ភ្នំពេញ ៖ Handcrafted Cashew nuts stung treng (HCST) គឺជា​ឈ្មោះសហគ្រាសមួយ​ដែលប្រមូល​ទិញ​គ្រាប់​ស្វាយ​ចន្ទីពីក​សិករ​យកទៅកែ​ច្នៃជា​អាហារ​សម្រ​ន់ដែ​ល​មានរ​សជា​តិផ្សេ​ងៗ​។ សហគ្រាសមួយ​នេះត្រូ​វ​បានសា​ងសង់លើ​ផ្ទៃដីទំហំ​ ​៤ហិកតា ស្ថិតនៅឃុំ​ស្រែក្រសាំង ស្រុក​សៀម​បូក​ ខេ​ត្ត​ស្ទឹង​ត្រែង​ និងបានរួមចំណែកជួយកសិករដាំស្វាយចន្ទីនៅក្នុងខេត្តនេះបានច្រើនគួរឱ្យកត់សម្គាល់។

​កញ្ញា​ ​សឿន សុទ្ធ​នីតា​ ជាម្ចាស់សហគ្រាសកែច្នៃគ្រាប់ស្វាយចន្ទីខាងលើនេះ បានឱ្យដឹងថា ដើម្បីស្វែងរកទីផ្សារក្នុងការលក់ផលិតផលសម្រេចរបស់ខ្លួន កន្លងមកយុវតីរូបនេះតែងនាំយកផលិតផលរបស់ខ្លួនទៅដាក់តាំងបង្ហាញតាមពិព័រណ៍នានា។

​សម្រាប់ពិព័រណ៍ផលិតផលនោះទៀតសោត កញ្ញាបានបញ្ជាក់ថា មិនត្រឹមតែនៅតាមវេទិកាពិព័រណ៍ក្នុងស្រុកប៉ុណ្ណោះទេ ប៉ុន្តែសហគ្រាសរបស់កញ្ញាក៏ធ្លាប់បានចូលរួមក្នុងវេទិកាពិព័រណ៍ក្រៅស្រុកផងដែរ ដែលសកម្មភាពទាំងនេះ គឺដើម្បីផ្សព្វផ្សាយផលិតផលរបស់ខ្លួនផង និងដើម្បីបញ្ជាក់ពីគុណភាពស្តង់ដារនៃគ្រាប់ស្វាយចន្ទី​កែច្នៃផង។

កញ្ញាបានឱ្យដឹងថា សម្រាប់រយៈពេលជាងពាក់កណ្ដាលឆ្នាំ២០២៤នេះ ទីផ្សាររបស់​ខ្លួនមានការវិវត្តតិចតួចបើធៀបនឹងឆ្នាំមុន ដោយបច្ចុប្បន្នកញ្ញាកំពុង​តែធ្វើការ​ជាមួយអ្នកទិញ​ដែលមាន​សក្កានុពលផ្សេងទៀត បន្ថែមពីលើដៃគូដែលមានស្រាប់នៅតាម​បណ្ដា​ប្រទេស​ផ្សេងៗ។

ទាក់ទិននឹងរឿងនេះ កញ្ញា សឿន សុទ្ធនីតា បានឱ្យដឹងថា៖

«ខ្ញុំកំពុងធ្វើការជាមួយអ្នកទិញដែល​មានសក្កានុពលដែលស្ថិតនៅប្រទេសផ្សេងទៀត ជាក់ស្ដែង ឥឡូវនេះខ្ញុំបានឈាន ទៅដល់ការចរចា​តម្លៃ​ជាមួយគ្នា ដូចជានៅសហរដ្ឋអាមេរិកជាដើម ដែលអាចនិយាយបានថា លទ្ធផលឈាន​ដល់​ដំណាក់កាល ៦០ ទៅ៧០%ហើយ»។

