សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ភូមិប្រដាក ឬព្រះដាក់ ត្រូវបានរដ្ឋបាលខេត្តសៀមរាប សម្រេចជ្រើសរើសជាបេក្ខភាពប្រកួតប្រជែង “ភូមិទេសចរណ៍ឆ្នើម“ដោយជ្រើសរើសភូមិព្រះដាក់ ជាភូមិទេសចរណ៍ល្អបំផុតមួយក្នុងចំណោមភូមិទេសចរណ៍ចំនួន៨ផ្សេងទៀតមកពីខេត្តនានារបស់កម្ពុជា ដើម្បីដាក់ជាបេក្ខភាពប្រកួតប្រជែងភូមិទេសចរណ៍ឆ្នើមប្រចាំឆ្នាំ២០២៤របស់អង្គការទេសចរណ៍ពិភពលោក (UNWTO)។
គោលបំណងនៅក្នុងស្តង់ដារ «ភូមិទេសចរណ៍ឆ្នើម» មាន៤ចំណុចធំៗ ទី១-ការអភិវឌ្ឍផលិតផលទេសចរណ៍ សំដៅដល់ការជំរុញទាក់ទាញទីផ្សារទេសចរណ៍ក្នុងស្រុក និងអន្តរជាតិ ទាំងក្នុង និងក្រោយវិបត្តិជំងឺកូវីត-១៩ ។ ទី២-ការអភិវឌ្ឍភូមិទេសចរណ៍អាចទាក់ទាញទេសចរក្នុងស្រុក ទាំងទេសចរអន្តរជាតិឱ្យទស្សនា និងកម្សាន្តនៅតាមជនបទ ដែលអាចបង្កើតការងារ និងចំណូលបន្ថែមដល់ប្រជាពលរដ្ឋតាមមូលដ្ឋាន ដែលជាកត្តាជួយកាត់បន្ថយភាពក្រីក្រនៅជនបទ ស្របតាមគោលនយោបាយជាតិអភិវឌ្ឍន៍ទេសចរណ៍ ។ ទី៣- ផលបានមកពីការអភិវឌ្ឍ គឺអាចឱ្យពលរដ្ឋរួមចំណែកក្នុងការអភិរក្សវប្បធម៌ និងធម្មជាតិ និងចំណុចទី៤ ដោយសារការងារ និងចំណូលបានមកពីវិស័យកសិ-ទេសចរណ៍ យើងអាចទទួលជោគជ័យដល់កិច្ចគាំពារដល់បរិស្ថាន ព្រមទាំងជីវៈចម្រុះផងដែរ ។
លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានប្រាប់ AMS Economy ថា ភូមិព្រះដាក់ដែលត្រូវបានដាក់ជាបេក្ខភាពប្រកួតប្រជែងភូមិទេសចរណ៍ល្អបំផុតប្រចាំឆ្នាំ២០២៤ របស់អង្គការទេសចរណ៍ពិភពលោក UNWTO ឃើញថា នៅមានភូមិដទៃផ្សេងៗជាច្រើនទៀតដែលអាចចូលរួមការប្រកួតប្រជែងថ្នាក់អន្តរជាតិ អាចឱ្យកម្ពុជាធ្វើការផ្សព្វផ្សាយពីវិស័យទេសចរណ៍តាមរយៈការបង្ហាញនូវវប្បធម៌ ធម្មជាតិ និងប្រពៃណីទៅកាន់សកលលោក ។
លោកជំទាវ ឆាយ ស៊ីវលីន ក៏បានអំពាវនាវដល់អ្នកពាក់ព័ន្ធ តំបន់ ក្រុង ខេត្ត ស្រុក ដែលមានភូមិ ឃុំស្អាតល្អ ជួយចូលរួមគាំទ្រដល់ការបង្កើតហេដ្ឋារចនាសម្ព័ន្ធ ដោយបង្កើតឯកសារ ចូលរួមការប្រកួតប្រជែង ទោះបីជាមិនបានជាប់ជាភូមិទេសចរណ៍ឆ្នើម ក៏ត្រូវរៀបចំភូមិឱ្យបានស្អាតល្អ ក៏ដូចជាការជួយផ្សព្វផ្សាយថា កម្ពុជានៅមានភូមិស្អាតល្អជាច្រើនផ្សេងទៀត សម្រាប់ភ្ញៀវទេសចរដែលមកកម្សាន្ត ក៏ដូចជាការអភិវឌ្ឍសេដ្ឋកិច្ចមូលដ្ឋានតាមបណ្តាភូមិនានាទូទាំងប្រទេស ការផ្តល់ថវិកាបដិភាគ ដើម្បីអភិវឌ្ឍន៍សហគមន៍ទេសចរណ៍នៅតំបន់ដាច់ស្រយាលឱ្យកាន់តែរីកចម្រើន និងការជំរុញឱ្យមានការនាំចេញនៅនឹងកន្លែងពីប្រជាកសិករខ្មែរផ្ទាល់តែម្តង ។
