ភ្នំពេញ ៖ ជារៀងរាល់ឆ្នាំនៅពេលដែលជិតដល់រដូវបុណ្យចូលឆ្នាំថ្មីប្រពៃណីជាតិខ្មែរ ពលករខ្មែរដែលបម្រើការងារនៅប្រទេសថៃ តែងនាំគ្នាត្រឡប់មកស្រុកកំណើតរបស់ខ្លួនដើម្បីជួបជុំគ្រួសារក្នុងឱកាសដ៏រីករាយក្នុង១ឆ្នាំមានតែម្ដងនេះ។ ជាក់ស្ដែង សម្រាប់រដូវបុណ្យចូលឆ្នាំខ្មែរ ឆ្នាំ២០២៥ដែលទើបតែកន្លងផុតទៅនេះ មានពលករខ្មែរជាច្រើនបានសម្រុកមកលេងស្រុកកំណើតក្នុងទឹកដីកម្ពុជា ខណៈអាជ្ញាធរថៃបានប្រកាសលើកលែងតម្លៃសេវាចេញ-ចូល (Re-Entry Permit) ចាប់តាំងពីថ្ងៃទី១ ខែមេសា ដល់ថ្ងៃទី១៥ ខែឧសភា ឆ្នាំ២០២៥។

ការលើកលែងតម្លៃសេវានេះ គឺផ្តល់ជូនតែម្តងប៉ុណ្ណោះសម្រាប់ពលរដ្ឋខ្មែរមានលិខិតឆ្លងដែនពីកម្ពុជាទៅបរទេស (TD) និងមានទិដ្ឋាការការងារ (Non-Immigration L-A Visa) ដែលមានសុពលភាពលើពីថ្ងៃទី១៥ ខែឧសភា ឆ្នាំ២០២៥។ ការលើកលែងនេះក៏បូករួមទាំងកូនក្រោមអាយុ១៨ឆ្នាំ ដែលទទួលបានការវាយត្រាប្រភេទអ្នកក្នុងបន្ទុក និងមានលិខិតអនុញ្ញាតឱ្យស្នាក់នៅក្នុងប្រទេសថៃលើសថ្ងៃទី១៥ ខែឧសភា ឆ្នាំ២០២៥។

ជាការកត់សម្គាល់ ការទទួលយកពលករចំណាកស្រុកត្រូវបានគេមើលឃើញថា ជាគោលនយោបាយសេដ្ឋកិច្ចរបស់ប្រទេសជឿនលឿននានានៅទូទាំងពិភពលោកដែលត្រូវការកម្លាំងពលកម្មជាចាំបាច់ សម្រាប់ទ្រទ្រងដល់ការផលិតក្នុងស្រុករបស់ប្រទសនីមួយៗ។ បច្ចុប្បន្ន ប្រទេសជឿនលឿននៅតំបន់អាស៊ី ដូចជា ជប៉ុន កូរ៉េខាងត្បូង សឹង្ហបុរី រួមទាំងប្រទេសមានការអភិវឌ្ឍកម្រិតមធ្យម ដូចជាប្រទេសថៃជាដើម ត្រូវគេដឹងថាមានតម្រូវការកម្លាំងពកលម្មច្រើនពីប្រទេសកំពុងអភិវឌ្ឍ រួមមានដូចជា ប្រទេសកម្ពុជា ប្រទេសវៀតណាម មីម៉ាន់យ៉ា និងហ្វីលីពីនជាដើម។

យោង​តាម​របាយ​ការណ៍​របស់​ក្រសួង​ការងារ និងបណ្តុះបណ្តាលវិជ្ជាជីវៈ បានឱ្យដឹងថា ​ឆ្នាំ២០២៤ ពលករ​កម្ពុជា​ដែល​កំពុង​ធ្វើការ​នៅ​ប្រទេស ​មាន​ជាង ១​,៣​ លាន​នាក់ ដោយក្នុង​នោះមានប្រមាណ​ ១​,២​ លាន​នាក់​ធ្វើការ​នៅ​ប្រទេស​ថៃ​ , ជាង​ ៤,៥ ​ម៉ឺន​នាក់ ​ធ្វើការនៅ​ប្រទេស​កូរ៉េ​ខាង​ត្បូង, ប្រមាណ​ ២​,​៣​ម៉ឺន​នាក់ធ្វើការ​នៅប្រទេស​ម៉ាឡេស៊ី , ប្រមាណ ​១,១ម៉ឺននាក់​ធ្វើការនៅ​ប្រទេស​ជប៉ុន , ​ជាង​៨​០០ នាក់​ធ្វើការនៅ​សិង្ហបុរី, ជាង​២០០ នាក់ធ្វើករ​នៅ​ហុងកុង ​និង ៤៣​នាក់​នៅ​ប្រទេស​អារ៉ាប៊ី​សាអ៊ូឌីត​។ ​ ចំណែកភ្នាក់ងារ​ជ្រើសរើស​បុគ្គលិក​ឯកជន មាន​ចំនួន​ ​១​៣​៦​ ​ដែល​បាន​ចុះបញ្ជី​ជាមួយ​ក្រសួង​ការងារ​ ក្នុង​នោះ​ ​១​១​៥​ ប៉ុណ្ណោះ ​បាននឹងកំពុង​ដំណើរការ​។​

ជាមួយគ្នានេះ អង្គការអន្តរជាតិ(ILO) បានប៉ាន់ប្រមាណថា មានចំនួនពលករចំណាកស្រុក នៅលើពិភពលោកចំនួនសរុប ១៦៤លាននាក់ ស្មើនឹងជិត៥% នៃកម្លាំងពលកម្មសរុបរបស់ពិពលោក ក្នុងនោះប្រមាណ ១២លាននាក់មកពីតំបន់អាស៊ីអាគ្នេយ៍ និងតំបន់ប៉ាស៊ីហ្វិក។សម្រាប់ប្រទេសកម្ពុជាវិញ បានផ្គត់ផ្គង់កម្លាំងពលកម្ម តាមរយៈគោលនយោបាយអភិវឌ្ឍពលករចំណាកស្រុក មានប្រមាណ ១.៣លាននាក់ ភាគច្រើនបំផុតទៅប្រទេសថៃ៕ វិន ឈុនហ៊ាត