សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាទូទៅ ក្នុងអំឡុងពិធីថ្ងៃបុណ្យជាតិធំៗនៅប្រទេសកម្ពុជា ដូចជាបុណ្យចូលឆ្នាំថ្មីប្រពៃណីជាតិខ្មែរជាដើម ករណីគ្រោះថ្នាក់ចរាចរណ៍តែងតែមានសន្ទុះកើនឡើងច្រើនបើធៀបនឹងថ្ងៃធម្មតា។ មូលហេតុ ដោយសារកំណើននៃការធ្វើដំណើរដ៏ច្រើនលើសលប់ ការធ្វេសប្រហែស និងមូលហេតុដទៃទៀតដូចជាកត្តាអនុវត្តច្បាប់នៅខ្វះចន្លោះជាដើម។
លោក គង់ រតនៈ អ្នកពិគ្រោះយោបល់ឯករាជ្យផ្នែកចរាចរណ៍ជើងគោក បានប្រាប់បណ្តាញព័ត៌មាន AMS ថា កត្តាដែលនាំឱ្យមានកំណើនគ្រោះថ្នាក់ចរាចរណ៍ គឺបណ្តាលមកពីការខ្វះចំណេះដឹងផ្នែកច្បាប់ចរាចរណ៍ ខ្វះការប្រុងប្រយ័ត្ន ខ្វះការយោគយល់អធ្យាស្រ័យគ្នា បើកបរក្រោមឥទ្ធិពលគ្រឿងស្រវឹង និងកត្តារឹតបន្តឹងច្បាប់ចរាចរណ៍ផ្លូវគោកនៅមានកម្រិត។
ជាទូទៅការចុះរឹតបន្តឹងការអនុវត្តន៍ច្បាប់ចរាចរណ៍ផ្លូវគោកនៅទូទាំងប្រទេស ត្រូវបានផ្អាកបណ្តោះអាសន្នក្នុងរយៈពេលនៃពិធីបុណ្យទាំងនោះ លើកលែងតែការត្រួតពិនិត្យគ្រឿងស្រវឹង និងអាវុធជាតិផ្ទុះនៅពេលយប់នៅតែបន្តការអនុវត្តដដែល។ កំណើនយានយន្តក៏ជាកត្តានាំឱ្យមានករណីគ្រោះថ្នាក់ចរាចរណ៍កើនឡើងផងដែរ។
ក្នុងឆ្នាំ២០២៦នេះ យានយន្តជាង៥២ម៉ឺនគ្រឿងបានចុះបញ្ជីយានយន្តនៅក្រសួងសាធារណការ និងដឹកជញ្ជូន ខណៈដែលការនាំចូលរថយន្តចំនួនជាង៨ម៉ឺន ៣ពាន់គ្រឿង នៅឆ្នាំ២០២៥ កើនឡើងជាង៦០ភាគរយ។
លោក គឹម បញ្ញា នាយកអង្គការមូលនិធិបង្ការរបួសអាស៊ី (AIP) បានលើកឡើងថា ការអនុវត្តការរឹតបន្តឹងច្បាប់ចរាចរណ៍មិនបានទៀងទាត់ ជាពិសេសនៅថ្ងៃបុណ្យជាតិនានា គឺជាផ្នែកមួយដែលបណ្តាលឱ្យមានគ្រោះថ្នាក់ចរាចរណ៍កើនឡើង។
លោកបញ្ជាក់ថា ៖
«កាលណាអត់មានការអនុវត្តច្បាប់ ឬការអនុវត្តច្បាប់ធ្វើមិនបានទូលំទូលាយ មិនបានជាប់លាប់ គ្រោះថ្នាក់(ចរាចរណ៍) តែងតែកើតមាន អ្នកបើកបរគាត់កត់សម្គាល់មើលការអនុវត្តច្បាប់ដែរ ឧទាហរណ៍រឿងពាក់មួក បើនៅភ្នំពេញ គឺអនុវត្តខ្លាំង»។
មុនរដូវកាលបុណ្យជាតិធំៗមកដល់ គណៈកម្មាធិការជាតិសុវត្ថិភាពចរាចរណ៍ផ្លូវគោកនៃក្រសួងមហាផ្ទៃ តែងតែចេញសេចក្តីអំពាវនាវឱ្យពលរដ្ឋបើកបរនៅតាមដងផ្លូវឲ្យបង្កើនការប្រុងប្រយ័ត្ន បើកបរកុំលើសល្បឿនកំណត់ កុំបើកបរក្រោមឥទ្ធិពលគ្រឿងស្រវឹង ហើយបើកបរដោយពាក់មួកសុវត្ថិភាពសម្រាប់ម៉ូតូ និងពាក់ខ្សែក្រវាត់សុវត្ថិភាពសម្រាប់រថយន្ត។
អ្នកជំនាញផ្នែកទស្សនវិជ្ជា លោកបណ្ឌិត ឈត ប៊ុនថង បានលើកឡើងថា ត្រឹមតែសេចក្តីអំពាវនាវនេះមិនគ្រប់គ្រាន់ដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍នាឱកាសបុណ្យចូលឆ្នាំខ្មែរនោះទេ គឺចាំបាច់ណាស់ត្រូវការចុះអនុវត្តដោយផ្ទាល់ពីមន្ត្រីនគរបាលចរាចរណ៍ និងមានការសហការជាមួយស្ថាប័នពាក់ព័ន្ធនានាទៀតក្នុងការផ្សព្វផ្សាយ និងអប់រំ ខ្លឹមសារច្បាប់ចរាចរណ៍ ក្រុមសីលធម៌ និងហានិភ័យគ្រោះថ្នាក់ចរាចរណ៍ ដល់សាធារណជនឱ្យបានទូលំទូលាយ។
សូមជម្រាបថា រយៈពេល៥ថ្ងៃ ក្នុងអំឡុងពេលនៃពិធីបុណ្យចូលឆ្នាំខ្មែរ ឆ្នាំ២០២៥ គ្រោះថ្នាក់ចរាចរណ៍បានកើតឡើងចំនួន ៣០លើក បណ្តាលឱ្យមនុស្សចំនួន២៦នាក់បានស្លាប់ និងរបួសធ្ងន់ស្រាលចំនួន៤៧នាក់៕ ដោយ ៖ សៅ សុខអេង AMS
Account
Security
Favourite Content