នាព្រឹកថ្ងៃទី៤ ខែវិច្ឆិកា ឆ្នាំ២០២៤នេះ សមាគមមីក្រូហិរញ្ញវត្ថុកម្ពុជាបានរៀបចំនូវសន្និសីទប្រចាំឆ្នាំ ក្រោមប្រធានបទ និរន្តរភាព និងបរិយាបន្នមីក្រូហិរញ្ញវត្ថុ «បច្ចុប្បន្នភាព និងដំណើរវិវឌ្ឍន៍នៃ​វិស័យ»។

មិនខុសគ្នាប៉ុន្មានពីឆ្នាំមុនៗ សន្និសីទមីក្រូហិរញ្ញវត្ថុក្នុងឆ្នាំនេះ ប្រព្រឹត្តទៅដោយប្រមូលផ្តុំនូវអ្នកបង្កើត​គោលនយោបាយ សេដ្ឋវិទូ ថ្នាក់ដឹកនាំគ្រឹះស្ថានធនាគារ និងមីក្រូហិរញ្ញវត្ថុ ថ្នាក់ដឹកនាំអាជីវកម្ម ​និងអង្គ​ការ​ជាដៃគូ ដើម្បីពិភាក្សា​អំពីនិន្នាការ បញ្ហាសំខាន់ៗពាក់ព័ន្ធនឹងការអភិវឌ្ឍ និងកំណើននៃវិស័យ​មីក្រូ​ហិរញ្ញ​វត្ថុនៅកម្ពុជា។

លោកជំទាវ ឌិត នីតា ប្រធានសមាគមមីក្រូហិរញ្ញវត្ថុកម្ពុជាបានថ្លែងក្នុងឱកាសសន្និសីទនេះថា ៖ និរន្ដរភាព និងបរិយាបន្ននៃវិស័យមីក្រូហិរញ្ញវត្ថុ មានសារៈសំខាន់​ក្នុងការ​ធានា​ឱ្យបានថា ប្រជាជន កម្ពុជាគ្រប់រូបទទួលបាននូវផ្លែផ្កាពីកំណើនសេដ្ឋកិច្ច ជាពិសេស​ប្រជាជនដែលរស់នៅតាមតំបន់ ជនបទ និងតំបន់ដែលជួបការលំបាកតាមរយៈ​ការប្រើប្រាស់​នូវសេវា និងផលិតផលហិរញ្ញវត្ថុ។ ប្រជាជនកម្ពុជាប្រមាណ ៧៤.៤% រស់នៅតំបន់ជនបទ ហើយមានលទ្ធភាពនៃការទទួលបាននូវសេវាកម្ម ហិរញ្ញវត្ថុរបស់ពួកគាត់គឺនៅមានកម្រិតនៅទ្បើយ។ ដូច្នេះ វិស័យមីក្រូហិរញ្ញវត្ថុ បាន និងកំពុងបំពេញចន្លោះខ្វះខាតទាំងនេះតាមរយៈការផ្តល់ឱ្យ​បុគ្គលម្នាក់ៗ និងម្ចាស់អាជីវកម្មខ្នាតតូច និងមធ្យមនានា នូវលទ្ធភាពទទួលបានប្រភពទុន​ដែលចាំបាច់។

បើតាមប្រសាសន៍របស់លោកជំទាវប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា  បរិយាកាសពិភពលោកបានបង្កផលប៉ះពាល់មកលើសេដ្ឋកិច្ច​កម្ពុជា និងបន្តប៉ះពាល់ដល់ប្រាក់​ចំណូល​របស់ពលរដ្ឋដែលជាអតិថិជនរបស់គ្រឹះស្ថានមីក្រូ​ហិរញ្ញវត្ថុ។

ជាក់ស្ដែង យោងតាមរបាយការណ៏របស់សមាគម ក្នុងត្រីមាសទី៣ ឆ្នាំ២០២៤ ឃើញថា ឥណទាន​ប្រឈមហានិភ័យលើសពី៣០ថ្ងៃ (PAR 30+) ក្នុងវិស័យមីក្រូហិរញ្ញវត្ថុ បានកើនឡើងពី ៥,៩% ដល់ ៨,៧%, ការរៀបចំឥណទានឡើងវិញកើនឡើងពី ២,០% ដល់ ៣,៨%, កម្ចីដែលលុបចោលកើន​ឡើង​ពី ០,៨% ដល់ ១,២% ធៀបនឹងត្រីមាសទី៤ ឆ្នាំ២០២៣។ ក្រៅពីនេះ ផលប័ត្រឥណទានមាន​កំណើនត្រឹម១%ប៉ុណ្ណោះ ដោយមានកំណើនពី ៥១០៣លានដុល្លារ មកដល់ ៥១៥៣លានដុល្លារ។