ប្រតិបត្តិកររមណីយដ្ឋាន លោកបណ្ឌិត អៀង សុធារ៉ា មហាឧបាសកពុទ្ធសាសនូបត្ថម្ភក៏បានថ្លែងឱ្យដឹងថា បរិយាកាសនៃការអភិវឌ្ឍន៍ជំនួញបែបជំនួញរមណីយដ្ឋាននៅកម្ពុជា អាចដំណើរការបានមកពីកត្តាមានសន្តិភាព ដែលបានមកពីការខិតខំប្រឹងប្រែងរបស់រាជរដ្ឋាភិបាល និងការចូលរួមរបស់ប្រជាពលរដ្ឋ ។ បានសេចក្តីថា គ្រប់មុខរបររកស៊ីទាំងអាជីវកម្ម ភោជនីយដ្ឋាន រមណីយដ្ឋាន ដែលនាំមកនូវសេចក្ដីសុខសប្បាយ ព្រោះជាសមិទ្ធផលមួយដែលកើតឡើងដោយសារកត្តាសន្តិភាព និងសេចក្តីសុខ។
លោកបណ្ឌិត អៀង សុធារ៉ា បានបញ្ជាក់ថា ជំនួញបែបរមណីយដ្ឋាន ដែលមានលក្ខណៈគួរជាទីរីករាយមនោរម្យ អាចជាអាជីវកម្មលក់រាយ ដែលទាក់ទាញភ្ញៀវទេសចរ ព្រោះជាទីកន្លែងដែលអាចទទួលភ្ញៀវមកកម្សាន្តបាន ទោះបីជាដីភូមិ ចម្ការ ដែលពលរដ្ឋ ឬប្រជាសហគមន៍កំពុងរស់ក្តី គឺអាចបំប្លែងទៅជាកន្លែងរមណីយដ្ឋាន រកប្រាក់ចំណេញបាន ហើយនៅតែអាចបើកបាន ពោលគឺកែច្នៃយ៉ាងណាអាចឆ្លើយតបទៅនឹងការចង់បាន និងតម្រូវការទីផ្សារទេសចរណ៍។
ភូមិព្រះដាក់ ជាភូមិមួយក្នុងចំណោមភូមិទាំង ៦ របស់ឃុំព្រះដាក់ ស្រុកបន្ទាយស្រី ខេត្តសៀមរាប។ ភូមិនេះមានការអភិវឌ្ឍលើវិស័យទេសចរណ៍ ហើយអ្នកទេសចរក្នុងស្រុក និងអន្តរជាតិតែងតែនិយមមកទស្សនា ដោយសារតែមានលក្ខណៈពិសេស ប្លែកពីភូមិដទៃ ជាពិសេសបានរក្សានូវមុខរបបចិញ្ចឹមជីវិតតពីដូនតា តពីបុរាណ និងជាភូមិដែលមានផ្លូវឆ្លងកាត់ឆ្ពោះទៅកាន់ប្រាសាទបន្ទាយសំរ៉ែ ប្រាសាទបន្ទាយស្រី និងឧទ្យានជាតិភ្នំគូលេនជាដើម ដែលជាទីតាំងទេសចរណ៍ដ៏ទាក់ទាញ និងក្លាយជាភូមិទេសចរណ៍បេតិកភណ្ឌដ៏អស្ចារ្យសម្រាប់ទេសចរជាតិ និងអន្តរជាតិ ឈ្វេងយល់ពីវប្បធម៌រស់នៅប្រចាំថ្ងៃរបស់ប្រជាពលរដ្ឋ។
សូមជម្រាបថា ក្រសួងទេសចរណ៍ បង្កើតកម្មវិធីជ្រើសរើសភូមិទេសចរណ៍ឆ្នើម ដោយទទួលបានការឯកភាពពីសម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា នីតិកាលទី៦ នៃរដ្ឋសភា កាលពីខែកក្កដា ឆ្នាំ២០២១ និងរៀបចំនូវសេចក្តីព្រាងស្តង់ដារ «ភូមិទេសចរណ៍គំរូ» គឺក្រោមគំនិតផ្តួចផ្តើមចំនួន ២ ពោលគឺទី១ គឺអង្គការទេសចរណ៍ពិភពលោក (UNWTO) និងទី២ គឺយោងទៅតាមគោលនយោបាយទេសចរណ៍ជាតិក្នុងការអភិវឌ្ឍនូវកសិ-ទេសចរណ៍ ដែលជាគោលដៅយុទ្ធសាស្ត្រនៅក្នុង «ផែនទីចង្អុលផ្លូវ» របស់រាជរដ្ឋាភិបាល ស្តីពីផែនការស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ-១៩ ។
ការបង្កើតភូមិទេសចរណ៍ ឬជាសហគមន៍ទេសចរណ៍មួយដ៏រឹងមាំ គឺការកសាងហេដ្ឋារចនាសម្ព័ន្ធនៅតំបន់សក្ដានុពលទេសចរណ៍ ដើម្បីធ្វើយ៉ាងណាឱ្យសហគមន៍អាចទាញប្រយោជន៍ ពីសក្ដានុពលទេសចរណ៍ដែលមានស្រាប់ ដើម្បីទាក់ទាញភ្ញៀវទេសចរឱ្យមកទស្សនាភូមិ ឃុំរបស់ខ្លួន និងបានផ្តល់នូវសេវាកម្មសម្រាប់ភ្ញៀវ ដែលចូលចិត្តដើរទស្សនាកម្សាន្តបែបអេកូទេសចរណ៍ ហើយសហគមន៍ក៏នឹងទទួលផលពីរមណីយដ្ឋានធម្មជាតិទាំងនោះត្រឡប់មកវិញ៕
Account
Security
Favourite Content