កំពង់ធំ ៖ សិប្បកម្មស្ត្រីកែច្នៃត្រីបឹងរំពេរ គឺជាសិប្បកម្មកែច្នៃត្រីមួយកន្លែងស្ថិតនៅភូមិចំបក់ ឃុំតាំងក្រសាំង ស្រុកសន្ទុក ខេត្តកំពង់ធំ បានប្រកាសថាខ្លួនមានសមត្ថភាពផលិតត្រីប្រកបដោយគុណភាព ស្របតាមស្តង់ដារអនាម័យខ្ពស់ និងគ្រោងចែកចាយផលិតផលរបស់ខ្លួនទៅកាន់ទីផ្សារនានានៅទូទាំងប្រទេស ជាពិសេសតាមបណ្តាផ្សារទំនើប ។

លោក ទន់ យីន ប្រធានសិប្បកម្មស្ត្រីកែច្នៃត្រីបឹងរំពេរ បានឱ្យដឹងថា សហគមន៍កសិកម្មរបស់ខ្លួនបានបង្កើតឡើងតាំងពីឆ្នាំ២០១៤ ពោលគឺតាំងពីនៅខ្នាតតូចនៅឡើយ រហូតមកដល់បច្ចុប្បន្នបានក្លាយទៅជាសហគមន៍អាជីវកម្ម ហើយកាលពីឆ្នាំ២០១៨ ក៏បានក្លាយជាសិប្បកម្មស្ត្រីកែច្នៃត្រីបឹងរំពេរ ក្រោមការសម្របសម្រួលពីកម្មវិធីផ្សព្វ​ផ្សាយបច្ចេកទេសកសិកម្មថ្មី ដែលធន់ទៅនឹងបម្រែបម្រួលអាកាសធាតុ (ASPIRE)​ស្ថិតក្នុងសហគមន៍កសិ​កម្ម ខេត្តកំពង់ធំ។

បច្ចុប្បន្នសមាជិករបស់សិប្បកម្មមួយនេះមានចំនួន ៥០នាក់ ភាគច្រើនជាស្ត្រី ដោយទទួលបានការបណ្តុះបណ្តាលផ្នែកកែច្នៃត្រីអនាម័យ និង​ក្លាយជាអ្នកមានជំនាញផ្នែកកែច្នៃត្រីអនាម័យ មានស្តង់ដាគុណភាពខ្ពស់ សោភ័ណភាពល្អ មានរសជាតិឆ្ងាញ់ មានតម្លៃសមរម្យ និងអាចរក្សាទុកបានយូរ ពីកម្មវិធី ASPI​RE នេះដូចគ្នា។

លោក ទន់ យីន បានបញ្ជាក់ថា សព្វថ្ងៃសិប្បកម្មស្ត្រីកែច្នៃត្រីបឹងរំពេរ កំពុងផ្ដោតលើការកែច្នៃត្រី ដូចជា ត្រីតាអោន ត្រីកេស និងត្រីរៀលជាដើម ហើយត្រីទាំងនោះត្រូវចាត់ថ្នាក់ជាពីរប្រភេទ គឺត្រីធម្មជាតិ (៧០ភាគរយ) និងត្រីចិញ្ចឹម (៣០ភាគរយ) ។ ក្នុងនោះសិប្បកម្មមានផលិតផលត្រីប្រភេទ ត្រីឆ្អើរចង្វាមូល ត្រីឆ្អើរត្រីតាអោន ត្រីឆ្អើរស្លឹកឬស្សី ត្រីឆ្អើរត្រីរ៉ស់ ត្រីឆ្អើរត្រីអណ្ដែង ប្រហិតត្រីស្លាតចំហុយ ប្រហិតត្រីស្លាតស្រស់ ងៀតត្រីរ៉ស់ ងៀតត្រីអណ្ដែង ផ្អកត្រី ប្រហុកសាច់ត្រីកំភ្លាញជាដើម។

