សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ម៉ូដែលបញ្ញាសិប្បនិម្មិត (AI) របស់ចិនកំពុងពង្រីកវត្តមានយ៉ាងឆាប់រហ័សនៅក្នុងទីផ្សារអាហ្វ្រិក ហើយអ្នកអភិវឌ្ឍន៍កម្មវិធីនៅតំបន់នេះកំពុងងាកចេញពីម៉ូដែលរបស់ក្រុមហ៊ុនអាម៉េរិក មកប្រើប្រាស់ម៉ូដែលចិនដែលមានតម្លៃទាប និងមានភាពបត់បែនខ្ពស់ជាង។ នេះបើយោងតាមការរាយការណ៍របស់ The New York Times។
អ្នកអភិវឌ្ឍន៍កម្មវិធីនៅអាហ្វ្រិកកំពុងកាត់បន្ថយការប្រើប្រាស់ម៉ូដែលរបស់ក្រុមហ៊ុនអាម៉េរិក ដូចជា OpenAI, Anthropic, Meta និង Google ហើយងាកមកប្រើម៉ូដែលរបស់ក្រុមហ៊ុនចិន ដូចជា Alibaba និង DeepSeek ដែលមានលក្ខណៈបើកចំហជាង។
ការផ្លាស់ប្ដូរនេះត្រូវបានជំរុញដោយកត្តាជាច្រើន រួមមានតម្លៃប្រើប្រាស់ទាបជាង ភាពងាយស្រួលក្នុងការទាញយក និងកែសម្រួលម៉ូដែល ព្រមទាំងសមត្ថភាពក្នុងការឆ្លើយតបបានល្អទៅនឹងតម្រូវការជាក់ស្តែងនៅក្នុងតំបន់។
លោក Ernest Mwebaze អ្នកអភិវឌ្ឍន៍កម្មវិធីជនជាតិអ៊ូហ្គង់ដា បានសាកល្បងទាំងម៉ូដែល AI របស់អាម៉េរិក និងចិន នៅពេលបង្កើតប្រព័ន្ធ «Sunflower» ដែលត្រូវបានរចនាឡើងសម្រាប់ដំណើរការជាភាសាក្នុងស្រុក។ លោកបានរកឃើញថា ម៉ូដែលរបស់ Alibaba មានសមត្ថភាពល្អជាងក្នុងការយល់ភាសាក្នុងស្រុកជាច្រើនរបស់អ៊ូហ្គង់ដា ខណៈដែលមានតម្លៃទាបជាង និងងាយស្រួលក្នុងការកែសម្រួល។
បច្ចុប្បន្ន ប្រព័ន្ធ «Sunflower» ត្រូវបានប្រើប្រាស់យ៉ាងទូលំទូលាយដោយកសិករនៅទូទាំងអ៊ូហ្គង់ដា ដើម្បីទទួលបានព័ត៌មានអំពីការព្យាករណ៍អាកាសធាតុ និងការណែនាំអំពីបច្ចេកទេសកសិកម្មជាភាសាតំបន់។
និន្នាការស្រដៀងគ្នានេះក៏កំពុងកើតឡើងនៅប្រទេសផ្សេងទៀតក្នុងទ្វីបអាហ្វ្រិក។ នៅកេនយ៉ា ម៉ូដែល AI របស់ចិនត្រូវបានប្រើប្រាស់សម្រាប់ធ្វើស្វ័យប្រវត្តិកម្មដំណើរការផ្នែកច្បាប់ និងអាជីវកម្ម ខណៈនីហ្សេរីយ៉ាប្រើប្រាស់វាសម្រាប់បង្កើតវេទិកាអប់រំ។ នៅហ្គាណា ម៉ូដែល AI ចិនត្រូវបានប្រើប្រាស់ក្នុងការអភិវឌ្ឍកម្មវិធីសន្ទនាជាមួយបញ្ញាសិប្បនិម្មិត (Chatbots) ក្នុងស្រុក។
ក្រុមអ្នកវិភាគបានកត់សម្គាល់ថា សមត្ថភាពកម្រិតខ្ពស់បំផុតរបស់ម៉ូដែល AI មិនមែនជាកត្តាសំខាន់បំផុតសម្រាប់ក្រុមហ៊ុនភាគច្រើននៅអាហ្វ្រិកនោះទេ។ ផ្ទុយទៅវិញ កត្តាសំខាន់គឺសមតុល្យរវាងការចំណាយ និងសមត្ថភាព។
ម៉ូដែលរបស់អាម៉េរិក ដូចជា OpenAI មានលក្ខណៈបិទជិតជាង ខណៈម៉ូដែលរបស់ចិនមានភាពបើកចំហ ដែលអនុញ្ញាតឱ្យក្រុមហ៊ុននៅអាហ្វ្រិកអាចដំណើរការលើម៉ាស៊ីនមេផ្ទាល់ខ្លួន កែសម្រួលឱ្យសមស្របនឹងភារកិច្ចជាក់លាក់ និងកាត់បន្ថយការចំណាយលើការប្រើប្រាស់។
ប្រជាប្រិយភាពរបស់ម៉ូដែល AI ចិនកំពុងកើនឡើងយ៉ាងឆាប់រហ័សនៅក្នុងទីផ្សារអាហ្វ្រិក ដោយក្នុងចំណោមម៉ូដែល AI ពេញនិយមបំផុតចំនួន ២៥ មានដល់ទៅ ១៩ ម៉ូដែលដែលត្រូវបានបង្កើតឡើងដោយក្រុមហ៊ុនចិន។
ទន្ទឹមនឹងនេះ ចិនក៏កំពុងជំរុញបច្ចេកវិទ្យា AI របស់ខ្លួននៅអាហ្វ្រិក តាមរយៈកិច្ចសហការ ការវិនិយោគ និងការគាំទ្រដល់អ្នកអភិវឌ្ឍន៍។ ក្រុមហ៊ុនចិនបានផ្តល់ធនធានមួយចំនួនដោយឥតគិតថ្លៃ ជំនួយបច្ចេកទេស និងសម្រួលការចូលប្រើប្រាស់កម្មវិធីសម្រាប់អ្នកអភិវឌ្ឍន៍ ខណៈវត្តមានរបស់ក្រុមហ៊ុនអាម៉េរិកនៅក្នុងទីផ្សារតំបន់នេះមានកម្រិតជាង។
អ្នកជំនាញជឿជាក់ថា ស្ថានភាពនេះបង្ហាញពីដំណាក់កាលថ្មីនៃការប្រកួតប្រជែងរវាងមហាអំណាចក្នុងវិស័យបញ្ញាសិប្បនិម្មិត។ កាលពីមុន ក្រុមហ៊ុនអាម៉េរិកធ្លាប់គ្របដណ្តប់ទីផ្សារ AI ដោយមានគូប្រជែងតិចតួច ប៉ុន្តែបច្ចុប្បន្ន ម៉ូដែលបើកចំហរបស់ចិនកំពុងក្លាយជាមូលដ្ឋានសំខាន់សម្រាប់ការបង្កើតផលិតផលបច្ចេកវិទ្យាថ្មីៗនៅក្នុងបណ្តាប្រទេសកំពុងអភិវឌ្ឍន៍៕
Account
Security
Favourite Content