ភ្នំពេញ ៖ ការធ្វើពាណិជ្ជកម្មទ្វេភាគីរវាងកម្ពុជា និងជប៉ុន ក្នុងរយៈពេល១១ ខែឆ្នាំ២០២១កន្លងទៅនេះ បានកើនដល់ជាង២ពាន់លានដុល្លារ។ នេះបើយោងតាមរបាយការណ៍ ដែលចេញផ្សាយដោយអង្គការពាណិជ្ជកម្មក្រៅប្រទេសរបស់ជប៉ុន ហៅកាត់ថា(JETRO) ដោយកម្ពុជា បាននាំចេញទំនិញទៅជប៉ុនមានតម្លៃជាង ១ ៦០០លានដុល្លារ ។
ទិន្នន័យដែលចេញផ្សាយដោយអង្គការពាណិជ្ជកម្មក្រៅប្រទេសជប៉ុន (Jetro) បានបញ្ជាក់ថាក្នុងរយៈពេល១១ខែ ឆ្នាំ២០២១ កម្ពុជាបាននាំចេញទំនិញទៅកាន់ទីផ្សារជប៉ុន មានតម្លៃជាង ១ ៦២៣លានដុល្លារ កើនឡើងជិត១០% បើធៀបនឹងរយៈពេលដូចគ្នាកាលពីឆ្នាំ២០២០។
Jetro បានបញ្ជាក់ថា ចាប់ពីខែមករា ដល់ខែវិច្ឆិកា ឆ្នាំ២០២១ ការដោះដូរពាណិជ្ជកម្មរវាងកម្ពុជា និងជប៉ុន កើនឡើងដល់ ២.១៤ពាន់ លានដុល្លារ ក្នុងនោះកម្ពុជាបាននាំចេញទំនិញទៅជប៉ុនមានតម្លៃ ១ ៦២៣ លានដុល្លារ កើនឡើង៩.១% ខណៈជប៉ុន នាំចូលទំនិញមកកម្ពុជាវិញមានតម្លៃ ៥២៥.៦២ លានដុល្លារ កើនឡើង២១.៥% បើធៀបនឹងរយៈពេលដូចគ្នាកាលពីឆ្នាំ២០២០ ។ ការធ្វើពាណិជ្ជកម្មរវាងជប៉ុន និងកម្ពុជា កាលពីឆ្នាំ២០២០ មានទំហំជាង២.១ពាន់លានដុល្លារ ធ្លាក់ចុះ៨.៣៥% បើធៀបឆ្នាំ២០១៩ ក្នុងនោះ កម្ពុជានាំចេញទៅជប៉ុនមានតម្លៃជាង១ ៦១៧លានដុល្លារ ធ្លាក់ ៦.៦% ចំណែកជប៉ុននាំចូលមកវិញមានតម្លៃ ៤៨៤.៧០លានដុល្លារធ្លាក់១៣.៨ភាគរយ។
កម្ពុជានាំទំនិញទៅកាន់ប្រទេសជប៉ុន មានដូចជាសម្លៀកបំពាក់ គ្រឿងបង្គុំអគ្គិសនី និងគ្រឿង បង្គុំអេឡិចត្រូនិក សម្ភារៈធ្វើដំណើរ រួមនឹងផលិតផលកសិកម្ម។។ ចំណែកជប៉ុនវិញ បាននាំទំនិញចូលមកកម្ពុជារួមមាន៖ គ្រឿងម៉ាស៊ីន និងផលិតផលប្រើប្រាស់បច្ចេកវិទ្យាទំនើបៗ ។ អ្នកជំនាញខាងសេដ្ឋកិច្ច ធ្លាប់លើកឡើងថា ក្រៅពីការនាំចេញទៅកម្ពុជា ក្នុងកំណើនល្អប្រសើរហើយនោះ ការវិនិយោគរបស់ជប៉ុននៅកម្ពុជា ក៏មានសន្ទុះកើនឡើងផងដែរ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានប្រាប់ AMS ថា សញ្ញាវិជ្ជមាននៃកំណើនការនាំចេញនាំចូលទំនិញរវាងកម្ពុជា និងជប៉ុន បានបង្ហាញពីដំណើរការទៅកាន់តែល្អប្រសើរ នៃទំនាក់ទំនងសេដ្ឋកិច្ចពាណិជ្ជកម្មរវាងកម្ពុជា-ជប៉ុន ខណៈកិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP) ចូលជាធរមានកាលពីដើមខែមករា ហើយជប៉ុនក៏ជាសមាជិកនៃកិច្ចព្រមព្រៀងនេះផង ជាមួយនឹងក្រុមហ៊ុនជាច្រើនមាននៅតំបន់សេដ្ឋកិច្ចពិសេស នឹងជួយឱ្យការធ្វើពាណិជ្ជកម្ម នឹងល្អប្រសើរជាងមុន ព្រមទាំងទាក់ទាញអ្នកវិនិយោគកាន់តែច្រើនផងដែរ។
