ភ្នំពេញ៖ គ្រឹះស្ថានហិរញ្ញវត្ថុជាសមាជិករបស់សមាគមមីក្រូហិរញ្ញវត្ថុកម្ពុជា បានរួមគ្នាបរិច្ចាគជាថវិកា ព្រមទាំងសម្ភារៈសុខាភិបាលក្នុង «មូលនិធិគាំទ្រកងទ័ពជួរមុខ និងប្រជាជនជម្លៀសពីលំនៅដ្ឋាន» ដើម្បីចូលរួមសម្រាលបន្ទុកដល់បងប្អូនជនភៀសសឹក និងយោធិនដែលកំពុងឈរជើងនៅសមរភូមិមុខ។

តាមរយៈការចូលរួមរបស់គ្រឹះស្ថានសមាជិកបុគ្គលិកក្នុងវិស័យមីក្រូហិរញ្ញវត្ថុ និងសាធារណជន មូលនិធិរបស់សមាគមទទួលបានថវិកាបរិច្ចាគសរុបចំនួន ៦៦​ ៤៤៧, ៧១ដុល្លារអាម៉េរិក (ប្រាំមួយម៉ឺនប្រាំមួយពាន់បួនរយសែសិបប្រាំពីរដុល្លានិងចិតសិបមួយសេន) និងសម្ភារៈសុខាភិបាលចំនួន៦កេស។ មូលនិធិនេះ បង្ហាញពីការប្តេជ្ញាចិត្តរបស់វិស័យមីក្រូហិរញ្ញវត្ថុក្នុងការរួមសុខទុក្ខជាមួយកងទ័ព និងប្រជាជនក្នុងពេលវេលាដ៏លំបាកនេះ។

សមាគមបានបរិច្ចាគថវិកាពីក្នុងមូលនិធិចំនួន ១៣ ០០០ដុល្លារអាម៉េរិកជូនដល់ការផ្តួចផ្តើមសាងសង់​ផ្ទះ​ជូនក្រុមគ្រួសាររបស់យោធិនពលីរបស់លោកជំទាវបណ្ឌិត ពេជ ចន្ទមុនី ហ៊ុន ម៉ាណែត។ ថវិកាចំនួន ១៥ ០០០ដុល្លារអាម៉េរិកទៀតសមាគមបានបរិច្ចាគជូនមូលនិធិព្រំដែនរបស់ធនាគារជាតិនៃកម្ពុជាដើម្បីប្រើប្រាស់ក្នុងយុទ្ធនាការគាំទ្រដល់ជីវភាពរស់នៅរបស់ក្រុមគ្រួសារយោធិនពលី។ សម្រាប់មូលនិធិដែលនៅសល់ សមាគមបានប្រើប្រាស់សម្រាប់ទិញស្បៀង និងបរិច្ចាគជាថវិកាជូនដល់រដ្ឋបាលខេត្តឧត្តរមានជ័យ រដ្ឋបាលខេត្តព្រះវិហារ និងកងពលធំអន្តរាគមន៍លេខ៣ នៃខេត្តព្រះវិហារក្នុងបរិមាណគិតជាទឹកប្រាក់ស្មើគ្នា រួមទាំងសម្ភារៈសុខាភិបាលទទួលបានពីការបរិច្ចាគផងដែរ។

ពិធីប្រគល់ និងទទួលអំណោយដែលធ្វើឡើងនៅ ៣ទីតាំងផ្សេងៗគ្នា ចាប់ពីថ្ងៃទី0១ ដល់ទី0៣ ខែតុលា ឆ្នាំ២០២៥ មានការចូលរួមពីឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តមានជ័យ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ ឧត្តមសេនីយ៍ទោ សំ សៀ មេ​​​បញ្ជា​ការរងកងពលធំអន្តរគមន៍លេខ៣នៃខេត្តព្រះវិហារ លោកជំទាវ ឌិត នីតា ប្រធានក្រុមប្រឹក្សាភិបាល​​សមាគម    មីក្រូហិរញ្ញវត្ថុ តំណាងគ្រឹះស្ថានសមាជិក និងក្រុមការងារសមាគម។ ក្នុងពិធីនេះដែរក៏មានការចូលរួមពីសមាគមធនាគារនៅកម្ពុជាផងដែរ ដែលតំណាងដោយអ្នកស្រី​ ផល ​ឆាមល៍​ធានី​ អគ្គ​លេខា​ធិការ​សមាគមធនាគារនៅកម្ពុជា និងក្រុមការងាររបស់សមាគម ដោយបាននាំយកអំណោយជាស្បៀង អាវភ្លៀង និងអង្រឹងជូនដល់អាជ្ញាធរទាំង៣។

