សៀមរាប៖ ពិព័រណ៍ផលិតផលខ្មែរ និងបន្លែផ្លែឈើ លើកទី១៨ ក្រោមមូលបទ «បង្កើនតម្លៃបន្ថែមនៃអាជីវកម្មបន្លែផ្លែឈើ» ត្រូវបានរៀបចំឡើងចាប់តាំងពីថ្ងៃទី២៧ ខែកុម្ភៈ ដល់ថ្ងៃទី២ ខែមីនា ឆ្នាំ២០២៥ នៅខេត្តសៀមរាប ដោយមានក្រុមហ៊ុន សហគ្រាស អាជីវករ ផលិតផលករ សហគមន៍ អ្នកដាំដុះ ចូលរួមចំនួន ៨៨ និងមានស្តង់ចំនួន ១១១ ស្តង់។ នៅក្នុងព្រឹត្តិការណ៍ពិព័រណ៍នេះក៏បានផ្តល់ឱកាសក្នុងការបង្កើតភាពជាដៃគូអាជីវកម្មរវាងសហគមន៍កសិកម្ម ម្ចាស់កសិដ្ឋាន អ្នកដាំបន្លែ និងផ្លែឈើ ក៏ដូចជាអ្នកចែកចាយ អ្នកលក់ដុំ អ្នកលក់រាយ អ្នកកែច្នៃ និងម្ចាស់អាជីវកម្ម។

ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានថ្លែងថា  ព្រឹត្តិការណ៍ពិព័រណ៍នេះ គឺជាផ្នែកមួយដ៏សំខាន់នៃការអនុវត្តគោលនយោបាយអភិវឌ្ឍន៍វិស័យពាណិជ្ជកម្មរបស់ក្រសួងពាណិជ្ជកម្ម ប្រៀបបាននឹងសំឡេងជួង ដាស់ស្មារតីប្រជាជនកម្ពុជាឱ្យងាកមកចូលរួមគាំទ្រ និងប្រើប្រាស់ផលិតផលក្នុងស្រុកជំនួសទំនិញនាំចូលពីបរទេស ។

ឯកឧត្តមរដ្ឋលេខាធិការ បានគូសបញ្ជាក់ថា ការរៀបចំព្រឹត្តិការណ៍ពិព័រណ៍នេះ គឺមានសារៈសំខាន់ និងបានជះផលវិជ្ជមានផងដែរ ដោយបានបង្កើនសកម្មភាពពាណិជ្ជកម្ម និងការទាក់ទាញភ្ញៀវទេសចរជាតិ និងអន្តរជាតិ ដែលនឹងចូលរួមជំរុញសេដ្ឋកិច្ចមូលដ្ឋាន ពោលគឺក្នុងមូលដ្ឋានខេត្តសៀមរាប ដែលនឹងចូលរួមជំរុញកំណើនសេដ្ឋកិច្ចជាតិជារួម។ តាមរយៈការរៀបចំពិព័រ​ណ៍ផលិតផលខ្មែរ និងបន្លែផ្លែឈើចំនួន១៧លើកកន្លងមកនេះ បានជួយពង្រឹងខ្សែច្រវាក់ផលិតកម្មក្នុងស្រុកជាបណ្តើរៗ ហើយផលិតករកម្ពុជាក៏មានចំណេះដឹង ចំណេះធ្វើ និងទទួលបានបទពិសោធន៍ល្អៗជាច្រើន សម្រាប់ពង្រឹង និងពង្រីកផលិតកម្ម អភិវឌ្ឍន៍ផលិតផល និងសេវារបស់ខ្លួនបម្រើឱ្យទីផ្សារ។

ឯកឧត្តមរដ្ឋលេខាធិការ បន្តថា ក្រសួងពាណិជ្ជកម្ម បានបន្តខិតខំប្រឹងប្រែងអនុវត្តនូវតួនាទីភារកិច្ច និងបេសសកម្មរបស់ខ្លួនឱ្យមានប្រសិទ្ធភាព និងប្រសិទ្ធផល ដើម្បីជំរុញកំណើនការងារ សមធម៌ កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ របស់រាជរដ្ឋាភិបាលអាណត្តិទី៧ ដោយធ្វើឱ្យប្រសើរឡើងនូវបរិយាកាសធុរកិច្ចដល់ធុរជន និងវិនិយោគិន តាមរយៈយន្តការសំខាន់ៗ រួមមាន៖

