កោះកុង៖ អាកាសយានដ្ឋានអន្តរជាតិតារាសាគរ ស្ថិតនៅក្នុងខេត្តកោះកុង បានសម្ពោធដាក់ឱ្យដំណើរការជាបណ្តោះអាសន្ន ស្វាគមន៍ការហោះហើរលើកដំបូងរបស់ខ្លួន កាលពីថ្ងៃទី២៦ ខែធ្នូ ឆ្នាំ២០២៤ ដែលជាព្រឹត្តិការណ៍ដ៏សំខាន់មួយក្នុងការអភិវឌ្ឍវិស័យអា​កាសចរណ៍នៅកម្ពុជា។ នៅក្នុងថ្ងៃដដែលនេះ កិច្ចស្វាគមន៍ជើងហោះហើរជួលក្នុងស្រុក (Domestic charter flight) លើកដំបូងត្រូវបានចាកចេញពីអាកាសយានដ្ឋានអន្តរជាតិភ្នំពេញ ទៅកាន់អាកាសយានដ្ឋានអន្តរជាតិតារាសាគរ ខេត្តកោះកុង ខណៈដែលអាកាសយានដ្ឋានអន្តរជាតិតារាសាគរ គឺជាអាកាសយានដ្ឋានថ្មីស្រឡាងដែលត្រូវបានរំពឹងថានឹងជួយដល់វិស័យទេស​ចរណ៍ និងទាក់ទាញវិនិយោ​គិន មកវិនិយោគនៅកម្ពុជាបន្ថែមទៀត ។

ឯកឧត្តម ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល តំណាងក្រុមហ៊ុន Coa​stal Airport Investment (CAI) អាជ្ញាធរមូលដ្ឋាន និងភាគីពាក់ព័ន្ធ បានរៀបចំពិធីស្វាគមន៍ការបើកជើងហោះហើរក្នុងស្រុកទៅកាន់អាកាសយានដ្ឋាននៃខេត្តជាប់មាត់សមុទ្ររបស់កម្ពុជា និងបានប្រព្រឹត្តទៅក្រោមវត្តមាននៃជើង​ហោះ​​ហើរក្នុងស្រុកលើកដំបូង ធ្វើឡើងដោយ K6 (ATR-72) របស់ក្រុមហ៊ុនអាកាសចរណ៍ ខេមបូឌា អង្គរអ៊ែរ ។

ឯកឧត្តម លោក ម៉ៅ ហាវណ្ណាល់ បានថ្លែងថា ការសម្ពោធជើងហោះហើរក្នុងស្រុកទៅកាន់ខេត្តកោះកុង គឺជាការអភិវឌ្ឍន៍ដ៏សំខាន់មួយក្នុងវិស័យអាកាសចរណ៍នៅកម្ពុជា។ អាកាសយានដ្ឋានអន្តរជាតិតារាសាគរ នៅពេលដាក់ឱ្យដំណើរការជាផ្លូវការនឹងចូលរួមដើរតួនាទីយ៉ាងសំខាន់ក្នុងការតភ្ជាប់ជាមួយហេដ្ឋារចនាសម្ព័ន្ធទាំងក្នុងស្រុក និងនៅអន្តរជាតិ ដោយក្នុងនោះមានទាំងវិស័យទេសចរណ៍ ពាណិជ្ជកម្ម និងសេដ្ឋកិច្ចក្នុងតំបន់សម្រាប់កម្ពុជា។

យោងតាមផែនការមេសម្រាប់ការអភិវឌ្ឍន៍អាកាសយានដ្ឋានតារាសាគរក្នុងរយៈពេលខ្លី និងមធ្យម ក្រោយការបើកឱ្យដំណើរការហោះហើរ និងដឹកជញ្ជូនតាមផ្លូវអាកាសនេះ អាកាសយានដ្ឋានត្រូវបានគេរំពឹងថា នឹងទទួលអ្នកដំណើរ ៧លាននាក់ និងទំនិញ ១ម៉ឺនតោនក្នុងមួយឆ្នាំ ហើយតួលេខនឹងកើនឡើងដល់ ២០ លាននាក់ និង ៦ម៉ឺន តោន ក្នុងមួយឆ្នាំ ចាប់គិតពីឆ្នាំ២០៣០-២០៥០តទៅ។

