សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ចាប់តាំងពីពេលដែលរុស្ស៊ីបានសម្រេចចិត្តបើកប្រតិបត្តិការយោធាពិសេសទៅលើប្រទេសអ៊ុយក្រែនកាលពីឆ្នាំ២០២២ វាបានក្លាយទៅជាព្រឹត្តិការណ៍ជាប្រវត្តិសាស្ត្រដែលត្រូវបានមនុស្សមួយចំនួនមើលឃើញថា ជាពេលដែលពិភពលោកបានប្តូររបថសណ្តាប់ធ្នាប់ថ្មីពីប៉ូលមហាអំណាចតែមួយទៅជាពិភពលោកដែលអាចគ្រប់គ្រងដោយពហុប៉ូល។
មហាអំណាចធំៗលើលោកកំពុងតាមសម្លឹងមើលលទ្ធផលនៃជម្លោះរវាងរុស្ស៊ី និងអ៊ុយក្រែន រួមជាមួយនឹងសកម្មភាពគាំទ្រពីក្រោយដោយលោកខាងលិច ថាតើនឹងទៅជាយ៉ាងណា ខណៈដែលមហាយក្សខ្លះកំពុងមមាញឹកក្នុងការបង្កើនកម្លាំងសេដ្ឋកិច្ចរបស់ខ្លួនឡើងវិញត្រៀមឲ្យទាន់ពេលវេលានៃការផ្លាស់ប្តូរនយោបាយពិភពលោកលើកនេះ។
ក្នុងនោះគេសង្កេតឃើញថា ក្រៅតែពីរុស្ស៊ីដែលនឹងបែងចែកយកប៉ូលសេដ្ឋកិច្ចមួយដោយខ្លួនឯងហើយនោះ គេជឿជាក់ថាក៏មានចិននិងឥណ្ឌាផងដែរ ដែលអាចក្លាយទៅជាមហាអំណាចនៃប៉ូលថ្មីរបស់ពិភពលោកដែរតាមពីក្រោយអាមេរិក និងរុស្ស៊ី។
ឥណ្ឌាបច្ចុប្បន្នគឺជាប្រទេសដែលមានសេដ្ឋកិច្ចខ្លាំងជាងគេបំផុតទី៥របស់ពិភពលោក និងជាប្រទេសមានកម្លាំងបញ្ជាទិញ ឬ PPP (Purchasing Power Parity) លេខ៣របស់ពិភពលោក ហើយកាន់តែពិសេសសម្រាប់រដ្ឋាភិបាលក្រុងញូវដេលីដោយគិតត្រឹមខែមករាកន្លងទៅនេះ ឥណ្ឌាបានវ៉ាដាច់ប្រទេសចិនក្នុងការក្លាយខ្លួនទៅជាប្រទេសលេខ១មានចំនួនពលរដ្ឋច្រើនជាងគេបំផុត ឬប្រមាណជា ១,៤៤ពាន់លាននាក់ធៀបទៅនឹងចិនដែលមានត្រឹមតែ១,៤៣ពាន់លាននាក់។
តើនេះជាសញ្ញាដ៏ល្អសម្រាប់ឥណ្ឌាដើម្បីអាចបង្កើនលទ្ធភាពក្នុងការអភិវឌ្ឍសេដ្ឋកិច្ចជាតិ ក៏ដូចជាការបង្កើនឥទ្ធិពលរបស់ខ្លួនក្នុងតំបន់ដែរយ៉ាងណា?
