រយៈពេល៩ខែ ឆ្នាំ២០២៣នេះ កម្ពុជាបាននាំចេញទំនិញទៅកាន់បណ្ដាប្រទេសសមាជិក​កិច្ចព្រម​ព្រៀង​ភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​តំបន់​ RCEP (Regional Comprehensive Economic Partnership) មានទឹកប្រាក់ ៥,៨១ពាន់លានដុល្លារ កើនឡើង២៣%។ នេះបើតាមរបាយការណ៍របស់​ក្រសួងពាណិជ្ជកម្ម។

របាយការណ៍​ដដែល​បានបញ្ជាក់ទៀតថា ចន្លោះ​ពី​ខែមករា ដល់​ខែកញ្ញា ឆ្នាំ២០២៣ កម្ពុជា​បាន​នាំចេញ​ទំនិញ​មានតម្លៃប្រមាណ ៥ ៨១៣លានដុល្លារ កើនឡើង២៣,៥៩​ ភាគរយ​ពី​ចំនួន ៤,៧ ​ពាន់​លាន​ដុល្លារ​នា​រយៈពេល​ដូចគ្នា​ឆ្នាំ​២០២២​។ ចំណែកបណ្តាប្រទេសសមាជិក RCEP នាំចូលមកកាន់​កម្ពុជាវិញមានទឹកប្រាក់ ១៦ ០០០លានដុល្លារ ថយចុះចំនួន១៧,៣៦ ​ភាគរយ ពី​ចំនួន ១៩,៣៦​ ពាន់​លាន​ដុល្លារ។ ដោយឡែកសម្រាប់​ទំហំពាណិជ្ជកម្មរបស់កម្ពុជាជាមួយ RCEP ក្នុងរយៈពេល៩ខែ ឆ្នាំ២០២៣នេះ មានទឹកប្រាក់ចំនួន ២១ ៨១៣លានដុល្លារ ថយចុះ ៩,៣៦ ​ភាគ​​រយ​ពី ២៤,០៧​ ពាន់​លាន​ដុល្លារ​។

សម្រាប់ទំនិញកសិផលរបស់កម្ពុជាឯណោះវិញ រយៈពេល៩ខែ ឆ្នាំ២០២៣នេះ បាននាំចេញ​ប្រមាណជាង ៥.៥លានតោនទៅកាន់​ទីផ្សារ​អន្តរ​ជាតិប្រមាណ ៧១ប្រទេស ដោយទទួល​បានចំណូលជាង ៣ ២១៣លានដុល្លារ។ នេះបើយោងតាមរបាយការណ៍ស្តីពីស្ថានភាព​នៃការនាំ​ចេញកសិផលក្នុងរយៈពេល៩ខែឆ្នាំ២០២៣ របស់ក្រសួងកសិកម្ម។

​របាយការណ៍បានឱ្យដឹងទៀតថា ក្នុងចំណោមកសិផលដែលបាននាំចេញទាំងជាង ៥លានតោននេះ មានការនាំចេញអង្ករចំនួនជាង ៤៥ម៉ឺនតោន ស្រូវចំនួនជាង ១.៨លានតោន និងកសិផល​ក្រៅពី​ស្រូវ-អង្ករចំនួនជាង ៣.៣ លានតោន ដោយបាននាំចេញទៅកាន់ ៧១ប្រទេស ថយចុះចំនួន​ជាង ១៣%។

​ចំណែកតម្លៃ​ដែលទទួលបានពីការនាំចេញកសិផលសរុបមានចំនួនជាង ៣ ២១៣ លានដុល្លារ​អាមេរិក ក្នុងនោះ​នាំចេញអង្ករទទួលបានថវិកាជិត ៣៩៥ លានដុល្លារអាមេរិក ​ការនាំចេញស្រូវ​ទទួលបានជាង ៦៥៨លានដុល្លារអាមេរិក និង​ការនាំចេញកសិផលក្រៅពីស្រូវ-អង្ករ មានជិត ២ ១៦០ លានដុល្លារអាមេរិក។

ក្នុងវិស័យកសិ-ឧស្សាហកម្មឯណោះវិញ រយៈពេល៩ខែ ឆ្នាំ២០២៣ កម្ពុជាទទួលបានចំណូលជាង ៣២១លានដុល្លារ ពីការនាំចេញជ័រកៅស៊ូ និងឈើកៅស៊ូ។ នេះបើតាមរបាយការណ៍ របស់អគ្គ​នាយកដ្ឋានកៅស៊ូ។ ក្នុងនោះ ចំណូលពីការនាំចេញជ័រកៅស៊ូ រយៈពេល៩ខែនេះ មានចំនួន ៣២០ ៦១៩ ៣៤៦ដុល្លារ ចំណែកការនាំចេញឈើកៅស៊ូមានចំនួន១ ៣០៥ ៩៨១ដុល្លារ។

ក្នុងរយៈពេលដូចគ្នានេះដែរ កម្ពុជា​ទទួលបានចំណូលចំនួន ​៤០០​លាន​​ដុល្លារ​អាមេរិក​ ពីការ​នាំចេញកង់​ទៅកាន់ទីផ្សារ​អន្តរជាតិ​ ប៉ុន្តែធៀបនឹង​រយៈ​ពេល​ដូច​គ្នា​កាលពីឆ្នាំ ២០២២​កន្លងទៅ​ឃើញថា​មានការ​ថយចុះ​ប្រមាណ ​៤២,៨៥ ​ភាគរយ ។

បើតាមលោក ប៉ែន សុវិជាតិ រដ្ឋ​លេខាធិការ​ក្រសួង​ពាណិជ្ជកម្មបានឱ្យដឹងថា ការនាំ​ចេញ​កង់​របស់កម្ពុជា​ធ្លាក់ចុះបែបនេះ ដោយសារតែកម្លាំងបញ្ជាទិញពីបណ្តាប្រទេសនានា បានរ​ងផល​ប៉ះពាល់ពីវិបត្តិសេដ្ឋកិច្ច​ និងសង្រ្គាមរវាងរុស្ស៊ី-អ៊ុនក្រែន។ 

គួររំលឹកថា ក្នុងឆ្នាំ២០២២ ទំហំពាណិជ្ជកម្មអន្តរជាតិកម្ពុជាមាន ២២៧.១៩៥ ប៊ីលានរៀល (៥៥.១៨៥ លានដុល្លារអាមេរិក) ក្នុងនោះការនាំចេញមាន ៩៥.៤៣០ ប៊ីលានរៀល កើនឡើង ១៨,៧%ធៀបនឹងឆ្នាំមុន ស្របពេលដែលការនាំចូលមាន ១៣១.៧៦៥ ប៊ីលានរៀល កើនឡើង ៤,២%។ នេះបើតាមទិន្នន័យរបស់អគ្គនាយកដ្ឋានគយ និងរដ្ឋករកម្ពុជា និងធនាគារជាតិនៃកម្ពុជា៕