ថ្លែងក្នុងពិធីប្រគល់ និងទទួលអំណោយ លោកជំទាវ ឌិត នីតា បានសង្កត់ធ្ងន់ពីការប្តេជ្ញាចិត្តរបស់សមាគម ក៏ដូចជាវិស័យទាំងមូលក្នុងការចូលរួមចំណែកដល់ការសម្រាលបន្ទុករបស់រាជរដ្ឋាភិបាល និងអនុវត្តវិធានការ សេចក្តីណែនាំ និងបទប្បញ្ញត្តិផ្សេងៗ ដែលដាក់ចេញដោយរាជរដ្ឋាភិបាល និងធនាគារជាតិនៃកម្ពុជា រួមទាំងការរៀបចំឥណទានឡើងវិញដើម្បីសម្រាលបន្ទុករបស់ប្រជាពលរដ្ឋជួបការលំបាក​ផ្នែកហិរញ្ញវត្ថុ បងប្អូនពលករដែលវិលត្រលប់មកពីប្រទេសថៃ កងទ័ពកំពុងប្រតិបត្តិការនៅសមរភូមិមុខ និងយោធិនរងរបួសពីការប៉ះទង្គិចគ្នារវាងកម្ពុជា និងថៃ។ លោកជំទាវបានបន្ថែមថា៖ គ្រឹះស្ថានធនាគារ និងហិរញ្ញវត្ថុជាសមាជិករបស់សមាគមទាំងពីរក៏បានលុបបំណុលទាំងស្រុងជូនដល់ក្រុមគ្រួសារយោធិន​ពលីថែមទៀតផង។

លោកជំទាវ ឌិត នីតា បានមានប្រសាសន៍ថា៖

«វិស័យធនាគារ និងហិរញ្ញវត្ថុ នៅតែប្តេជ្ញាចិត្តក្នុងការជួយលើកកម្ពស់ជីវភាពប្រជាជនតាមរយៈការផ្តល់ដើមទុនដែលមានអត្រាការប្រាក់សមរម្យជូនដល់បងប្អូនប្រជាពលរដ្ឋ។ ទន្ទឹមនឹងនេះដែរ យើងបាន និងកំពុងប្រឹងប្រែងពង្រឹងវិស័យរបស់យើងតាមរយៈការដាក់ចេញវិធានការជាច្រើនរួមទាំងកិច្ចសន្យាឥណទាន ដែលមានលក្ខណៈស្តង់ដារ មានភាពសាមញ្ញ និងតម្លាភាព ការពង្រឹងកិច្ចការពារអតិថិជន ដើម្បីជួយឱ្យវិស័យរីកចម្រើនប្រកបដោយការទទួលខុសត្រូវ និងនិរន្តរភាព»។

នៅក្នុងឱកាសនោះផងដែរ លោកជំទាវក៏បានចុះជួបប្រធានសាខាគ្រឹះស្ថានធនាគារ និងហិរញ្ញវត្ថុ ដែលមានប្រតិបត្តិការក្នុងខេត្តបន្ទាយមានជ័យ ឧត្តមានជ័យ និងខេត្តព្រះវិហារ ដើម្បីស្វែងយល់ពីផលប៉ះពាល់ បញ្ហាប្រឈម តម្រូវការ និងសំណូមពរនានារបស់គ្រឹះស្ថាន និងអតិថិជន ហើយលោកជំទាវ ក៏បានសង្កត់ធ្ងន់នូវភាពចាំបាច់ក្នុងរក្សាឱ្យបាននូវក្រមសីលធម៌ វិជ្ជាជីវៈ និងកិច្ចការពារអតិថិជនដើម្បីធានាបាននូវនិរន្តភាពរបស់វិស័យ។

សមាគមមីក្រូហិរញ្ញវត្ថុកម្ពុជា និងគ្រឹះស្ថានសមាជិកប្តេជ្ញាចូលរួមឱ្យអស់ពីពលទ្ធភាព គាំទ្រកងទ័ពកម្ពុជាក្នុងបេសកកម្មការពារបូរណភាពទឹកដី និងសម្រាលបន្ទុកដល់បងប្អូនជនភៀសសឹក៕