ភ្នំពេញ ៖ ផ្ទី ជាបន្លែមួយប្រភេទដែលប្រជាជនភាគច្រើននិយមចូលចិត្តយកធ្វើជាបន្លែផ្សំក្នុងមុខម្ហូបអាហារផ្សេងៗ មិនចំពោះ សម្លរស្ងោរ ប្រហើរ ឬឆា ត្បិតវាមានរសជាតិឆ្ងាញ់ មានតម្លៃសមរម្យ និងអាចដាំដុះជាលក្ខណៈគ្រួសារបាន ជាពិសេសមានផ្ទុកទៅដល់សារធាតិចិញ្ចឹមជាច្រើន ដែលផ្តល់នូវគុណប្រយោជន៍ដល់សុខភាពអ្នកទទួលទានយ៉ាងប្រសើរ។ ដោយសារមើលឃើញពីតម្រូវការទីផ្សារខ្ពស់បែបនេះហើយ ទើបអ្នកជំនាញកសិកម្មបានចងក្រងបច្ចេកទេសក្នុងការដាំដុះផ្ទី ដើម្បីជំនួយដល់កសិករដែលធ្វើអាជីវកម្មជាមួយដំណាំប្រភេទនេះ ដែលមានភាពងាយស្រួល និងអាចទទួលបានទិន្នផលច្រើន។

យោងតាមឯកសារផ្សព្វផ្សាយដែលចេញដោយក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ផ្ទី មានច្រើនប្រភេទ ដូចជា ផ្ទីដូង ផ្ទីស ផ្ទីបន្លា និងផ្ទីអាចម៍មាន់ ដែលកិសករអាចជ្រើសរើសដាំបានទៅតាមតម្រូវការ។ គេអាចដាំផ្ទីបានស្ទើរគ្រប់រដូវ​ ដោយគេត្រូវការរៀបចំដីណាដែលមានជីជាតិគ្រប់គ្រាន់ ជ្រាបទឹកបានល្អ ដែលមានភាគរយជាដីខ្សាច់ច្រើនជាងដីកណ្ដេង ដូចជា ដីល្បាយខ្សាច់ ដីល្បាប់មាត់ទន្លេ ស្ទឹក ជ្រែក ជាដើម ទើបដាំបានស្ទើរពេញ ១ឆ្នាំ ជាពិសេសនៅចន្លោះចុងខែវិច្ឆិកា ដល់ខែមករាផ្ទាល់តែម្ដង។

ចំពោះប្រភេទជីនេះដែរ គេអាចប្រើជីលាមកសត្វ ឬជីកំប៉ុស្តិ៍ពុកផុតចំនួន ២គីឡូក្រាម និងជី ១៥-១៥-១៥ ឬជី ១៦-២០-០ ចំនួនពី ២០ ទៅ ៣០ ក្រាមក្នុងផ្ទៃដី១ម៉ែត្រការេ។ ឯដីសម្រាប់ដាំ ត្រូវលើករង មានទទឹង ១០០-១២០សង់ទីម៉ែត្រ កម្ពស់២០-៣០សង់ទីម៉ែត្រ និងបណ្តោយអាស្រ័យតាមប្រវែងដីជាក់ស្ដែង ហើយដីត្រូវសម្អាត រាស់យកស្មៅចេញ និងភ្ជួរបំបែកដីឱ្យម៉ដ្ឋ រួចហាលចោលរយៈពេល ៧-១០ ថ្ងៃសិន។ ក្រោយលើរងរួច អ្នកដាំត្រូវឆូតជាចង្អូរកាត់ទទឹងរងជម្រៅ១-១.៥សង់ទីម៉ែត្រ ដោយចន្លោះពីចង្អូរមួយទៅចង្អូរមួយទៀតប្រវែង ២០-២៥ សង់ទីម៉ែត្រ។

មុនសាបត្រូវលាយគ្រាប់ជាមួយផេះ ដើម្បីឲ្យងាយស្រួលក្នុងការពិនិត្យគ្រាប់ថា ញឹកឬ រង្វើល ហើយត្រូវសាបគ្រាប់ផ្ទីឲ្យស្តើងជាទីបំផុត បន្ទាប់មកយកចំបើងគ្របពីលើរហូតដល់ផ្ទីដុះ ៥-៨សង់ទីម៉ែត្រទើបប្រមូលយកចេញ ហើយស្រោចទឹកឱ្យជោក។ ប្រសិនបើកូនផ្ទីដុះក្រាស់ពេក គួរដកចេញខ្លះ កុំឲ្យកូនផ្ទីមានសភាពញឹកពេក ទើបវាអាចលូតលាស់បានល្អ។ ក្រៅពីនេះ ក្រោយដាំបាន ១០ថ្ងៃ គឹត្រូវធ្វើស្មៅ ជ្រុំដីឱ្យផុសល្អ និងបំប៉នជីអ៊ុយរ៉េលាយទឹកកម្រិត ១/២០ ដើម្បីស្រោចបំប៉នមួយសប្ដាហ៍ម្ដង។

សម្រាប់ការថែទាំដំណាំផ្ទី កសិករក៏គួរយល់ដឹងពីការស្រោចស្រព និងថែទាំឱ្យបានសមស្រប ព្រោះផ្ទីត្រូវការទឹកតិចណាស់ បើកាលណាដីជាំទឹក អាចធ្វើឲ្យវារលួយ ចំណែកនៅរដូវប្រាំង មានអាកាសធាតុក្តៅខ្លាំងរយៈពេលយូរក៏អាចធ្វើឲ្យវាដុះលូតលាស់យឺត ហើយដើមដុះមិនសូវល្អផងដែរ។

បន្ទាប់ពីរួចដាំហើយ គេអាចប្រមូលផលផ្ទីបានក្នុងរយៈពេលពី ២៥-៣០ថ្ងៃ ហើយអាចប្រមូលផលបានច្រើនលើក ច្រើនសារដូចត្រកួនដែរ។ ប្រើសិនបើគេកាត់ដើមទុកគល់ប្រវែងពី ២-៣ សង់ទីម៉ែត្រពីដី ហើយស្រោចទឹកដាក់ជីបន្ថែម នោះវាអាចឱ្យផលបាន ៣-៤ដងបន្ថែមទៀត។

គួរបញ្ជាក់ដែរថា ផ្ទី ជារុក្ខជាតិសម្បូរទៅដោយប្រូតេអ៊ីន ភ្នាក់ងារប្រឆាំងអុកស៊ីតកម្ម ជំនួយឆ្អឹង ជំនួយដល់ការរំលាយអាហារ មិនមានជាតិ Gluten បន្ថយកម្រិតកូឡេស្តេរ៉ុល ការពារជំងឺក្រិនសរសៃឈាម លុបបំបាត់ជំងឺហើមសរសៃឈាម ជំនួយភ្នែក កាត់បន្ថយពិការភាពពីកំណើត ជួយឱ្យស្រកទម្ងន់ និងជំនួយដល់សរសៃសក់៕