូបនេះបញ្ជាក់ថា ផ្ទៃដី១ហិកតា គេអាចចំណាយក្នុងការរៀបចំដីប្រហែលនឹងធ្វើស្រែដែរ តែអ្វីដែលចំណាយអស់ច្រើនគឺពូជ ដែលត្រូវចំណាយខ្ទង់១ម៉ឺនដុល្លារ តែការដាំឈូកយកមើមនេះប្រើរយៈពេលត្រឹម ៣ខែ គឺអាចប្រមូលផលបាន ១០-១៥តោនយ៉ាងតិចក្នុងមួយរដូវ ហើយការទិញពូជគឺត្រូវទិញតែម្ដង លុះពេលក្រោយគេក៏អាចយកមើមមកដាំបន្តទៀតបាន។
ចុងក្រោយ លោក ឡុង គន្ធា សូមលើកទឹកចិត្តដល់កសិករដែលចង់ដាំឈូកយកមើមនេះគឺអាចសាកល្បងដាំបាន ដែលការងារនេះមិនសូវហត់ប៉ុន្មានទេ ក៏មិនត្រូវប្រើកម្លាំងពលកម្មច្រើន ព្រោះយើងធ្វើតាមបច្ចេកទេសដែលមានស្រាប់ ហើយអ្វីដែលគួរយកចិត្តទុកដាក់គឺការផ្គត់ផ្គង់ទឹកឱ្យបានគ្រប់គ្រាន់៕
Account
Security
Favourite Content