សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រុមហ៊ុន Apsara Media Services (AMS) កាលពីថ្ងៃទី០៣ ខែមេសា ឆ្នាំ២០២៦ បានសហការជាមួយនឹងសមាគមធនាគារនៅកម្ពុជា (ABC) សមាគមមីក្រូហិរញ្ញវត្ថុកម្ពុជា (CMA) និងក្រុមហ៊ុនក្រេឌីត ប្យួរ៉ូ (ខេមបូឌា) (CBC) ដោយមានការគាំទ្រដោយធនាគារជាតិនៃកម្ពុជា (NBC) បានរៀបចំកម្មវិធី វេទិកាចំណេះដឹងផ្នែកហិរញ្ញវត្ថុកម្ពុជា កិច្ចពិភាក្សា កម្មវិធី «វិថីហិរញ្ញវត្ថុ រដូវកាលទី៣» នៅស្រុកបន្ទាយមាស ខេត្តកំពត។
វេទិកានេះមានការចូលរួមពីតំណាង ក្រុមហ៊ុន Apsara Media Services (AMS) សមាគមធនាគារនៅកម្ពុជា (ABC) សមាគមមីក្រូហិរញ្ញវត្ថុកម្ពុជា (CMA) ក្រុមហ៊ុនក្រេឌីត ប្យួរ៉ូ (ខេមបូឌា) (CBC) ព្រមទាំងគ្រឹះស្ថានធនាគារ និងហិរញ្ញវត្ថុ និងកសិករជិត ២០០នាក់ ផងដែរ។
វេទិកានៃកិច្ចពិភាក្សាចំណេះដឹងហិរញ្ញវត្ថុ ក្រោមប្រធានបទ «ការចាត់ចែងទុនសម្រាប់កសិករឱ្យមានប្រសិទ្ធភាព» នេះ ត្រូវបានរៀបចំឡើងក្នុងគោលបំណងប្រមូលផ្តុំតួអង្គគ្រប់ភាគីសំខាន់ៗទាំងអស់ ដើម្បីពង្រឹងចំណេះដឹងផ្នែកហិរញ្ញវត្ថុ និងជំរុញសកម្មភាពអប់រំផ្នែកហិរញ្ញវត្ថុឱ្យបានទូលំទូលាយបន្ថែមទៀតទៅកាន់ប្រជាកសិករ។
កិច្ចពិភាក្សានេះ មានចូលរួមពីវាគ្មិនសំខាន់ៗ រួមមាន លោក ហេង សុវណ្ណ ប្រធាននាយកដ្ឋានព័ត៌មាននៃក្រុមហ៊ុន AMS (អ្នកសម្របសម្រួល) លោក សួរ សុខចំរើន អនុប្រធាននាយកដ្ឋានឥណទាន នៃធនាគារ អភិវឌ្ឍន៍ជនបទ និងកសិកម្ម លោក ស៊ាន ធនិន អគ្គនាយកលក់ និងចែកចាយនៃធនាគារ ហត្ថា លោក ប៉ែន សុវណ្ណសុខស៊ីថា អនុប្រធានប្រតិបត្តិទទួលបន្ទុកផលិតផលធនាគារ KB លោក តែ ម៉េងឆាយ ប្រធានសាខាខេត្តកំពត នៃធនាគារ សហគ្រាសធុនតូច និងមធ្យម កម្ពុជា និង លោក យឹម បុណ្យ កសិករគំរូ។
ជាមួយនេះ ក្នុងកិច្ចពិភាក្សា វាគ្មិនពីភាគីពាក់ព័ន្ធ បានលើកឡើងពីសារៈសំខាន់នៃចំណេះដឹងហិរញ្ញវត្ថុ ដែលផ្ដល់ជាធាតុចូល ក៏ដូចជាចំណេះដឹង ដល់ប្រជាកសិករ ក្នុងការសម្រេចចិត្តប្រកបដោយភាពត្រឹមត្រូវទៅលើការចាត់ចែងទុន ការចេះប្រើកម្ចីប្រកបដោយឆ្លាតវៃ ការគ្រប់គ្រងបំណុល ការៀបចំផែនការហិរញ្ញវត្ថុ និងការសន្សំ ជាពិសេស ជួយឱ្យប្រជាកសិករចៀសវាងពីបំណុលលើសលប់ អាចកសាងសុខសុវត្ថិភាពផ្នែកហិរញ្ញវត្ថុ និងរួមចំណែកដល់ស្ថិរភាពសេដ្ឋកិច្ច។
ព្រឹត្តិការណ៍នេះ បានក្លាយជាវេទិកាជួបជុំមួយក្រោមស្លាកកម្មវិធី «វិថីហិរញ្ញវត្ថុ រដូវកាលទី៣» ដែលអនុញ្ញាតឱ្យស្ថាប័នហិរញ្ញវត្ថុឯកជន ជាតិ-អន្តរជាតិ សមាគម អង្គការសង្គមស៊ីវិល និងសាធារណជន ពិសេសបងប្អូនកសិករ ចូលរួមបានដោយសេរី ដើម្បីផ្លាស់ប្ដូរចំណេះដឹង ពិភាក្សាអំពីបញ្ហាប្រឈម និងស្វែងរកដំណោះស្រាយ។
ជាកិច្ចបញ្ចប់ កម្មវិធីក៏មានការរៀបចំទស្សនកិច្ចទៅកាន់សាលារៀនក្នុងសហគមន៍ ដើម្បីប្រគល់ជូនអំណោយក៏ដូចជា សម្ភារសិក្សាមួយចំនួនដល់ប្អូនៗសិស្សានុសិស្សផងដែរ។
គួររំលឹកឡើងផងដែរថា កម្មវិធី «វិថីហិរញ្ញវត្ថុ» ជាវេទិកាថ្នាក់ជាតិមួយ ដែលត្រូវបានបង្កើតឡើងក្រោមកិច្ចសហការរវាងសមាគមធនាគារនៅកម្ពុជា (ABC) សមាគមមីក្រូហិរញ្ញវត្ថុកម្ពុជា (CMA) ក្រុមហ៊ុន ក្រេឌីតប្យួរ៉ូ ខេមបូឌា (CBC) និងក្រុមហ៊ុន អប្សរា មេឌា ស៊ឺវីស (AMS) ដោយមានការទទួលស្គាល់ពីធនាគារជាតិនៃកម្ពុជា (NBC)។
តាមរយៈវេទិកានេះ កម្ពុជាកំពុងកសាងកិច្ចសហការកាន់តែរឹងមាំ ដើម្បីធានាថា អក្ខរកម្មហិរញ្ញវត្ថុនឹងក្លាយជាការទទួលខុសត្រូវរួម ដែលជាកត្តាជំរុញដ៏សំខាន់សម្រាប់កំណើននៃចំណេះដឹងផ្នែកហិរញ្ញវត្ថុ៕
Account
Security
Favourite Content