សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រោយពីផ្ទុះករណីដង្កូវហ្វូងបំផ្លាញដំណាំស្រូវនៅតាមបណ្តាខេត្តមួយចំនួនមិនទាន់បានប៉ុន្មានផងនោះ ឥឡូវនេះ មានករណីថ្មីកើតបន្តទៀត នោះគឺការផ្ទុះឡើងនូវហ្វូងសត្វ រុយ ស កំពុងបំផ្លាញដំណាំស្រូវនៅខេត្តចំនួន៣ ជាប់ព្រំដែនកម្ពុជា-វៀតណាម។
តាមការបញ្ជាក់ពីអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ជំទាវ អ៊ឹម រចនា បានឱ្យដឹងថា បច្ចុប្បន្ន ហ្វូងសត្វរុយ ស បាន និងកំពុងចាប់ផ្ដើមផ្ទុះរាលដាលនៅក្នុងខេត្ដចំនួន ៣ ជាប់ព្រំដែនកម្ពុជា-វៀតណាម រួមមាន ខេត្ដព្រៃវែង ស្វាយរៀង និងខេត្ដតាកែវ។
ជំទាវ អ៊ឹម រចនា បានឱ្យដឹងទៀតថា៖ ចំពោះវត្ដមាននៃរុយសនេះ គឺបានបំផ្លិញបំផ្លាញដំណាំស្រូវរបស់ប្រជាពលរដ្ឋ ហើយប្រភេទសត្វរុយសនេះទៀតសោត ក៏មានភាពធន់នឹងថ្នាំជាងសត្វដង្កូវហ្វូង ដែលទាមទារឱ្យមានការចាត់វិធានការភ្លាមៗ។ ពេលនេះមន្ដ្រីជំនាញបាន និងកំពុងចុះពិនិត្យតាមដានករណីនេះយ៉ាងយកចិត្ដទុកដាក់។
សូមជម្រាបថា ហ្វូងសត្វរុយសនេះ ជាពពួកចុចបឺតជញ្ជក់យករុក្ខរសពីរុក្ខជាតិមកចិញ្ចឹមជីវិត។ វាបំផ្លាញដំណាំស្រូវដោយផ្ទាល់ដោយការជញ្ជក់រុក្ខរសពីស្លឹកស្រូវ (សកម្មខ្លាំងនៅពេលព្រឹក) ធ្វើឱ្យស្លឹកប្រែពណ៌លឿង និងរួញ។ វាបំផ្លាញខ្លាំងលើស្រូវក្នុងវគ្គលូតលាស់ ជាពិសេសក្នុងដំណាក់សំណាប និងបែកគុម្ព។ ប្រសិនបើរុយសច្រើន បំផ្លាញស្រូវស្ថិតក្នុងវគ្គបង្កើតផល ជាពិសេសក្នុងដំណាក់កាលចេញផ្កា ចេញកួរ នោះនឹងធ្វើឱ្យគ្រាប់ស្រូវស្កកច្រើន។
សូមជម្រាបដែរថា កាលពីថ្ងៃទី១ ខែកក្កដា ឆ្នាំ២០២៤ បន្ទាប់ពីទទួលបានព័ត៌មានស្តីពីការបំផ្លាញរបស់រុយ ស នេះភ្លាម ក្រសួងកសិកម្ម រុក្ខាប្រមាញ់ និងនេសាទ បានចាត់ឱ្យអង្គភាពជំនាញចុះពិនិត្យ និងវាយតម្លៃអំពីស្ថានភាពទូទៅនៃការបំផ្លាញដំណាំស្រូវនៅឃុំល្វា និង ឃុំបន្ទាយចក្រី នៃស្រុកព្រះស្តេច ខេត្តព្រៃវែង។ តាមរយៈការចុះពិនិត្យស្រែឃើញថា ការបំផ្លាញមានសភាពធ្ងន់ធ្ងរ និងរាលដាលកាន់តែខ្លាំងនៅតាមឃុំផ្សេងៗទៀត។