ក្រៅពីការវិវឌ្ឍតិចតួចនេះ សហគ្រាសរបស់កញ្ញាក៏មានជួប​ប្រទះ​នូវ​បញ្ហា​លំបាក​មួយ​ចំនួ​នផងដែរ​ ​ដូ​ចជា​បញ្ហា​តម្លៃ​មិន​ទាន់​អាច​ប្រកួត​ប្រជែង​ជាមួយ​ទីផ្សារ​ដែល​មាន​ស្រាប់ ប​ញ្ហា​ភាពថ្មីថ្មោង​នៃផលិត​ផល​​នៅលើ​ទីផ្សា​រ ​ព្រ​មទាំង​បញ្ហា​ថ្លៃដើ​មខ្ពស់ជាដើម។ ជាមួយគ្នានេះ ដើម្បីអាចកាត់បន្ថយថ្លៃដើម ជាបទពិសោធកាលពីពេលកន្លងទៅនេះ កញ្ញា និងក្រុមគ្រួសារបានធ្វើការផ្ទាល់ជាមួយកសិករដែលដាំដុះគ្រាប់ស្វាយចន្ទី ដើម្បីបណ្ដុះបណ្ដាលពង្រឹងស្តង់ដារនៃការដាំដុះដំណាំស្វាយចន្ទី និងឈានដល់ការព្រមព្រៀងទិញគ្រាប់ស្វាយចន្ទីឆៅ សម្រាប់យកមកកែច្នៃ។

យ៉ាងណាមិញ លោក អ៊ួន ស៊ីឡុត ប្រធានសមាគមស្វាយចន្ទីនៅកម្ពុជាបានឱ្យដឹងថា ការកែច្នៃ​គ្រាប់ស្វាយចន្ទីនៅឆ្នាំនេះមានការធ្លាក់ចុះច្រើន បើធៀបទៅនឹងរយៈពេលដដែលកាលពីឆ្នាំមុន។

លោក អ៊ួន ស៊ីឡុត បានបញ្ជាក់ថា ៖

«ការកែច្នៃនៅឆ្នាំ២០២៤នេះ ហាក់ដូចជាមានការធ្លាក់ចុះច្រើន មូលហេតុគឺ​ដោយ​​សារតែសហគ្រាសគាត់មិនមានទុនបង្វិលក្នុងការទិញគ្រាប់ស្តុកទុកនៅឡើយ។ ម្យ៉ាងទៀត ដោយសារតែតម្លៃនៅខាងក្រៅល្អ ធ្វើឱ្យកសិករលក់គ្រាប់ស្វាយចន្ទីទៅក្រៅប្រទេសយ៉ាងគំហុក»។

ក្នុងនាមជាប្រធានសមាគមស្វាយចន្ទី លោក អ៊ួន ស៊ីឡុត ចង់ឱ្យភាគីពាក់ព័ន្ធ ជាពិសេសគ្រឹះស្ថានផ្ដល់កម្ចីដែលរួមមាន ធនាគារ និងគ្រឹះស្ថានមីក្រូហិរញ្ញវត្ថុ ជួយបញ្ចេញទុនក្នុងអាត្រាការប្រាក់ទាប ដើម្បីឱ្យសហគ្រាសអាចមានលទ្ធភាពយកកម្ចីមកប្រើប្រាស់ក្នុងសង្វាក់ផលិតកម្មរបស់ពួកគេ។ លោកជឿជាក់ថា ប្រសិនបើសហគ្រាសក្នុងស្រុកមានទុនគ្រប់គ្រាន់ក្នុងការទិញគ្រាប់ស្វាយចន្ទី ដើម្បីស្តុកទុក នោះការកែច្នៃក៏កាន់តែប្រសើរឡើង ហើយចរន្ដនៃការលក់គ្រាប់ស្វាយចន្ទីឆៅរបស់កសិករទៅទីផ្សារក្រៅប្រទេស ក៏នឹងកាត់បន្ថយផងដែរ។

គួរបញ្ជាក់ថា ដំណាំ​ស្វាយច​ន្ទី ជាប្រភេទ​ដំណាំដែល​ប្រើប្រាស់​ទំហំដី​ចំនួន ២៣០ ២០២ ហិកតា នៃ​ផ្ទៃដី​ដាំដុះ សរុប​នៅ​កម្ពុជា។ ដំណាំនេះ​គឺស្ថិត​នៅ​លេខ​រៀង​ទី៤ ក្នុង​ចំណោម​ដំណាំទាំង​១៣មុខ​សំខាន់ៗ ដែល​ប្រើប្រាស់​ដីអស់​ច្រើន​ជាង​គេ។ នេះបើ​តាម​ការ​ចុះ​ផ្សាយ​ពីស្ថាន​ភាព​នៃការ​ប្រើប្រាស់​ដីរបស់​កម្ពុជា ពីក្រសួង​បរិស្ថាន​៕