ភ្នំពេញ ៖ ផ្អែកតាមមជ្ឈមណ្ឌលកម្ពុជា 4.0 បានបញ្ជាក់ថា សុវត្ថិភាពទិន្នន័យ គឺជាដំណើរការនៃការការពារព័ត៌មានឌីជីថលពីការលួច ឬការចូលប្រើប្រាស់ដោយគ្មានការអនុញ្ញាត។ សុវត្ថិភាពទិន្នន័យគ្របដណ្តប់លើ Hardware, Software, ឧបករណ៍ផ្ទុក និងឧបករណ៍អ្នកប្រើប្រាស់, ការចូលប្រើប្រាស់ និងការគ្រប់គ្រងរដ្ឋបាល, ប្រតិបត្តិការហិរញ្ញវត្ថុ, គោលនយោបាយ និងនីតិវិធីរបស់ស្ថាប័នជាដើម។

ស្របពេលនឹងការវិវត្តយ៉ាងឆាប់រហ័សនៃបច្ចេកវិទ្យា សុវត្ថិភាពទិន្នន័យបានក្លាយជាមូលដ្ឋានគ្រឹះនៃបច្ចេកវិទ្យាព័ត៌មានដែលបានដើរតួនាទីយ៉ាងសំខាន់ក្នុងការការពារព័ត៌មានរសើបពីការចូលប្រើប្រាស់ដោយគ្មានការអនុញ្ញាត ការប្រើប្រាស់មិនត្រឹមត្រូវ ឬការលួចព័ត៌មានជាដើម។ អាស្រ័យហេតុនេះ ទើបម្ចាស់អាជីវកម្ម រដ្ឋាភិបាល និងបុគ្គលបានពឹងផ្អែកយ៉ាងខ្លាំងលើថ្នាលឌីជីថលដើម្បីរក្សាទុក និងផ្លាស់ប្តូរទិន្នន័យ ដើម្បីការពារទិន្នន័យនោះពីការគំរាមកំហែងនានាតាមប្រព័ន្ធអ៊ីនធឺណិត។

សុវត្ថិភាពទិន្នន័យរួមបញ្ចូលនូវការអនុវត្តបច្ចេកវិទ្យា និងគោលនយោបាយជាច្រើនដែលត្រូវបានរចនាឡើង ដើម្បីធានាឱ្យបាននូវភាពសម្ងាត់ (Confidentiality), សុចរិតភាព (Integrity) និងលទ្ធភាពដែលអាចប្រើប្រាស់បាន (Availability)។ ចំពោះ Confidentially ឬការសម្ងាត់សំដៅលើការរឹតបន្តឹងការចូលប្រើទិន្នន័យសម្រាប់តែបុគ្គល ឬប្រព័ន្ធដែលមានការអនុញ្ញាតប៉ុណ្ណោះ។ Integrity ធានាថាទិន្នន័យនៅតែមានភាពត្រឹមត្រូវ និងមិនមានការផ្លាស់ប្តូរអំឡុងពេលផ្ទុក ឬបញ្ជូន ខណៈពេលដែលលទ្ធភាពដែលប្រើប្រាស់បានធានាថាអ្នកប្រើប្រាស់ដែលមានការអនុញ្ញាតអាចចូលប្រើទិន្នន័យបានគ្រប់ពេលវេលា។ តម្រូវការសម្រាប់សុវត្ថិភាពទិន្នន័យត្រូវបានពង្រីកដោយកំណើនអិចស្ប៉ូណង់ស្យែលនៃព័ត៌មានឌីជីថល និងការកើនឡើងនៃភាពស្មុគស្មាញនៃការគំរាមកំហែង តាមអ៊ីនធឺណិត។

ការវាយប្រហារតាមអ៊ីនធឺណិត ដូចជា ការបន្លំ, Virus, Ransomware និងការវាយប្រហារ DDoS បានក្លាយជាកត្តាមួយដែលស្ថាប័នទាំងអស់មិនថាតូច ឬធំ ត្រូវតែយកចិត្តទុកដាក់។ ជាក់ស្តែង ការរំលោភលើទិន្នន័យដែលមានទម្រង់ធំ ដែលធ្លាប់កើតមានឡើង ដោយ Equifax, Yahoo, និង Marriott International បានលាតត្រដាងព័ត៌មានផ្ទាល់ខ្លួនរបស់បុគ្គលរាប់លាននាក់ ដែលបណ្តាលឱ្យខូចខាតផ្នែកហិរញ្ញវត្ថុ និងកេរ្តិ៍ឈ្មោះដល់អង្គភាពដែលរងផលប៉ះពាល់ ជាពិសេស ប៉ះពាល់ទៅលើអតិថិជនផងដែរ។ បន្ថែមពីនេះ បច្ចុប្បន្ន មនុស្សជាច្រើនបានធ្វើការផ្លាស់ប្តូរទៅប្រើប្រាស់បច្ចេកវិទ្យាភ្លោះដសម្រាប់ការផ្ទុកទិន្នន័យផ្សេងៗ និងការធ្វើការងារពីចម្ងាយ ដែលបានធ្វើឱ្យមានភាពស្មុគស្មាញបន្ថែមទៀតដល់ទិដ្ឋភាពនៃសុវត្ថិភាពទិន្នន័យ។ ខណៈពេលដែលបច្ចេកវិទ្យាក្លោដត្រូវបានប្រើប្រាស់ជាសកល បច្ចេកវិទ្យានេះបានក្លាយជាកន្លែងប្រមូលផ្តុំទិន្នន័យរសើបមួយចំនួនធំផងដែរ ដែលធ្វើឱ្យពួកគេក្លាយជាគោលដៅចម្បងសម្រាប់អ្នកវាយប្រហារ។ ដើម្បីទប់ទល់នឹងហានិភ័យទាំងនេះ ស្ថាប័នទាំងអស់បានអនុវត្តវិធានការសុវត្ថិភាពផ្សេងៗ រួមទាំង Encryption, Firewalls, ប្រព័ន្ធស្វែងរកការវាយប្រហារ និង Multi-factor Authentication ជាដើម។ បន្ថែមពីនេះ គោលការណ៍សុវត្ថិភាពទិន្នន័យ ដូចជា ការធ្វើបច្ចុប្បន្នភាពកម្មវិធីទៀងទាត់ ការបណ្តុះបណ្តាល បុគ្គលិក និងការគ្រប់គ្រងការចូលប្រើប្រាស់ទិន្នន័យ គឺជាកត្តាចាំបាច់ដើម្បីកាត់បន្ថយភាពងាយ រងគ្រោះ។ ក្រុមហ៊ុនផ្តល់សេវា ក្លោដ និងក្រុមហ៊ុនបច្ចេកវិទ្យាក៏បាននិងកំពុងវិនិយោគយ៉ាងច្រើន នៅក្នុងឧបករណ៍កម្រិតខ្ពស់ ដូចជា បញ្ញាសិប្បនិម្មិត និងម៉ាស៊ីនសិក្សា ដើម្បីស្វែងរក និងឆ្លើយតបទៅនឹងការគំរាមកំហែងក្នុងពេលជាក់ស្តែងផងដែរ។