សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ទ្រាំង ឬតំបន់ខ្លះគេហៅថា សម្លាញ ជារុក្ខជាតិមួយប្រភេទដែលមានអត្ថប្រយោជន៍ច្រើន ដោយសារសារធាងរបស់វាគេអាចយកទៅច្នៃជាសម្ភារប្រើប្រាស់ ដូចជាចង្កឹះ វែក ជាដើម។ ក្រៅពីនេះ សូម្បីស្លឹកទ្រាំងក៏ត្រូវបានគេយកទៅវិញ កែច្នៃជាសម្ភារប្រើប្រាស់ ជាពិសេសធ្វើជាការបូបដ៏មានសោភ័ណភាព និងស្រស់ស្អាត។
អ្នកស្រី សុខ ជា ជាម្ចាស់សិប្បកម្មផលិតកាបូប កន្ត្រក ពីស្លឹកទ្រាំង ស្លឹកត្នោត និងវល្លិ៍ថ្នឹង ស្ថិតនៅភូមិស្រះពោធិ៍ ឃុំភ្នំបាត ស្រុកពញាឮ ខេត្តកណ្ដាល បានមានប្រសាសន៍ប្រាប់ AMS Economy ឱ្យដឹងថា៖
«នេះជាកាបូបផលិតពីស្លឹកទ្រាំង ដែលមានរូបរាងស្អាត ហើយអាចកាច់ម៉ូដបានច្រើន វិញជាក្បាច់មានក្រឡាល្អិតៗបាន ព្រោះយើងប្រើស្លឹកទ្រាំងស្ងួតៗ មកវិញទៅជាខ្សែសិនទើបយកមកធ្វើកន្ត្រកតាមក្រោយ មិនដូចជាស្លឹករុក្ខជាតិផ្សេងដែលមានសភាពរឹងពិបាកធ្វើម៉ូដ»។
អ្នកស្រីបានបញ្ជាក់ថា ៖
«សម្រាប់ផលិតផលយើងរួមមាន កាបូប កន្ត្រក មួក តែគេពេញនិយមជាងគេគឺកន្ត្រកយួរ ដែលមានទំហំល្មម មានរូបរាងស្អាត និងពណ៌ស្រស់។ ដោយឡែក សម្រាប់តម្លៃវិញ ផលិតផលកាបូបស្លឹកទ្រាំងមានតម្លៃចាប់ពី ២ម៉ឺនរៀលឡើងទៅអាស្រ័យទៅតាមទំហំ និងម៉ូដនីមួយៗ»។
ចំពោះការផលិតវិញ ម្ចាស់សិប្បកម្មរូបនេះរៀបរាប់ទៀតថា ៖
«យើងទិញស្លឹកទ្រាំងពីខេត្តក្រចេះ ដែលវាមានប្រវែងស្លឹកវែងៗ ទើបយើងហាលឱ្យស្ងួតសិន បន្ទាប់មកយកវាទៅត្រាំទឹក ៣យប់ឱ្យវាមានសភាពស្វិតល្អ ទុកបានយូរ ខ្មូតមិនស៊ី ទើបវិញជាខ្សែ។ បន្ទាប់ពីបានជាខ្សែរួចហើយទើបគេអាចក្រង ដំឡើង ទៅជារាងកាបូបបាន។ ជារួមរយៈផលិត បើគិតពីស្លឹកទ្រាំងដែលវិញជាខ្សែស្រាប់ៗហើយ គេអាចផលិតបាន ២កន្ត្រកក្នុងមួយថ្ងៃ»។
ក្រៅពីវិញធ្វើជាកន្ត្រក ឬកាបូប ស្លឹកទ្រាំងក៏អាចច្នៃជាកន្ទេល ឬលាយជាមួយវល្លិ៍ថ្នឹង ឬវត្ថុធាតុដើមផ្សេងទៀតដើម្បីផលិតជាសម្ភារផ្សេងទៀតដែលមានម៉ូដកាន់តែស្អាតប្លែក ដូចជាកំប៉ុងប៊ិក កញ្ច្រែង ជាដើម។ គួរបញ្ជាក់ដែរថា នេះជាអាជីវកម្មលក្ខណៈគ្រួសារ ដែលមានសមាជិកអ្នកផលិត ៥នាក់ ផលិតចេញពីស្នាដៃខ្មែរពិតៗ ហេតុនេះបងប្អូនយើងគួរតែងាកមកគាំទ្រផលិតផលកែច្នៃក្នុងស្រុកដែលមានម៉ូដស្អាតប្លែក និងប្រើប្រាស់វត្ថុធាតុដើមធម្មជាតិក្នុងសហគមន៍៕
Account
Security
Favourite Content