ដើម្បីដោះស្រាយនូវបញ្ហានេះ រាជរដ្ឋាភិបាលកម្ពុជា និងធនាគារជាតិ​នៃកម្ពុជាបានផ្តល់ការលើកទឹក​ចិត្ត និងសម្រួលផ្នែកបទបញ្ញាត្តិផ្សេងៗ ដើម្បីគ្រឹះស្ថានផ្តល់នូវ​ការរៀបចំឥណទានទ្បើងវិញជូន​អតិថិជន​ដែលមានបញ្ហាផ្នែកហិរញ្ញវត្ថុ។

យ៉ាងណាក៏ដោយ ការណ៍នេះអាចជួយដោះស្រាយបានត្រឹមតែក្នុងរយៈពេល​ខ្លី​ប៉ុណ្ណោះ សម្រាប់​រយៈពេល​វែង ការរក្សាបាននូវភាពគ្រប់គ្រាន់នៃអនុបាតដើមទុន សន្ទនីយភាព ការមាន​ផែនការ​អាជីវកម្ម​​ច្បាស់លាស់ នឹងចូលរួមចំណែកយ៉ាងសំខាន់ក្នុងការដោះស្រាយនូវបញ្ហា​ប្រឈមនេះ និងរក្សានិរន្តរ​ភាពនៃប្រតិបត្តិការរបស់គ្រឹះស្ថានក៏ដូចជាវិស័យទាំងមូល។

លោកជំទាវបន្តសង្កត់ធ្ងន់ថា៖

«ទោះបីជាយើងទទួលរងនូវបញ្ហាប្រឈមទាំងនេះក៏ដោយ ក៏យើងនៅតែសម្លឹងឃើញឱកាស​យ៉ាងច្រើន​សម្រាប់វិស័យ ដែលក្នុងនោះរួមានឱកាសក្នុង​ផ្នែកឌីជីថល និងផ្នែកហិរញ្ញប្បទាន​បៃតង ហើយយើងជួបជុំគ្នានៅថ្ងៃនេះ គឺដោយសារការជឿជាក់​ទៅលើវិស័យមីក្រូហិរញ្ញវត្ថុដែលជាកំលាំងក្នុង​ការផ្លាស់ប្តូរជាវិជ្ជមានទៅលើជីវភាពរស់​នៅរបស់ប្រជាជន»។

យោងតាមការព្យាកររបស់មូលនិធិរូបិយវត្ថុអន្តរជាតិ កំណើនសេដ្ឋកិច្ចពិភពលោកនឹងកើនឡើងក្នុង​កម្រិត ៣,២% នៅឆ្នាំ២០២៤ ក្នុងនោះសេដ្ឋកិច្ចប្រទេសអភិវឌ្ឍន៍ត្រូវបានព្យាករថា នឹងកើនឡើង ១,៧% ប្រទេសកំពុងលូតលាស់ និងកំពុងអភិវឌ្ឍន៍មានកំណើន ៤,៣% និងសេដ្ឋកិច្ចប្រទេស​អាស៊ានកើនឡើង ៤,៥%។

ស្ថិតនៅក្នុងបរិការណ៍នៃកំណើនសេដ្ឋកិច្ចក្នុងល្បឿនយឺតជា​សកលនេះ សេដ្ឋកិច្ចប្រទេសកម្ពុជា​ឆ្នាំ២០២៤ ក៏បានរងនូវផលប៉ះពាល់ និងមានការថមថយនៃ​កំណើនសេដ្ឋកិច្ចដែរ ដោយកើនឡើង ៦%។ មិនត្រឹមតែប៉ុណ្ណោះ ក្នុងដំណាក់កាលនៃការងើបឡើងវិញនៃសេដ្ឋកិច្ច ធនាគារជាតិនៃកម្ពុជា បាន និងកំពុងបន្តរក្សា​ស្ថិរភាពនិង លើកកម្ពស់ការប្រើប្រាស់ប្រាក់រៀល អនុវត្តគោលនយោបាយ​រូបិយវត្ថុសមស្រប ពង្រឹងសុខុមាលភាពប្រព័ន្ធធនាគារ អភិវឌ្ឍប្រព័ន្ធទូទាត់ ពង្រឹងកិច្ចការពារ​អតិថិជន និងសុវត្ថិភាព​ហិរញ្ញវត្ថុ ព្រមទាំងផ្តោតការយកចិត្តទុកដាក់ខ្ពស់​លើឥណទាន​ប្រកបដោយ​ភាពទទួលខុសត្រូវជាដើម។

គួរបញ្ជាក់ថា គិតត្រឹមខែសីហា ឆ្នាំ២០២៤ វិស័យមីក្រូហិរញ្ញវត្ថុ មានទ្រព្យសកម្មចំនួន ២៥ ទ្រីលានរៀល (ស្មើនឹង ៦,២ ប៊ីលានដុល្លារអាមេរិក) ដោយបានផ្តល់ឥណទានជូនអតិថិជនចំនួន ២១,៣ ទ្រីលានរៀល (ស្មើនឹង ៥,២ ប៊ីលានដុល្លារអាមេរិក) និងមានគណនីឥណទានចំនួន ១,៦ លាន គណនី៕