កណ្តាល ៖ ការប្រើប្រាស់កម្ចីពីគ្រឹះស្ថានហិរញ្ញវត្ថុ ដែលមានគោលដៅច្បាស់លាស់នឹងជួយពង្រីកអាជីវកម្ម ហើយអាចលើកកម្ពស់ជីវភាពក្រុមគ្រួសារប្រជាពលរដ្ឋឱ្យកាន់តែប្រសើរ។​ ជាស្តែង លោក ស៊ុត សាម៉េន ម្ចាស់អាជីវកម្មផលិតទឹកសុទ្ធនៅស្រុកកណ្តាលស្ទឹង ខេត្តកណ្តាល បានចែករំលែកបទពិសោធជោគជ័យនៃការប្រើប្រាស់កម្ចីពីគ្រឹះស្ថានមីក្រូហិរញ្ញវត្ថុមួយកន្លែង។

លោកបានប្រាប់ថា​​ តាមរយៈកម្ចីពីគ្រឹះស្ថានមីក្រូហិរញ្ញវត្ថុ បានជួយទ្រទ្រង់ដល់មុខរបររបស់លោកកាន់តែរីកចម្រើនពីមួយថ្ងៃទីមួយថ្ងៃ ជាពិសេសបានជ្រោមជ្រែងកម្រិតជីវភាពគ្រួសាររបស់លោកឱ្យប្រសើរឡើងជាងមុន។

លោកបានរៀនរាប់ថា កាលពីដំបូងឡើយ លោកធ្លាប់ធ្វើជាកម្មករសំណង់ ហើយពីមួយថ្ងៃទៅមួយថ្ងៃ លោកបានធ្វើការនៅក្រោមកំដៅថ្ងៃ ហត់នឿយខ្លាំង និងគ្មានពេលសម្រាកនោះទេ ដោយសាររវល់ខ្លាំងជាមួយការងារសំណង់នេះ។ ដោយសារកត្តាទាំងនេះ បានជំរុញឱ្យលោកមានគំនិតបើកមុខរបរផ្ទាល់ខ្លួន។​ មុខរបរដែលលោក ស៊ុត សាម៉េន​បានចាប់ផ្តើមធ្វើ​គឺផលិតទឹកសុទ្ធដើម្បីផ្គត់ផ្គង់ទីផ្សារក្នុងតំបន់​ ដោយលោកបានសួរនាំបទពិសោធន៍ និងគំរូអាជីវកម្មពីមិត្តភ័ក្តរបស់លោក ដែលទទួលជោគជ័យក្នុងអាជីវកម្មនេះ។

លោកបានថ្លែងបន្តថា​ នៅពេលចាប់ផ្តើមអាជីវកម្មដំបូង លោកគ្មានទុនគ្រប់គ្រាន់នោះទេ ដូច្នេះលោកបានសម្រេចចិត្តប្រើប្រាស់កម្ចីពីគ្រឹះស្ថានមីក្រូហិរញ្ញវត្ថុមួយកន្លែង ដោយប្រើប្រាស់លើការសាងសង់ទីកន្លែង និងដំឡើងម៉ាស៊ីនសម្រាប់ផលិតទឹកសុទ្ធ។ បន្ទាប់ពីផលិតទឹកសុទ្ធបាន​ លោកបានចែកចាយទឹកសុទ្ធទាំងនោះទៅកាន់អតិថិជន ដោយមធ្យោបាយធ្វើដំណើរដឹកដោយរឺម៉កដែលអាចផ្ទុកទឹកសុទ្ធត្រឹមតែ ១០០ ទៅ ១៥០ យួរប៉ុណ្ណោះ។

បន្ទាប់មកលោកមានគោលបំណងពង្រីកអាជីវកម្មបន្ថែម លោកបានពិភាក្សាជាមួយប្រពន្ធ និងគ្រួសារ ដើម្បីសិក្សាស្នើសុំកម្ចីបន្ថែម ក្នុងនោះមួយផ្នែកនៃកម្ចី លោកបានយកទៅទិញរថយន្តសម្រាប់ទឹកជញ្ជូន និងមួយផ្នែកទៀត លោកទិញសម្ភារៈបន្ថែមដើម្បីពង្រីកផលិតកម្មទឹកសុទ្ធ។