លោកជំទាវ មិថុនា ភូថង អភិបាលខេត្តកោះកុង បានថ្លែងថា ការចាប់ផ្តើមហោះហើររបស់អាកាសយានដ្ឋានអន្តរជាតិតារាសាគរនេះ នឹងជួយដល់ការចាប់អារម្មណ៍ដល់ក្រុមអ្នកវិនិយោគ នឹងចូលមកបណ្តាក់ទុនលើទឹកដីខេត្តកោះកុងបន្ថែមទៀត ព្រមជាមួយគ្នានេះវិស័យទេសចរណ៍ក៏នឹងមានភាពល្អប្រសើរឡើងដែរ ព្រោះភ្ញៀវទេសចរជាតិ និងអន្តរជាតិងាយធ្វើដំណើរមកកាន់ខេត្តកោះកុង ដោយសារមានទាំងការដឹកជញ្ជូនតាមផ្លូវអាកាស តាមផ្លូវទឹក និងតាមផ្លូវគោក ផងដែរ ជាក់ស្ដែង បច្ចុប្បន្នរដ្ឋាភិបាលកំពុងមមាញឹកក្នុងការអភិវឌ្ឍន៍បណ្តាញហេដ្ឋារចនាសម្ព័ន្ធ ផ្លូវជាតិលេខ៤៨ និងផ្លូវជាតិលេខ១០ ដែលតភ្ជាប់ពីខេត្តកោះកុងទៅកាន់ពោធិ៍សាត់ បាត់ដំបង និងអាចតភ្ជាប់ទៅខេត្តសៀមរាបទៀតផង ហើយសង្ឃឹមថាតាមរយៈការតភ្ជាប់ផ្លូវថ្មីៗបន្ថែមទៀតនេះនឹងក្លាយជាទីចាប់អារម្មណ៍វិនិយោគនៅខេត្តដ៏ស្រស់ស្អាតមួយនេះជាក់ជាពុំខាន។

លោក លី ម៉ុងឈិន (Li Mengchen) ប្រធានក្រុមប្រឹក្សាភិបាលក្រុមហ៊ុន Coastal Airport Investment (CAI) បានប្រាប់បណ្តាញសារព័ត៌មានថា អាកាសយានដ្ឋាននេះមានទីតាំងនៅតំបន់វេហាសាគរនៃតារាសាគរ នៅលើផ្ទៃដី២៣គីឡូម៉ែត្រការ៉េ ។ អាកាសយានដ្ឋាននេះ មានផ្លូវរត់ប្រវែង៣២០០ម៉ែត្រ ដែលបំពេញតាមស្តង់ដារជើងហោះហើរកម្រិត4E ។

ជាជំហានដំបូង អាកាសយានដ្ឋានអន្តរជាតិតារាសាគរអាចតភ្ជាប់ជើងហោះហើរជាមួយអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិកងកេង ខេត្តព្រះសីហនុ អាកាសយានដ្ឋានអន្តរជាតិសៀមរាប-អង្គរ ខេត្តសៀមរាប។ ការខិតខំជំរុញឱ្យមានការតភ្ជាប់ជើងហោះហើរក្នុងស្រុកនេះ គឺដើម្បីជាមធ្យោបាយដឹកជញ្ជូនក្នុងស្រុក ជាពិសេសចូលរួមជាកម្លាំងរួមផ្សំ ក្នុងការជំរុញកំណើនសេដ្ឋកិច្ចនៅកម្ពុជា។ 

សូមជម្រាបថា អាកាសយានដ្ឋានអន្តរជាតិតារាសាគរ វិនិយោគដោយក្រុមហ៊ុនចិន Tianjin Union Develo​p​ment Group និងត្រូវបានអភិវឌ្ឍក្នុងដំណាក់កាលដំបូងលើផ្ទៃដី២១៨ ហិកតា និងមានផ្ទៃដីចំនួន១ ០០០ហិកតា ជាដីបម្រុងទុកសម្រាប់ការអភិវឌ្ឍន៍បន្ត ដោយចំណាយថវិកាប្រមាណ២០០ លានដុល្លារអាមេរិក៕