លោកឧកញ៉ា លឹម ហេង បានមានប្រសាសន៍ថា៖
“ការនាំចេញមានការកើនឡើងនេះ គឺដោយសារមានក្រុមហ៊ុនវិនិយោគរបស់ជប៉ុនជាច្រើន ដែលគាត់មកវិនិយោគនៅកម្ពុជា ហើយនាំចេញទៅកាន់ជប៉ុន ដែលនាំឱ្យការនាំចេញកើនឡើង។ សង្ឃឹមថា នឹងមានជើងហោះហើរផ្ទាល់ ពីជប៉ុនមកកម្ពុជា ដើម្បីដឹកជញ្ជូនអ្នកដំណើរ អ្នកវិនិយោគិនមកកាន់កម្ពុជា ឱ្យបានកាន់តែច្រើនថែមទៀត”
លោកឧកញ៉ា លឹម ហេង បានបញ្ជាក់ដែរថា ជាមួយនឹងជំនឿទុកចិត្តរបស់អ្នកវិនិយោគជប៉ុនមកលើកម្ពុជា ជាពិសេសការចាក់វ៉ាក់សាំងបានល្អរបស់កម្ពុជា នោះប្រសិនបើប្រទេសក្នុងតំបន់មានបញ្ហាកូវីដមិនអាចដំណើរការចង្វាក់ផលិតកម្មបាន ជប៉ុនអាចបង្វែរផលិតផលទីផ្សារមកកន្លែងអាទិភាពដូចជាកម្ពុជាជាដើម។
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានប្រាប់ AMSថា កំណើនពាណិជ្ជកម្មទ្វេភាគីរវាងកម្ពុជា និងជប៉ុននេះគឺមិនអាចកាត់ផ្តាច់បាននូវសន្តិភាព ដែលជប៉ុនបានឱ្យតម្លៃមកប្រទេសកម្ពុជា នៃអ្នកវិនិយោគជប៉ុន ហើយបាននាំចេញនូវផលិតផលពីកម្ពុជាទៅប្រទេសជប៉ុន ដែលឆ្លើយតបទីផ្សាររបស់ជប៉ុនបាន។
លោកបណ្ឌិត ហុង វណ្ណៈ បានមានប្រសាសន៍ថា៖
“កិច្ចសហការរវាងវិនិយោគិនជប៉ុន និងវិស័យកសិកម្ម និងឧស្សាហកម្មកែច្នៃកាន់តែមានការបើកទូលាយនូវផលិតផល ដែលអាចនាំចេញដោយមានការសម្របសម្រួលល្អ ហើយគម្រោងបង្កើតកិច្ចព្រមព្រៀងកម្ពុជា-ជប៉ុន ដែលអាចឆ្លើយតបនូវតម្រូវការនៃការនាំចេញ នោះកំណើននឹងកាន់តែមានទិន្នន័យខ្ពស់ថែមទៀត”
បច្ចុប្បន្ននេះ ប្រទេសជប៉ុនបានឈរនៅលំដាប់ទី២ ក្នុងនាមជាប្រទេសដែលជួយជ្រោមជ្រែងប្រទេសកម្ពុជា តាមរយៈការផ្តល់ជំនួយស្ដារនិងសាងសង់ហេដ្ឋារចនាសម្ព័ន្ធនានា ជាពិសេសនៅក្នុង វិស័យសុខាភិបាល និងវិស័យអប់រំ ៕
ជីវប្រវត្តិ: បានបញ្ចប់ការសិក្សាថ្នាកអនុបណ្ឌិតផ្នែកប្រព័ន្ធផ្សព្វផ្សាយមកពីសហភាពសូវៀត និងមានបទពិសោធន៍ជាង ២០ឆ្នាំក្នុងវិស័យសារព័ត៌មាន។ បច្ចុប្បន្ន លោកជាអ្នកយកព័ត៌មានសេដ្ឋកិច្ចឱ្យសារព័ត៌មាន AMS Economy ។
របាយការណ៍ថ្មីៗ
មើលទាំងអស់ ➧ព័ត៌មានទូទៅ
មើលទាំងអស់ ➧អាជីវកម្មបរិយាបន្នចំនួន ៤ ដែលជួយដល់កសិករខ្នាតតូចនៅប្រទេសឥណ្ឌា
ធុរកិច្ចបរិយាបន្ន, ព្រឹត្តិការណ៍, អាជីវកម្មថ្មី និងនវានុវត្ត
• 28/03/2024
ស្របពេលដែលអាជីវកម្មបរិយាបន្នបន្តរីកចម្រើន និងច្នៃប្រឌិត ពួកគេមិនត្រឹមតែលើកកំពស់កសិករប៉ុណ្ណោះទេ ប៉ុន្តែថែមទាំងអាចជួយត្រួសត្រាយសម្រាប់កសិកម្មឥណ្ឌាផងដែរ