១- កិច្ចសម្រួលពាណិជ្ជកម្ម៖ ការធ្វើសមាហរណកម្មសេវាកម្មពាក់ព័ន្ធនឹងពាណិជ្ជកម្ម ដូចជា ការបញ្ចូលការចុះបញ្ជីពាណិជ្ជកម្មទៅក្នុងថ្នាលផ្លាស់ប្តូរទិន្នន័យកម្ពុជា (CamDX) និងការចេញវិញ្ញាបនបត្របញ្ជាក់ដើមកំណើតទំនិញទៅក្នុងប្រព័ន្ធបញ្ជារតែមួយជាតិ (NSW) ដើម្បីលើកកម្ពស់ឌីជីថលូបនីយកម្មលើការផ្តល់សេវាសាធារណៈរបស់ក្រសួងពាណិជ្ជកម្ម, ការដាក់ឱ្យដំណើរការនូវមជ្ឈមណ្ឌលសេវានាំចេញ, ថ្នាលព័ត៌មានកិច្ចព្រមព្រៀងពាណិជ្ជកម្មសេរី (FTA Portal) និងការបង្កើតក្រុមការងារជំរុញការនាំចេញ ដែលមានតួនាទីពិនិត្យ និងស្វែងយល់ពីនិន្នាការទីផ្សារថ្មីៗ ដើម្បីពង្រឹងសមត្ថភាព និងជំរុញការនាំចេញរបស់កម្ពុជាទៅកាន់ទីផ្សារពិភពលោក។

២- ការធ្វើពិពិធកម្មទីផ្សារ៖ កម្ពុជាជាប្រទេសសមាជិកអាស៊ាន ដែលជាប្រទេសហត្ថលេខីនៃកិច្ចព្រមព្រៀងពាណិជ្ជកម្មសេរីអាស៊ាន កិច្ចព្រមព្រៀងពាណិជ្ជកម្មសេរីអាស៊ានជាមួយដៃគូ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) កិច្ចព្រមព្រៀងពាណិជ្ជកម្មទ្វេភាគីកម្ពុជា-ចិន កម្ពុជា-សាធារណរដ្ឋកូរ៉េ និងកិច្ចព្រមព្រៀងភាពដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាត់អារ៉ាប់រួម(CEPA)។ ក្រសួងពាណិជ្ជកម្ម បាន និងកំពុងបន្តធ្វើពិពិធកម្មទីផ្សារដោយចរចាបើកទីផ្សារថ្មីៗបន្ថែមទៀតផងដែរ។

៣. ការកសាងច្បាប់ និងបទប្បញ្ញត្តិ៖ ក្រសួងបានពិនិត្យឡើងវិញនូវច្បាប់ និងបទប្បញ្ញត្តិជាធរមាន ដើម្បីវាយតម្លៃពីភាពពាក់ព័ន្ធលើពាណិជ្ជកម្មក្នុងប្រទេស និងបរិយាកាសធុរកិច្ច ជាពិសេសអនុលោមភាពជាមួយនឹងច្បាប់អន្តរជាតិ និងបានដាក់ចេញជាអាទិភាពក្នុងការធ្វើបច្ចុប្បន្នភាព និងការវិសោធនកម្មច្បាប់ទាំងនោះ។

ឯកឧត្តមរដ្ឋលេខាធិការ ក៏បានជំរុញដល់ផលិតករ ពាណិជ្ជករ និងអាជីវករកម្ពុជាទាំងអស់ ត្រូវខិតខំបង្កើតគំនិតច្នៃប្រឌិតថ្មីៗបន្ថែមទៀត និងរៀបចំទំនិញសម្រាប់តម្រូវការទីផ្សារ ដោយត្រូវពង្រឹងគុណភាព សោភ័ណភាព និងសុវត្ថិភាពផលិតផល អនុលោមតាមស្តង់ដារអនាម័យ និងមានតម្លៃសមរម្យ នោះទើបអាចចូលរួមប្រកួតប្រជែងក្នុងទីផ្សារសេរីបាន៕