សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
គម្រោងគ្រប់គ្រងធនធានទឹកចម្រុះហ្វូណនតេជោកំណាត់ទី ២ ប្រវែងជាង ១៥១ គីឡូម៉ែត្រ នឹងបើកការដ្ឋានសាងសង់ នៅថ្ងៃទី១១ ខែមេសា ឆ្នាំ២០២៦ ខាងមុខ ក្រោមអធិបតីភាពដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) និងជាអនុប្រធានប្រចាំការនៃគណៈកម្មាធិការពិសេសដើម្បីជំរុញការរៀបចំ និងការអនុវត្តគម្រោងព្រែកជីកហ្វូណនតេជោ នៅថ្ងៃទី៩ ខែមេសា ឆ្នាំ២០២៦ បានអញ្ជើញដឹកនាំគណៈប្រតិភូអន្តរក្រសួងចុះពិនិត្យការងាររៀបចំពិធីបើកការដ្ឋានសាងសង់ គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ នេះ។
ការចុះពិនិត្យមានការចូលពីរួមសំណាក់ ឯកឧត្តមរដ្ឋមន្ត្រី ក្រសួងសាធារណការនិងដឹកជញ្ជូន សមាជិកគណៈកម្មាធិការពិសេស និងជាប្រធានលេខាធិការដ្ឋាន, ឯកឧត្តមអភិបាល នៃគណៈអភិបាលខេត្តតាកែវ, ឯកឧត្តម លោកជំទាវ តំណាងក្រសួង-ស្ថាប័នពាក់ព័ន្ធ ជាសមាជិកចំណុះគណៈកម្មាធិការពិសេស, និងមន្ត្រីពាក់ព័ន្ធជាច្រើនរូប។
ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការនៃក្រសួងធនធានទឹក និងឧតុនិយម បានបញ្ជាក់ឱ្យដឹងថា ពិធីបើកការដ្ឋានសាងសង់គម្រោងជាប្រវត្តិសាស្ត្រនេះ នឹងត្រូវប្រារព្ធឡើង នៅថ្ងៃទី ១១ ខែមេសា ឆ្នាំ ២០២៦ ខាងមុខ ក្រោមអធិបតីភាពដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តម ឈា ប៊ុនរិទ្ធ បានថ្លែងថា ៖
“គម្រោង «ព្រែកជីកហ្វូណនតេជោ» កំណាត់ទី ២ មានប្រវែងសរុប ១៥១,៦ គីឡូម៉ែត្រ ដោយចាប់ផ្តើមតភ្ជាប់ពីព្រែកពោធិ៍ នៃទន្លេបាសាក់ រហូតដល់ឆ្នេរសមុទ្រនៃខេត្តកែប។”
ក្រសួងធនធានទឹក បានបញ្ជាក់ថា ក្រោយបញ្ចប់ការសាងសង់ គម្រោង «ព្រែកជីកហ្វូណនតេជោ» នឹងក្លាយជាសរសៃឈាមសេដ្ឋកិច្ចដ៏សំខាន់ តាមរយៈការបង្កើតតំបន់សេដ្ឋកិច្ចពិសេស និងកំពង់ផែរណបថ្មីៗ។ ដោយឡែក ក្នុងវិស័យធនធានទឹក គម្រោងនេះនឹងជួយពង្រឹងប្រព័ន្ធធារាសាស្ត្រ បង្កើនផលិតកម្មកសិកម្ម រំដោះទឹកជំនន់ និងធានាបាននូវសន្តិសុខទឹកសម្រាប់ជីវភាពរស់នៅរបស់ប្រជាពលរដ្ឋតាមបណ្តោយព្រែក ប្រកបដោយចីរភាព។
ឯកឧត្តម ហេង សុធី អគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ក្នុងកិច្ចសម្ភាសន៍ពាក់ព័ន្ធនឹងគម្រោងព្រែកជីកហ្វូណនតេជោ ជូនដល់សារព័ត៌មាន Hello Guangxi កាលថ្ងៃទី៨ ខែមេសា ឆ្នាំ២០២៦ បានថ្លែងថា រាជរដ្ឋាភិបាលនិងភាគីពាក់ព័ន្ធ តែងបន្តយកចិត្តទុកដាក់អនុវត្តគម្រោងព្រែកជីកហ្វូណនតេជោ ដោយពុំមានពេលអាក់ខានម្តងណាឡើយ។
ឯកឧត្តម ក៏បានថ្លែងនូវសារដ៏សំខាន់ដែលបង្ហាញពីឆន្ទៈរបស់រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃ និងមោះមុតបំផុតរបស់សម្តេចមហាបវរធិបតី ក្នុងការសម្រេចឱ្យបានជោគជ័យនូវគម្រោងព្រែកជីកហ្វូណនតេជោ សម្រាប់ជាសមិទ្ធផលជាប្រវត្តិសាស្ត្ររបស់កម្ពុជា។
គួររំលឹកថា គម្រោង«ព្រែកជីកហ្វូណនតេជោគ្រោងបញ្ចប់សាងសង់នៅឆ្នាំ២០២៨ ដោយប្រើប្រាស់ទុនវិនិយោគប្រមាណ ១,៧ ពាន់លានដុល្លារ។
គម្រោងព្រែកជីកហ្វូណនតេជោ ជាគម្រោងប្រវត្តិសាស្ត្រតភ្ជាប់ផ្លូវទឹកទន្លេ-សមុទ្រ របស់កម្ពុជា មានប្រវែងជិត ១៨០គីឡូម៉ែត្រ ទទឹងមុខកាត់ផ្នែកខាងលើ ១០០ ម៉ែត្រ ក្រោម ៨០ម៉ែត្រ ជម្រៅទឹក ៥,៤ ម៉ែត្រ និងមានគន្លងនាវាចរណ៍ ២ គន្លង។
ផ្លូវទឹកនេះចាប់ផ្តើមពីព្រែកតាកែវ នៃទន្លេមេគង្គ ឆ្លងកាត់ព្រែកពោធិ៍ នៃទន្លេបាសាក់ រួចចូលតាមព្រែកតាហ៊ីង និងបន្តរហូតដល់សមុទ្រខេត្តកែប ឆ្លងកាត់ខេត្តកណ្តាល តាកែវ កំពត និងក្រុងកែប៕
Account
Security
Favourite Content