លោក ស៊ុត សាម៉េន បានឱ្យដឹងទៀត​ថា បន្ទាប់ពីមានឡានដឹកជញ្ជូន លោកអាចដឹកជញ្ជូន​ទឹកសុទ្ធបានច្រើនជាងមុន និងអាចបង្កើនចំណូលធ្វើឱ្យជីវភាពរបស់ក្រុមគ្រួសារមានភាពប្រសើរឡើងមុន។ ក្រោយពេលបង្កើត និងពង្រីកមុខរបរសមរម្យបែបនេះ លោកមានពេលសម្រាប់គ្រួសារ និងអាចថែទាំកូនៗបានប្រសើរជាងមុន។

លោកបានលើកឡើងដូច្នេះថា​ ៖

“កម្ចីពីគ្រឹះស្ថានហិរញ្ញវត្ថុ គឺជាប្រភពទុនដ៏សំខាន់ក្នុងការជួយពង្រីកអាជីវកម្ម និងជួយឱ្យជីវភាពមានភាពប្រសើរឡើង។”

គួរបញ្ជាក់ដែរថា គិតត្រឹមដំណាច់ឆ្នាំ២០២៣ វិស័យមីក្រូហិរញ្ញវត្ថុដោយមិនរាប់បញ្ចូលទិន្នន័យពីគ្រឹះស្ថានធនាគារ បានផ្តល់ឥណទាន (កម្ចី) ចំនួន ៥,១២ ពាន់លានដុល្លារទៅឱ្យអតិថិជនចំនួន ១,៥៧លានគណនី។ នេះបើយោងតាមទិន្នន័យរបស់សមាគមមីក្រូហិរញ្ញវត្ថុកម្ពុជា (CMA)។ ឥណទានទាំងនេះ ត្រូវបានផ្តល់ទៅកាន់វិស័យសំខាន់ៗក្នុងសេដ្ឋកិច្ចរួមមាន ៖ ក្រុមគ្រួសារ កសិកម្ម ពាណិជ្ជកម្ម និងជំនួញ សេវាកម្ម សំណង់ ដឹកជញ្ជូន កម្មន្តសាល និងផ្សេងៗ។

ទន្ទឹមនឹងនេះ ប្រាក់បញ្ញើនៅតាមគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ​ (MDI) មានចំនួន ២,២ពាន់លានដុល្លា​ពីអតិថិជនដាក់ប្រាក់បញ្ញើប្រមាណ ២,០១លានគណនី​គិតត្រឹមរយៈពេលដូចគ្នា​។​ វិស័យមីក្រូហិរញ្ញវត្ថុ បានផ្តល់ការងារដោយផ្ទាល់ដល់ប្រជាពលរដ្ឋកម្ពុជា ២១ ៥៦៧នាក់នៅទូទាំងប្រទេសជាមួយនឹងបណ្តាញប្រតិបត្តិការចំនួន ៩០៤ការិយាល័យ។

ជារួម វិស័យមីក្រូហិរញ្ញវត្ថុនៅកម្ពុជាបន្តមានភាពរីកចម្រើនឥតឈប់ឈរ និងបានចូលរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ច តាមរយៈការផ្តល់ផលិតផល និងសេវាហិរញ្ញវត្ថុផ្លូវការដល់ប្រជាពលរដ្ឋ ជាពិសេសប្រជាពលរដ្ឋនៅតាមតំបន់ជនបទ។ ការណ៍នេះធ្វើឱ្យវិស័យមីក្រូហិរញ្ញវត្ថុដើរតួនាទីយ៉ាងសកម្មក្នុងការលើកម្ពស់បរិយាបន្នហិរញ្ញវត្ថុនៅកម្ពុជា៕