ចម្លើយនោះគឺថា ប្រទេសឥណ្ឌានឹងមិនបណ្តោយឲ្យឧិកាសមាសនេះកន្លងផុតឡើយប៉ុន្តែអ្វីដែលឥណ្ឌាត្រូវខិតខំបន្ថែមដើម្បីជម្រុញកិច្ចការងារនេះនោះគឺការបង្កើនជំនាញដល់ធនធានមនុស្សរបស់ខ្លួននិងក៏ដូចជាការបង្កើនតំរូវការទីផ្សារក្នុងស្រុកនិងបន្តផ្តោតសំខាន់ទៅលើការគាំទ្រដល់បច្ចេកវិទ្យានិងក្រុមសហគ្រិនវ័យក្មេងដែលវាសុទ្ធតែជាកិច្ចការងារមិនមែនងាយស្រួលពេកនោះឡើយ។
គួរឲ្យកត់សំគាល់ដែរថា កាលពីឆ្នាំ២០២៣ក្នុងពេលដែលបណ្តាមហាអំណាចពិភពលោកអាចទទួលបានកំណើនសេដ្ឋកិច្ចជាមធ្យម៣ទៅ៣,១ភាគរយនោះ ឥណ្ឌាខ្លួនឯងត្រូវបាន IMF ព្យាករណ៍ថានឹងអាចកើនឡើងទៅដល់៦,៧ភាគរយហើយសេដ្ឋកិច្ចរបស់ឥណ្ឌាហាក់ដូចជាមិនមានភាពថមថយឡើយនៅក្នុងឆ្នាំ២០២៤ និងឆ្នាំ២០២៥ខាងមុខ។
ធនធានមនុស្សគឺជាចលករដ៏សំខាន់បំផុតសម្រាប់ឥណ្ឌាក្នុងការស្រូបទាញវិនិយោគ និងពាណិជ្ជកម្មបន្ថែមទៀតខណៈដែលឥណ្ឌាទើបតែបានបង្ហាញពិភពលោកបន្ថែមទៀតអំពីឥទ្ធិពលរបស់ខ្លួនក្នុងតំបន់តាមរយៈការបន្តទំនាក់ទនងជាមួយនឹងរុស្សីនិងអាមេរិកជាធម្មតាក្នុងស្ថានភាពសេដ្ឋកិច្ចសកលនិងជម្លោះ។ បន្ថែមពីនេះថ្មីៗនេះ ឥណ្ឌាទើបតែទទួលបានភាពជោគជ័យដ៏អស្ចារ្យបំផុតក្នុងការរៀបចំខ្លួនធ្វើជាម្ចាស់ផ្ទះនៃកិច្ចប្រជុំ G20 កាលពីខែកញ្ញាកន្លងមក។
គ្រប់វិស័យដែលមហាអំណាចនីមួយៗមានឥទ្ធិពលខ្លាំង ឥណ្ឌាក៏មានដូចគ្នា សូម្បីតែបច្ចេកវិទ្យាបង្ហោះផ្កាយរណប, បច្ចេកវិទ្យាយានអវកាស, ស្រាវជ្រាវទីអវិកាសរហូតទៅដល់បច្ចេកវិទ្យា ការផលិតអាវុធដូចជានុយក្លេអ៊ែរ និងមីស៊ីលបាញ់ចំងាយឆ្ងាយជាច្រើនប្រភេទទៀតផង។
ទោះបីជាយ៉ាងណាក្តី ភាពខ្លាំងរបស់ឥណ្ឌាដែលជាប្រទេសសំបូរទៅដោយធនធានមនុស្សនោះមិនប្រាកដថានឹងអាចហុចផលបានល្អប្រសើរដូចការរំពឹងទុកឡើយប្រសិនបើរដ្ឋាភិបាលមិនមានស្ថេរភាពនយោបាយល្អហើយរដ្ឋាភិបាលមិនបានរៀបចំផែនការអភិវឌ្ឍធនធានមនុស្សឲ្យបានត្រឹមត្រូវទេនោះហើយជាពិសេសក្នុងពេលវេលាដែលមហាអំណាចជាច្រើនកំពុងជួបបញ្ហារៀងខ្លួនបែបនេះដូច្នេះឥណ្ឌាត្រូវតែញាប់ដៃញាប់ជើងទាញយកផលចំណេញក្នុងពេលវេលាដ៏កម្រមួយនេះដើម្បីក្លាយខ្លួនទៅជាមហាអំណាចនៃប៉ូលថ្មីនិងបង្កើនការអភិវឌ្ឍសេដ្ឋកិច្ចកាន់តែខ្លាំងថែមទៀតឆ្ពោះទៅប្រជែងតំណែងឲ្យបានពីចិនឬរុស្សីនិងសូម្បីអាមេរិកក្តី៕
Account
Security
Favourite Content