សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្នុងគោលបំណងជំរុញសេដ្ឋកិច្ចកម្ពុជាឱ្យកាន់តែរីកចម្រើន រដ្ឋាភិបាលអាណត្តិថ្មីទី៧ នៃរដ្ឋសភា បានដាក់ចេញនូវគោលនយោបាយដោយបង្កើតតំបន់ជាច្រើនដូចជា តំបន់សេដ្ឋកិច្ចពិសេស សួនកសិ-ឧស្សាហកម្ម និងសួនឧស្សាហកម្មជាដើម។ ក្នុងនោះ ក៏មានផងដែរនូវការបង្កើតតំបន់ពាណិជ្ជកម្មសេរីក្នុងស្រុក (Free-Trade Zone) ដែលជារឿងថ្មីមួយ។
លោកបណ្ឌិត គី សេរីវឌ្ឍន៍ ប្រធានមជ្ឈមណ្ឌលសិក្សាចិន និងជាអ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានពន្យល់ពីគោលបំណងនៃការបង្កើតតំបន់មួយនេះថា វាជាតំបន់ដែលអនុញ្ញាតឱ្យមានការធ្វើពាណិជ្ជកម្មជាមួយគ្នាកាន់តែងាយស្រួល មានទំនិញជាច្រើនដែលដាក់តាំងបង្ហាញលក់នៅក្នុងតំបន់នោះ ហើយមានរដ្ឋបាលនៅក្នុងការបង់ពន្ធ ដូចជា ពន្ធ VAT ជាដើម។
លោកបណ្ឌិតបន្តថា៖
«ការបង្កើតតំបន់នេះឡើងគឺមានរដ្ឋបាលនៅខាងក្នុង ដែលដូចទៅនឹងតំបន់សេដ្ឋកិច្ចពិសេស អីចឹងវាមានការលើកលែងមួយចំនួន ដូចជាការផ្ដល់អគ្គិសនីក្នុងតម្លៃទាប ការជួយសម្រួលដល់ការដឹកជញ្ចូន និងជួយដល់ការសម្របសម្រួលផ្នែកពន្ធដារ និងពន្ធគយសម្រាប់នាំចេញនាំចូល ឬក៏ទិញទំនិញយកមកដាក់នៅក្នុងតំបន់នោះជាដើម»។
ក្នុងន័យនេះ លោកបណ្ឌិតបានលើកជាឧទាហរណ៍ជាក់ស្ដែងថា បច្ចុប្បន្ននេះ ទីផ្សារនៅក្នុងស្រុក មិនទាន់មានការប្រមូលផ្ដុំនៅឡើយទេ។ ប្រសិនបើបុគ្គលណាម្នាក់ចង់ទិញសម្ភារៈដាក់ផ្ទះ គឺគេត្រូវធ្វើដំណើរទៅច្រើនកន្លែង ដើម្បីអាចទិញបានគ្រប់តម្រូវការ។ ប៉ុន្តែប្រសិនបើកម្ពុជាមានតំបន់នេះ ទំនិញនានានឹងមកប្រមូលផ្ដុំលក់តែមួយកន្លែង។ ដូចជាក្នុងករណីដែលប្រជាជនចង់ទិញគ្រឿងសំណង់ ពួកគេអាចសំដៅទៅតែមួយកន្លែង ប៉ុន្តែអាចរកបាននូវសម្ភារៈសំណង់គ្រប់ប្រភេទតែម្ដង។
ដូច្នេះហើយ ការបង្កើតតំបន់ពាណិជ្ជកម្មសេរីក្នុងស្រុកនេះ បង្កើនភាពងាយស្រួលក្នុងការទិញលក់តែមួយកន្លែង ដោយចំណាយពេលតែមួយកន្លែង តែអាចទិញទំនិញប្រភេទណាមួយបានជាច្រើនមុខ ដែលជួយឱ្យរីកចម្រើនផ្នែកទីផ្សារ និងការលក់ជាទូទៅ។
គួរបញ្ជាក់ថា នៅក្នុងយុទ្ធសាស្ត្របញ្ចកោណដំណាក់កាលទី១ ត្រង់ចំណុចទី២ រដ្ឋាភិបាលបានផ្ដោតលើការធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែង តាមរយៈការអភិវឌ្ឍវិស័យគន្លឹះ និង ប្រភពថ្មី នៃកំណើនសេដ្ឋកិច្ច ការលើកកម្ពស់ការតភា្ជប់ និងការបង្កើនប្រសិទ្ធភាពនៃវិស័យដឹកជញ្ជូន ឡូជីស្ទីក វិស័យថាមពល វិស័យទឹកស្អាត និងវិស័យឌីជីថល។
បន្ថែមពីនេះ ក៏មាននូវការកែលម្អបរិយាកាសធុរកិច្ច និងការវិនិយោគ ការពង្រឹងប្រសិទ្ធភាព និង ភាពទាក់ទាញនៃតំបន់សេដ្ឋកិច្ចពិសេសរួមបញ្ចូលនូវសួនឧស្សាហកម្ម សួនកសិ-ឧស្សាហកម្ម និង តំបន់ពាណិជ្ជកម្មសេរីក្នុងស្រុក (Free-Trade Zone) ព្រមទាំងនវានុវត្តយន្តការហិរញ្ញប្បទាន និង ផលិតផលហិរញ្ញវត្ថុ សម្រាប់គាំទ្រដល់ការវិនិយោគ៕
Account
Security
Favourite Content