ភ្នំពេញ ៖ ស្នាដៃបង្កើតថ្មីរបស់សិស្សនិស្សិតកម្ពុជា ដែលសិក្សានៅក្នុងវិស័យ TVET មានដូចជា ដ្រូន រ៉ូបូត និងឧបករណ៍បច្ចេកទេសទំនើបៗជាច្រើនទៀត នឹងត្រូវដាក់បង្ហាញដល់សាធារណៈជន បានទស្សនា និងស្វែងយល់ នៅក្នុងឱកាស នៃទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៦ ដែលនឹងប្រារព្ធធ្វើនាថ្ងៃទី១៥ និងថ្ងៃទី១៦ ខែមិថុនា ឆ្នាំ២០២៣ ចាប់ពីវេលាម៉ោង៨ព្រឹក ដល់ម៉ោង៨យប់ នៅអគារពិពរណ៌ពាណិជ្ជកម្មកោះពេជ្រ។

ឯកឧត្តម ថង សាម៉ុន អគ្គនាយករង នៃអគ្គនាយកដ្ឋានអប់រំ បណ្តុះបណ្តាលបច្ចេកទេស នៃវិជ្ជាជីវៈ នៃក្រសួងការងារ មានប្រសាសន៍ថា រយៈពេល២ថ្ងៃ នៃទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៦ ឬក៏ TVET DAY នាពេលខាងមុខនេះ នឹងមានកម្មវិធី ក៏ដូចជាការបង្ហាញជាច្រើនទៅដល់អ្នកចូលរួមដូចជា ការបង្ហាញពីវឌ្ឍនភាព នៃវិស័យ TVET, ការបង្ហាញស្នាដៃនិស្សិត TVET ក្នុងការបង្កើតឧបករណ៍ថ្មីៗដូចជា ដ្រូន រ៉ូបូត ឧបករណ៍ទំនើបផ្សេងៗទៀត, ការបង្ហាញពីសិស្សដែលទទួលបានជ័យលាភីក្នុងការប្រកួតប្រជែងជំនាញជាដើម។

ជាមួយគ្នា ក៏មានបង្ហាញផងដែរ ពីគ្រឹះស្ថានបណ្តុះបណ្តាលជំនាញបច្ចេកទេស និងវិជ្ជាជីវៈ ព្រមជាមួយអាហារូបករណ៍ និងភាពជោគជ័យរបស់សិស្សនិស្សិតដែលរៀន TVET និងការបង្ហាញរបស់ក្រុមហ៊ុនសហគ្រាសដែលកំពុងធ្វើការក្នុងវិស័យ TVET ពីខ្សែសង្វាក់ផលិតកម្ម និងតម្រូវការអ្នកបច្ចេកទេសរបស់ពួកគេ។

បន្ថែមពីនេះ ក្នុងរយៈពេល២ថ្ងៃ នៃទិវាជាតិបណ្តុះបណ្តាលបច្ចេកទេស និងវិជ្ជាជីវៈ ក៏មានការនិមន្ត និងអញ្ជើញវាគ្មិនល្បីៗដែលជានិមិត្តរូប ឬ Idol របស់យុវជន សិស្សានុសិស្ស មកធ្វើបាឋកថា ចែករំលែកចំណេះដឹង និងបទពិសោធន៍ផងដែរ ដូចជា ព្រះមេធានុរ័ក្ខបណ្ឌិត គូ សុភាព ព្រះធម្មធរគណរាជធានីភ្នំពេញ និងជាព្រះគ្រូសូត្រស្តាំវត្តនិគ្រោធវ័នគល់ទទឹង ព្រះអង្គនឹងធ្វើបាឋកថា ពីពុទ្ធឱវាទ ពីការអប់រំ ការសិក្សា ឬក៏ជាការលើកទឹកចិត្តដល់យុវជនរៀនជំនាញ ក៏ដូចជាធ្វើជាពលរដ្ឋល្អជាដើម។ បន្ទាប់ពីនោះក៏មានការចូលរួមពីអ្នកឧកញ៉ា គួច ម៉េងលី ដែលក៏នឹងធ្វើបាឋកថា ដោយបង្ហាញយុវជនពីរបៀបសិក្សា និងការជ្រើសរើសជំនាញ ។ វាគ្មិនបន្ទាប់ទៀត គឺលោកគ្រូ ឃឹម សុខហេង ដែលក៏នឹងអញ្ជើញមកធ្វើជាវាគ្មិនចែករំលែកពីសារៈសំខាន់ នៃជំនាញទន់ ឬ Soft Skill ដល់យុវជនក្នុងការបម្រើការងារជាដើម។

ក្រៅពីវាគ្មិនខាងលើ ក៏មានវាគ្មិនពីវិស័យឯកជន ក៏ដូចជាពីគ្រឹះស្ថាន TVET មកចែករំលែកព័ត៌មានពីតម្រូវការបុគ្គលិក ការងារ ក៏ដូចជាជំនាញដែលជាតម្រូវការនាពេលបច្ចុប្បន្ន និងពេលអនាគតផងដែរ។

ជាមួយគ្នានេះ ឯកឧត្តម ថង សាម៉ុន អគ្គនាយករង នៃអគ្គនាយកដ្ឋានអប់រំ បណ្តុះបណ្តាលបច្ចេកទេស នៃវិជ្ជាជីវៈ នៃក្រសួងការងារ និងបណ្តុះបណ្តាលវិជ្ជាជីវៈ ក៏បានធ្វើការអំពាវនាវ និងលើកទឹកចិត្តដល់សាធារណជន ជាពិសេសយុវជន សិស្សានុសិស្សនៅតាមសាលាចំណេះទូទៅ ក៏ដូចជាកម្មករនិយោជិត ទៅចូលរួមនៅថ្ងៃទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ នាថ្ងៃទី១៥ និងថ្ងៃទី១៦ ខែមិថុនា ឆ្នាំ២០២៣ខាងមុខឱ្យបានច្រើន ដើម្បីទទួលបានព័ត៌មានផ្សេងៗអំពីវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ ទាំងព័ត៌មានអាហារូបករណ៍ ក៏ដូចជាព័ត៌មានអំពីកម្មវិធីសិក្សាជាដើម។

សូមបញ្ជាក់ថា ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៦ ឆ្នាំ២០២៣ នឹងប្រារព្ធធ្វើក្រោមប្រធានបទ “TVET ផ្តល់ជំនាញ និងការងារសមរម្យ” ដោយមានការអញ្ជើញជាអធិបតីពីសំណាក់ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា៕