ភ្នំពេញ ៖ សហព័ន្ធស្រូវអង្ករកម្ពុជាបានឱ្យដឹងថា ​ក្នុងរយៈពេល១២ខែឆ្នាំ២០២៣ កម្ពុជាសម្រេចបានការនាំចេញអង្ករចំនួន ៦៥៦ ៣២​៣ តោន ទទួលបានទឹកប្រាក់ប្រមាណជាង ៤៦៦លានដុល្លារអាមេរិក មានកំណើនលើបរិមាណ ៣% និងបរិមាណទឹកប្រាក់មានកំណើន ១៣% រៀងគ្នាបើធៀបនឹងឆ្នាំ២០២២។

យោងតាមស្ថិតិដែលបង្ហាញដោយសហព័ន្ធស្រូវអង្ករកម្ពុជាបានឱ្យដឹងថា ពេញមួយឆ្នាំ២០២៣ កម្ពុជាបាននាំចេញអង្ករចំនួន ៦៥៦ ៣២៣តោន តាមរយៈក្រុមហ៊ុននាំចេញអង្ករចំនួន ៦៣ក្រុមហ៊ុន ទៅកាន់គោលដៅចំនួន ៦១ ទទួលបានទឹកប្រាក់បានចំនួនជាង ៤៦៦លានដុល្លារអាមេរិក។ តួលេខនេះមានកំណើនលើបរិមាណ ៣% និងបរិមាណទឹកប្រាក់មានកំណើន ១៣% រៀងគ្នា បើធៀបនឹងឆ្នាំ២០២២។

ក្នុងរយៈការនាំចេញអង្កររបស់កម្ពុជាមានកំណើនតិចតួច និងស្ថិតក្រោមគោលដៅកំណត់ បើទោះជាតម្រូវការអង្ករ និងតម្លៃអង្ករនៅលើទីផ្សារអន្តរជាតិកាលពីឆ្នាំ២០២៣កន្លងទៅនេះ មានការកើនឡើងដល់កម្រិតកំពូលក្នុងរយៈពេលជាច្រើនឆ្នាំមកនេះក៏ដោយ។

ការនាំចេញអង្កររបស់កម្ពុជាទៅប្រទេសចិន និងតំបន់រដ្ឋបាលស្វយ័តហុងកុង បានចំនួន ២១២.៧៥៦តោន ដែលគិតជាទឹកប្រាក់បានចំនួន ១៣៨លានដុល្លារអាមេរិក ទៅកាន់ប្រទេសនៅទ្វីបអឺរ៉ុបចំនួន ២៦ប្រទេស បានចំនួន ២៦៤.៦៨៣ តោន ដែលគិតជាទឹកប្រាក់បានចំនួន ១៩១លានដុល្លារអាមេរិក និងនាំចេញទៅកាន់ប្រ​ទេ​ស​សមាជិកអាស៊ានចំនួន៧ប្រទេស បានបរិមាណចំនួន ៩៣.៣៧៦តោន គិតជាទឹកប្រាក់ចំនួន ៦២លានដុល្លារ​​អាមេរិក និងទៅកាន់គោលដៅផ្សេងទៀតនៅអាហ្វ្រិក មជ្ឈឹមបូព៌ា ចំនួន២៦ប្រទេស បានចំនួន ៨៥.៥០៨តោន ដែលគិតជាទឹកប្រាក់បានចំនួន ៧៦លានដុល្លារអាមេរិក។

 សហព័ន្ធស្រូវអង្ករកម្ពុជា បានដាក់ចេញនូវផែនការគោលសម្រាប់ឆ្នាំ២០២៣-២០២៥ ជំរុញការនាំចេញដោយរៀបចំផែនការយុទ្ធសាស្ត្រទីផ្សារគោលដៅស្របតាមប្រភេទពូជស្រូវ និងអង្ករ។ ចំពោះប្រភេទអង្ករដែលបាននាំចេញ ក្នុងនោះមាន អង្ករក្រអូបគ្រប់ប្រភេទចំនួន ៨២,២៩%, អង្ករស ចំនួន ១២,៩៤% , អង្ករចំហ៊ុយ ២,៩២ %, អង្ករសរីរាង្គចំនួន ១,៦២%, អង្ករសគ្រាប់ខ្លីចំនួន ០,០៣% និងអង្ករដំណើបចំនួន ០,២០%។

គួរឱ្យកត់សម្គាល់ដែរថា ការនាំចេញស្រូវរបស់កម្ពុជាសម្រេចបានក្នុងបរិមាណ ៤ ៣៨៧ ៣៦៣តោន ដែលគិតជាទឹកប្រាក់បានប៉ានប្រមាណ ១,៣២ពាន់លានដុល្លារអាមេរិក ក្នុងនោះ ៦៤% បាននាំចេញឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច។ ការនាំចេញស្រូវ មានការកើនឡើងលើបរិមាណចំនួន ២៦,​៥០% និងទឹកប្រាក់មានកំណើនចំនួន ៥៦,៦៩% បើធៀបឆ្នាំ២០២២។

ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា បានលើកឡើងពីផែនការពង្រីកទីផ្សារទៅកាន់ប្រទេសចិនឱ្យបានច្រើនជាង ៤០ម៉ឺនតោននៅក្នុងឆ្នាំ២០២៣  ពិសេសបន្តធ្វើពិពិធកម្មទៅកាន់ទីផ្សារឱ្យបានកាន់តែទូលំទូ​លាយទៅកាន់ទីផ្សារថ្មីៗបន្ថែមទៀត រួមមាន៖ សហរដ្ឋអាមេរិក កាណាដា មជ្ឈឹមបូព៌ា សិង្ហបុរី ហុងកុង ប្រទេ​សឥណ្ឌូនេស៊ី ជាដើម។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ រយៈពេល១២ ខែឆ្នាំ២០២៣នេះ កម្ពុជាបាននាំចេញកសិផលចំនួន ៨ ៤៤៩ ៤១៤,៣៦តោន ទៅកាន់ទីផ្សារអន្តរជាតិ ក្នុងនោះការនាំចេញអង្ករមានចំនួន ៦៥៦ ៣២៣,០០តោន កើនឡើង៣ភាគរយ និងស្រូវ ២ ៧៣០ ៨២៥,០០តោន កើនឡើង២៤ភាគរយ៕