សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី១៤ ខែធ្នូ ឆ្នាំ២០២៣ ក្នុងសន្និបាតប្រចាំឆ្នាំ នៅវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា (CARDI) បានផ្តល់លទ្ធភាពឱ្យវិទ្យាស្ថាន ត្រូវធ្វើការស្រាវជ្រាវគ្រប់អនុវិស័យទាំងអស់លើបច្ចេកទេស យុទ្ធសាស្ត្រ នយោបាយ និងសេដ្ឋកិច្ច ហើយត្រូវមានកំណត់គោលដៅច្បាស់លាស់ និងយកចិត្តទុកដាក់លើដំណាំសេដ្ឋកិច្ចដែលមានសក្តានុពលសម្រាប់ទីផ្សារ។
ឯកឧត្តម ឌិត ទីណា បានមានប្រសាសន៍ថា CARDI មានវិសាលភាពធំណាស់ក្នុងការស្រាវជ្រាវ និងអភិវឌ្ឍកសិកម្ម ដើម្បីផ្តល់ផលប្រយោជន៍ដល់ប្រជាពលរដ្ឋ ផ្តល់ផលចំណេញដល់កសិករ និងផ្តល់មុខមាត់ដល់ប្រទេសជាតិ តាមរយៈការនាំអង្ករកម្ពុជា ចូលក្នុងទីផ្សារអន្តរជាតិ ជាអាទិ៍អង្ករសែនក្រអូប និងផ្ការំដួល ដែលបានឈ្នះពានអង្ករល្អបំផុតលើសាកលលោក។
ឯកឧត្តមរដ្ឋមន្ត្រី បានគូសបញ្ជាក់ថា ក្នុងអាណត្តិថ្មីនីតិកាលទី៧នេះ CARDI ត្រូវរៀបចំខ្លួនឱ្យមានលទ្ធភាពកំណែទម្រង់ឆ្ពោះទៅរាជបណ្ឌិត្យសភាកសិកម្ម ជាគ្រឹះស្ថានរដ្ឋបាលសាធារណៈ ដែលជាយន្តការ CARDI ត្រូវជំរុញប្រព័ន្ធពូជសុទ្ធសម្រាប់ផលិតកម្មទ្រង់ទ្រាយធំ ហើយ ផ្តោតលើការស្រាវជ្រាវ និងអភិវឌ្ឍន៍ ឱ្យកាន់តែមានប្រសិទ្ធភាព និងគុណភាព។
ឯកឧត្តម ឌិត ទីណា បានលើកឡើងថា ជាគោលនយោបាយ គឺក្រសួងកំពុងធ្វើការងារជាច្រើន ការដាក់ពង្រាយមន្ត្រីផ្សព្វផ្សាយកសិកម្មតាមមូលដ្ឋាន និងសហគមន៍កសិកម្មទំនើបក្នុងការរក្សាស្ថិរភាពតម្លៃ ដែលកសិករអាចបន្តការផលិត ។ ជាចក្ខុវិស័យ គឺយើងនឹងមានធនធានមនុស្សច្រើន និងថវិកា សម្រាប់ជំរុញការស្រាវជ្រាវ និងអភិវឌ្ឍន៍ ព្រមទាំងរចនាសម្ព័ន្ធផ្សេងៗផងដែរ។
ទន្ទឹមនឹងនេះដែរ ការចុះកម្មសិទ្ធិបញ្ញា ក៏ជាការងារចាំបាច់មួយក្នុងកំណត់អត្តសញ្ញាណ ការទទួលស្គាល់ និងគុណតម្លៃនៃពូជស្រូវកម្ពុជា លើឆាកអន្តរជាតិ ដើម្បីទទួលបានតម្លៃបន្ថែម និងផ្តល់ផលចំណេញដល់កសិករ អ្នកផលិត ដូច្នេះត្រូវជំរុញការងារផ្សព្វផ្សាយឱ្យកាន់តែមានប្រសិទ្ធភាព៕
Account
Security
Favourite Content