ក្រុមការងារនៃអគ្គនាយកដ្ឋានកសិកម្ម ដឹកនាំដោយ លោក គង់ គា ប្រធាននាយកដ្ឋានដំណាំស្រូវ សហការជាមួយមន្ទីរកសិកម្ម រុក្ខាប្រមាញ់ និងនេសាទ ខេត្តព្រៃវែង បានបន្តចុះពិនិត្យស្ថានភាពនៃការផ្ទុះរាលដាលហ្វូងរុយស ស៊ីបំផ្លាញដំណាំស្រូវ និងនាំយកថ្នាំអន្តរាគមន៍បាញ់សម្លាប់រុយស នៅភូមិព្រៃល្វា ស្រុកព្រះស្តេច ខេត្តព្រៃវែង។
នាឱកាសនៃដំណើរចុះត្រួតពិនិត្យនោះ លោក គង់ គា មានប្រសាសន៍ថា បន្ទាប់ពីទទួលបានព័ត៌មានស្តីការបំផ្លាញរបស់រុយសនេះភ្លាម ក្រសួងកសិកម្ម រុក្ខាប្រមាញ់ និងនេសាទ ដែលមាន ឯកឧត្តម ឌិត ទីណា រដ្ឋមន្ត្រី ក្រសួងកសិកម្ម និងឯកឧត្តម ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម បានបញ្ជាឱ្យអង្គភាពជំនាញចុះពិនិត្យ និងវាយតម្លៃអំពីស្ថានភាពទូទៅនៃការបំផ្លាញដំណាំស្រូវនៅតាមបណ្តាឃុំរួមមានឃុំល្វា និងឃុំបន្ទាយចក្រី នៃស្រុកព្រះស្តេច ។
ខណៈពេលជួបជាមួយកសិករនៅភូមិត្នោតច្រះ ឃុំល្វា ស្រុកព្រះស្តេច លោកប្រធាននាយកដ្ឋានបានជម្រាបជូនប្រជាកសិករអំពីប្រវត្តិនៃការបំផ្លាញ លក្ខខណ្ឌនៃការកកើត និងការបំផ្លាញរបស់រុយសនេះ។ ជាមួយគ្នានេះដែរ មន្ត្រីជំនាញនៃនាយកដ្ឋានការពារដំណាំបានណែនាំកសិករអំពីវដ្តជីវិត ការវាយតម្លៃប្រជាកររបស់សត្វនេះក្នុងស្រែ និងណែនាំអំពីវិធីសាស្ត្រផ្សេងៗក្នុងការការពារ និងកម្ចាត់ រួមទាំបច្ចេកទេសនៃការប្រើប្រាស់ថ្នាំកសិកម្មឱ្យមានប្រសិទ្ធភាព និងសុវត្ថិភាពផងដែរ។
តំណាងឱ្យក្រុមការងារបច្ចេកទសនៃអគ្គនាយកដ្ឋានកសិកម្ម លោក គង់ គា ក៏បានណែនាំឱ្យមន្ទីកសិកម្មខេត្ត ជាពិសេសមន្ត្រីកសិកម្មឃុំ និងអាជ្ញាធរមូលដ្ឋានចុះវាយតម្លៃផលប៉ះពាល់ និងធ្វើរបាយការណ៍បូកសរុបជូនអគ្គនាយកដ្ឋានកសិកម្ម និងក្រសួងកសិកម្ម ដើម្បីចាត់វិធានការអន្តរាគមន៍ឱ្យបានទាន់ពេលវេលា ហើយក្រុមការងារនឹងបន្តស្នាក់នៅក្នុងខេត្តព្រៃវែង ដើម្បីចូលរួមវាយតម្លៃ និងចុះអន្តរាគមន៍ជាមួយគ្នា។
សូមបញ្ជាក់ដែរថា នៅអំឡុងពេលនៃការចុះពិនិត្យនេះ អគ្គនាយកដ្ឋានកសិកម្មក៏បានចែកថ្នាំកសិកម្មដល់មន្ទីរកសិកម្មខេត្តព្រៃវែង និងកសិករដើម្បីបានបាញ់កម្ចាត់សត្វរុយសលើផ្ទៃដីចំនួន២០ហិកតា និងណែនាំឱ្យកសិករបាញ់នៅពេលព្រឹក និងពេលល្ងាចជាដើម៕
Account
Security
Favourite Content