ភ្នំពេញ ៖ ការលើកកម្ពស់នៃការចូលរួមសេដ្ឋកិច្ចឌីជីថលសម្រាប់សហគ្រិនស្ត្រី នឹងធ្វើឲ្យកម្ពុជាឈានទៅរកការពង្រីកអាជីវកម្មទៅកាន់តំបន់អាស៊ានតាមរយៈប្រព័ន្ធអេឡិចត្រូនិក។ នេះបើយោងតាមលោក ម៉ុក កិត្យា អគ្គនាយករងនៃអគ្គនាយកដ្ឋាន សហគ្រាសធុនតូច និងមធ្យម និងសិប្បកម្ម ដែលជាតំណាងដ៏ខ្ពង់ខ្ពស់របស់ ឯកឧត្តម ហែម វណ្ណឌី រដ្ឋមន្ត្រី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងនៅវគ្គបណ្តុះបណ្តាលស្តីអំពីការលើកកម្ពស់ការចូលរួមសេដ្ឋកិច្ចឌីជីថលសម្រាប់ស្ត្រី MSMEs ក្នុងតំបន់អាស៊ាន នាថ្ងៃទី២០ និង ២១ ខែកក្កដា ឆ្នាំ២០២៤ នៅរាជធានីភ្នំពេញ។

លោកអគ្គនាយករងបានបន្តថា វគ្គបណ្តុះបណ្តាលស្តីអំពីការលើកកម្ពស់នៃការចូលរួមសេដ្ឋកិច្ចឌីជីថលសម្រាប់ស្ត្រី MSMEs ក្នុងតំបន់អាស៊ាន លើកទី៣ រៀបចំឡើងក្នុងគោលបំណង លើកកម្ពស់ការចូលរួមសេដ្ឋកិច្ចឌីជីថលសម្រាប់ស្ត្រីក្នុងតំបន់អាស៊ាន ផ្តោតសំខាន់លើ MSMEs (សហគ្រាសមីក្រូ ធុនតូច និងមធ្យម) ហើយគម្រោងនេះត្រូវបានផ្តួចផ្តើមឡើងតាមរយៈកិច្ចសហប្រតិបត្តិការរវាងសារណៈរដ្ឋកូរ៉េ និងអាស៊ាន (ASEAN-ROK) ក្នុងក្របខណ្ឌគណកម្មាធិការសម្របសម្រួលវិស័យសហគ្រាសធុនមីក្រូ ខ្នាតតូច និងមធ្យមអាស៊ាន (ACCMSMEs) និងត្រូវបានកំពុងអនុវត្តនៅប្រទេសអាស៊ានទាំង១០ មានន័យថា ប្រទេសសមាជិកអាស៊ាននីមួយៗ ក៏កំពុងផ្តល់ការបណ្តុះបណ្តាលជូនដល់សហគ្រិនស្ត្រីផងដែរ ដែលជាសញ្ញាថា យើងត្រូវតែខិតខំហ្វឹកហាត់បន្ថែម ដើម្បីប្រឈមទៅនឹងការប្រកួតប្រជែងនៅពេលអនាគត ជាពិសេសលទ្ធភាពនៃការឈានទៅពង្រីកអាជីវកម្មចូលទីផ្សារមូលបត្រជាដើម។

លោកបានបន្ថែមថា គម្រោងនេះនឹងរួមចំណែកផ្តល់ជូននូវការកសាងសមត្ថភាពក្នុងវិស័យពាណិជ្ជកម្មអេឡិចត្រូនិក និងការយល់ដឹងអំពីការគ្រប់គ្រងប្រើប្រាស់ប្រព័ន្ធឌីជីថល ឬព័ត៌មានវិទ្យាសម្រាប់អាជីវកម្ម ការរៀបចំផែនការស្រាវជ្រាវ និងការអភិវឌ្ឍន៍ប្រព័ន្ធអេកូ-អាជីវកម្មតាមអេឡិចត្រូនិក ដល់សហគ្រិនជាស្ត្រី។ ការលើកកម្ពស់នៃការចូលរួមសេដ្ឋកិច្ចឌីជីថលសម្រាប់សហគ្រិនស្ត្រីនេះត្រូវបានផ្តល់មូលនិធិដោយមូលនិធិសហប្រតិបត្តិការអាស៊ាន-កូរ៉េ (AKCF) និងអនុវត្តដោយគម្រោងថ្នាក់តំបន់ដោយមជ្ឈមណ្ឌលបណ្តាញព័ត៌មានស្ត្រីអាស៊ីប៉ាស៊ីហ្វិក (Asia Pacific Women’s Information Network Center) ហៅកាត់ថា APWINC និងសហការគាំទ្រដោយលេខាធិការដ្ឋានអាស៊ាន (ASEAN Secretariat) តាមរយៈគណៈកម្មាធិការសម្របសម្រួលសហគ្រាស ធុនមីក្រូ-តូច និងមធ្យម អាស៊ាន (ACCMSME) ដែលមានក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជាគណៈកម្មាធិការដឹកនាំគម្រោងសម្រាប់ប្រទេសកម្ពុជា។

នៅក្នុងអាណត្តិរដ្ឋាភិបាលថ្មីនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងបន្តភារកិច្ចស្នូលសំខាន់ពីរ គឺការដឹកនាំសម្របសម្រួល និងអនុវត្តគោលនយោបាយរបស់រដ្ឋាភិបាល និងការចូលរួមកសាងសមត្ថភាពដល់សហគ្រាសគ្រប់ប្រភេទ រាប់ទាំងការអនុវត្តផែនការគោលនយោបាយសេដ្ឋកិច្ចក្រៅប្រព័ន្ធ។

គួរបញ្ជាក់ថា ទំនើបកម្មផ្នែកសេវាសាធារណៈ ក៏ត្រូវបានពង្រីកវិសាលភាព ដូចជាការបង្កភាពងាយស្រួលផ្នែកចុះបញ្ជីអាជីវកម្មតាមប្រព័ន្ធអនឡាញ ការលើកទឹកចិត្តអនុគ្រោះផ្នែកពន្ធដារ ការរៀបចំប្រព័ន្ធព័ត៌មានបញ្ជរជាតិផ្នែកពាណិជ្ជកម្ម ការបង្កើតជាថ្នាល ឬគេហទំព័រ Khmer SMEs និង ASEAN ACCESS ការបណ្តុះបណ្តាលជំនាញបច្ចេកទេស ការផ្តល់ឥណទានអាជីវកម្ម និងការប្រឹក្សាយោបល់នានា ការសហការទាក់ទាញវិនិយោគបរទេសមកកម្ពុជា និងការជំរុញទីផ្សារស្របតាមបទបញ្ញត្តិនីតិវិធីពាណិជ្ជកម្មសេរី សុទ្ធតែជាសមិទ្ធផលនៃការខិតខំរបស់រដ្ឋាភិបាលជាមួយវិស័យឯកជននៃបរិវត្តកម្មបច្ចេកវិទ្យា។ ចំណុចស្នូលដែលជំរុញឱ្យមានសកម្មភាពទាំងនេះ គឹស្តែងចេញពីការចូលរួម រវាងវិស័យរដ្ឋ និងឯកជន ក៏ដូចជាដៃគូអភិវឌ្ឍន៍នានា៕