សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
មណ្ឌលគីរី ៖ ស្ពៃក្ដោប ជាដំណាំដែលកសិករពេញនិយមដាំ ពោល គឺអាចដាំបានស្ទើរគ្រប់តំបន់ ប៉ុន្តែសម្រាប់ស្ពៃក្ដោបដែលត្រូវបានដាំដុះនៅខេត្តមណ្ឌលគិរីវិញ គឺមានរសជាតិស្រួយឆ្ងាញ់ប្លែកពីគេ ធ្វើឱ្យដំណាំប្រភេទនេះមានភាពល្បីល្បាញ និងក្លាយជាដំណាំសម្គាល់ភូមិសាស្ត្រនៅខេត្តមណ្ឌលគីរីផ្ទាល់តែម្ដង។
តាមការឱ្យដឹងពីកសិករដែលជាអ្នកដាំដុះបានឱ្យដឹងថា ចំពោះភាពស្រួយ និងរសជាតិឆ្ងាញ់ប្លែកនេះ បានមកដោយសារតែកត្តាអំណោយផលពីធម្មជាតិ ដូចជា កត្តាដីមានជីជាតិ អាកាសធាតុត្រជាក់ ប្រភពទឹកគ្រប់គ្រាន់ រួមជាមួយនឹងបច្ចេកទេសដាំដុះត្រឹមត្រូវ ធ្វើឱ្យដំណាំនេះមានភាពលេចធ្លោរហូតដល់មហាជនដែលបានទៅលេងខេត្តមណ្ឌលគិរីគឺត្រូវតែចូលទិញ និងភ្លក្សរសជាតិស្ទើរគ្រប់ៗគ្នា។
មិនត្រឹមតែរសជាតិប៉ុណ្ណោះទេ ស្ពៃក្ដោបមណ្ឌលគិរីអាចដាំដុះបានមិនប្រកាន់រដូវនោះទេ តែក្នុងករណីមានភ្លៀងច្រើនអាចធ្វើឱ្យទិន្នផលធ្លាក់ចុះខ្លះ រីឯតម្លៃ គេអាចលក់បានចន្លោះពី ៤០០០-៦០០០រៀលក្នុងមួយគីឡូក្រាមតាមរដូវកាលប្រមូលផល។ ចំណែកការផ្គត់ផ្គង់វិញ ដើម្បីធ្វើការចែកចាយកសិផលធម្មជាតិប្រចាំតំបន់នេះឱ្យបានកាន់តែទូលំទូលាយ កសិករក៏មានការចងក្រងជាសហគមន៍កសិកម្មចំនួន ៣ ធំៗ ស្ថិតនៅក្រុងសែនមនោរម្យ១ នៅស្រុកកោះញែក១ និងមួយទៀតស្ថិតនៅស្រុកពេជ្រាដា ដោយផ្ទៃដីដាំដុះដំណាំស្ពៃក្ដោបសរុបមាន ១៤ហិកតាគិតត្រឹមខែមករា ឆ្នាំ២០២៥នេះ។
ក្នុងនោះ សហគមន៍មួយស្ថិតក្នុងក្រុងសែនមនោរម្យ គឺសហគមន៍កសិកម្ម សាមគ្គីមនោរម្យ បានអនុវត្តផលិតកម្មតាមកិច្ចសន្យាជាមួយក្រុមហ៊ុនមាសបៃតង និងបានពង្រឹងបច្ចេកទេសដល់កសិករ បង្កើនគុណភាព ដែលចូលរួមផ្តល់នូវសុវត្ថិភាពបន្លែ ស្របពេលដែលមន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរី ក៏បានបើកវគ្គបណ្តុះបណ្តាលពង្រឹងបច្ចេកទេស ចុះផ្តល់ប្រឹក្សាបច្ចេកតាមគ្រួសារកសិករ ព្រមទាំងផ្តល់ធាតុចូលសំខាន់ៗផងដែរ។
ក្រៅពីស្ពៃក្ដោប មណ្ឌលគិរី ក៏មានដាំដុះនូវបន្លែផ្សេងទៀតរួមមានដូចជា ស្ពៃបូកគោ ការ៉ុត ឆៃថាវ មើមយេន ខាត់ណា ដំឡូងបារាំង ដើម្បីផ្គត់ផ្គង់ទៅលើទីផ្សារ ហើយរាល់ការចាប់អារម្មណ៍ និងគាំទ្រពីសំណាក់ប្រជាជនទូទៅ មិនថាជាភ្ញៀវទេសចរក្នុងស្រុក ឬអន្តរជាតិ ដែលទៅលេងកម្សាន្តផ្ទាល់ និងបញ្ជាទិញទិន្នផលដំណាំនៅក្នុងខេត្តមណ្ឌលគីរី គឺជាផ្នែកមួយជួយឱ្យជីវភាពកសិករបានប្រសើរឡើងពីមួយថ្ងៃទៅមួយថ្ងៃ៕
Account
Security
Favourite Content