ប្រធានសិប្បកម្មស្ត្រីកែច្នៃបឹងរំពេរូបនេះបានបញ្ជាក់ថា ៖

“យើងចែកជាពីរប្រភពនៃការផ្គត់ផ្គង់។ ប្រភពទី១-គឺត្រីមកពីធម្មជាតិ បានពីទន្លេមក និងទី២-គឺប្រភពត្រីចិញ្ចឹមដែលទិញកសិករដទៃ ព្រោះថាសហគមន៍ពុំទាន់មានលទ្ធភាពក្នុងការចិញ្ចឹមទេ ។ ដូច្នេះយើងទិញពីក្នុងខេត្តមក តែស្ថិតក្នុងគម្រោងរបស់រដ្ឋាភិបាល ដូចជាគម្រោងត្រីរបស់រដ្ឋបាលជលផលខេត្ត។”

សូមបញ្ជាក់ថា ចាប់តាំងពីបរិបទនៃការរីករាលដាលជំងឺកូវីដ-១៩មក គេសង្កេតឃើញថា វារីវប្បករមួយចំនួនបានងាកផ្តោតទៅលើការងារកែច្នៃបន្ថែម ដូចជា ការកែច្នៃត្រីឆ្អើរ ត្រីងៀត ត្រីប្រាហើម ផ្អក ប្រហុក ជាដើម ដើម្បីកាត់បន្ថយការកកស្ទះត្រី។ ការផ្តើមងាកទៅកែច្នៃផលិតផលរក្សាទុកបានយូរនេះ គឺជាច្រកចេញដ៏ល្អបំផុតមួយដែលជួយពង្រីកវិសាលភាពទីផ្សារត្រីកម្ពុជា ក៏ដូចជារួមចំណែកបង្កើនជីវភាពប្រជាកសិករផងដែរ។

លោក ទន់ យីន បានឱ្យដឹងថា សម្រាប់ទីផ្សារលក់ផលិតផលកែច្នៃ សព្វថ្ងៃសិប្បកម្មបានលក់ចូលទីផ្សារក្នុងស្រុកក្នុងទំហំតិចតួចនៅឡើយទេ ដោយអាចលក់ចេញបានប្រមាណ ១៥០គីឡូក្រាមប៉ុណ្ណោះក្នុងមួយខែ ដោយសារមិនទាន់មានទីផ្សារទៀងទាត់នៅឡើយ ហើយផលិតផលរបស់សិប្បកម្មមានដាក់លក់នៅទីផ្សារលក់រាយក្នុងផ្សារតាំងក្រសាំងខេត្តកំពង់ធំ  ខេត្តកំពង់ចាម និងភ្នំពេញ ខណៈដែលសហគមន៍សិប្បកម្ម របស់លោក ក៏បានសុំឱ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជួយសម្រួលរឿងចុះបញ្ជី ដើម្បីអាចនាំចូលទីផ្សារទំនើប ឬផ្សារម៉ាត ដើម្បីឱ្យគេទទួលស្គាល់កាន់តែច្រើន។

ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ កាលពីពេលកន្លងទៅនេះ បានស្វែងយល់ពីតម្រូវការចាំបាច់នានាក្នុងការពង្រឹង និងពង្រីកអាជីវកម្មកែច្នៃត្រីលក្ខណៈសហគមន៍នេះឱ្យរីកចម្រើនកាន់តែល្អប្រសើរ និងបានកោតសរសើរពីបច្ចេកទេសនៃការកែច្នៃត្រីគ្រប់ប្រភេទដែលមានឱជារស មានសោភ័ណភាពនៃការវេចខ្ចប់ និងការរក្សាទុកផលិតផលសម្រេចបានត្រឹមត្រូវ។

បន្ថែមពីនេះ បន្ទាប់ពីបានភ្លក្សរសជាតិ និងពិនិត្យមើលដោយផ្ទាល់ ឯកឧត្តមរដ្ឋមន្រ្តីក៏បានជំរុញឱ្យសិប្បកម្មកែច្នៃត្រីបឹងរំពេរ បង្កើនសមត្ថភាពកែច្នៃត្រីសម្រាប់​ចែកចាយលើទីផ្សារផងដែរ និងបានផ្ដល់ដំណោះស្រាយភ្លាមៗ ឆ្លើយតបទៅនឹងសំណូមពររបស់សហគមន៍ពាក់ព័ន្ធទៅនឹងទុន ទីផ្សារ និងការចុះបញ្ជីម៉ាកសញ្ញាសម្គាល់ផលិតផលកម្រិតស្តង់ដារផងដែរ៕