ជារៀងរាល់ឆ្នាំនៅពេលពិធីបុណ្យចូលឆ្នាំថ្មី កាន់តែខិតជិតមកដល់ គេសង្កេតឃើញនៅតាមគេហដ្ឋាន បូរី ខុនដូរ ក្រុមហ៊ុន និងសណ្ឋាគារជាច្រើន មានរៀបចំបំពាក់គោមផ្កាយនិងខ្សែរ ត្រីកោណជាដើម ដើម្បីលំអរលើកសម្រស់ក៏ដូចជាកាលើករាសីផងដែរ។ នេះក៏បានន័យថា ពិធីបុណ្យចូលឆ្នាំ ជាពេលវេលាដ៏មមាញឹកសម្រាប់អ្នកប្រកបអាជីវកម្មប្រភេទ នេះ។

នៅពេលគេធ្វើដំណើរតាមផ្លូវជាតិលេខ៦អា រហូតដល់ឃុំកំពង់ចិនខាងត្បូង ស្រុកស្ទោង ខេត្តកំពង់ធំ គេនឹងបានឃើញអ្នកភូមិចងព្យួរប្រដាប់ប្រដា សម្ភារៈតាំងលំអរគេហដ្ឋាន​លក់នៅ​តាមតូបមុខផ្ទះតគ្នាជាជួរៗ ដែលគេអាចកត់សំគាល់បានថា​ គោមផ្កាយមានប្រវត្តិចេញ​ពីភូមិនេះ​តែម្តង។  ចំណែកគ្រួសារឪពុកម្តាយអ្នកនាង អ៊ាន គីមអ៊ី ក៍មានទីតាំងលក់នៅទីនោះ​តកូនតចៅ​មកដែរ ហើយថែមទាំងបង្កើតទីតាំងថ្មីថែមមួយកន្លែងទៀតនៅជិតផ្សារទួលសង្កែ រាជធានី​ភ្នំពេញ​នេះតែម្តង។

បើតាមអ្នកនាង អ៊ាន គីមអ៊ី ដែលជាម្ចាស់អាជីវកម្មលក់គោមផ្កាយធ្វើពីឬស្សី និងក្រម៉ា បានឱ្យ​ដឹងថា អាជីវកម្មរបស់ខ្លួនចាប់ផ្ដើមទទួលបានការកម្មង់ទិញបណ្ដើរៗ តាំងតែពីអំឡុងចុង ខែមីនាមកម្លេះ។

ម្ចាស់អាជីវកម្មគោមផ្កាយធ្វើពីឬស្សីនិងក្រម៉ា ដែលឈរជើងលើទីផ្សារប្រមាណជា ២០ឆ្នាំមកនេះ បានរៀបរាប់ឱ្យដឹងទៀតថា ក្នុងអំឡុងខែកុម្ភៈ ជាពេលវេលាដែលម៉ូយធំៗកម្មង់ទិញ​ដើម្បី បន្តលក់រាយទៅឱ្យអតិថិជនផ្សេងទៀត ដោយរាល់ការបញ្ជាទិញម្ដងៗ គឺចាប់ពី ១០០សម្រាប់ ដល់ ៥០០សម្រាប់ ហើយក្នុងមួយសម្រាប់លក់ចេញក្នុងតម្លៃដុំពី ៣០០០រៀល ទៅ ៦០០០រៀល។

អ្នកនាង គីមអ៊ី បញ្ជាក់ឱ្យដឹងទៀតថា គោមផ្កាយរួមនឹងសម្ភារៈតាំងលំអរគេហរដ្ឋាននេះ ត្រូវបានផលិតដោយដៃលក្ខណៈគ្រួសារតែម្តង មិនបានបញ្ជាទិញពីប្រទេសជិតខាងនោះទេ ដែលជាការរួមចំណែកដល់ការផ្តល់ការងារដល់ពលរដ្ឋខ្មែរ ជាពិសេសចាស់ៗក្នុងភូមិ អាចរកចំណូលសម្រាប់ទប់ការចំណាយ ក្នុងគ្រួសារបានមួយចំណែកផងដែរ។

ចំណែកឯឬស្សី ដែលជាវត្ថុធាតុដើមវិញ មានមួយចំនួនបានពីគ្រួសារអ្នកនាងដាំខ្លួនឯងខ្លះ និងមួយចំនួនទៀតទិញពីអ្នកភូមិ។ សម្រាប់ក្រម៉ា និងថង់ផ្លាស្ទិកត្រូវបានឯណោះវិញ អ្នកនាងបាន​​បញ្ជាទិញពីបណ្តាខេត្តផ្សេងៗ ដូចជាក្រម៉ាពីអ្នកភូមិព្រែកសណ្តែក ស្រុកកោះសូទិន ខេត្តកំពង់ចាម និងក្រម៉ាអ្នកស្រុកកៀនស្វាយ ខេត្តកណ្តាលជាដើម។

សម្រាប់ដំណើរការផលិតសម្ភារៈលំអរទាំងនេះវិញ អ្នកនាង គីមអ៊ី បានឱ្យដឹងថា ដំបូងឡើយ​គេត្រូវទិញឬស្សីចាស់ៗល្អ មកពុះជ្រៀងធ្វើជាឆ្អឹងតូចៗ ហើយដាក់ត្រាំទឹក​មួយរយៈទើបស្រង់​យកមកហាលថ្ងៃ ជៀសវាងកុំឱ្យមេស៊ីពុកផុយ។ បន្ទាប់មក គេយកឬស្សី​មកពត់ធ្វើឆ្អឹងគោម​ជារាងផ្កាយ ចងលួសឱ្យជាប់ទើបកាត់ក្រម៉ា ឬថង់ផ្លាស្ទិកចងទៅតាមរាងឆ្អឹង​ឬស្សីដែលបានពត់​ទុក​នោះជាការស្រេច។

រាល់ដំណាក់កាលនីមួយៗ អ្នកនាង និងក្រុមការងារបានផ្ចឹតផ្ចង់ធ្វើយ៉ាងយកចិត្តទុកដាក់ ដោយធ្វើយ៉ាងណា ធានាថាសម្ភារៈដែលផលិតបានមានគុណភាពល្អ អាចប្រើប្រាស់បានច្រើន ឆ្នាំ។

បើក្រឡេកទៅមើលអតិថិជនដែលបញ្ជាទិញស្ទើរតែរៀងរាល់ឆ្នាំវិញគឺមាននៅ ខេត្តកំពង់ចាម ខេត្តកំពត តាកែវ កណ្តាល ព្រៃវែង និងម៉ូយខេត្តផ្សេងៗមួយចំនួនទៀត ពិសេសអតិថិជន​ប្រចាំផ្សារអូរឬស្សី ក្នុងក្រុងភ្នំពេញ និងអតិថិជននៅស្រុកពញាឮ ខេត្តកណ្តាលតែម្តង​ ដែលកម្ម៉ង់ទិញច្រើនៗចន្លោះពី ៥០០ទៅ១០០០សម្រាប់ក្នុងមួយឆ្នាំៗ៕