ភ្នំពេញ ៖ ការប្រើប្រាស់ “កម្ចី ឬឥណទានជាមួយនឹងជាធនាគារ ឬគ្រឹះស្ថានមីក្រូហិរញ្ញវត្ថុ” ដែលជាទូទៅត្រូវបានគេហៅជាភាសាសាមញ្ញថា “បំណុល” នោះ ជាធម្មតាមានទាំងផលល្អ និងភាពអាក្រក់។ ភាពល្អនោះគឺនៅពេលបើប្រាស់បំណុលត្រូវតាមគោលដៅ វានឹងអាចបង្កើនចំណូល និងផលចំណេញត្រឡប់មកវិញ ប៉ុន្តែភាពអាក្រក់នោះគឺការប្រើប្រាស់កម្ចីក្រៅផ្លូវការ ឬខុសច្បាប់ និងការប្រើប្រាស់បំណុលមិនចំគោលដៅ ឬទិញរបស់របរដែលបង្កើនបន្ទុកបំណុលជាដើម។

ជាទូទៅបំណុលដែលយកទៅប្រើជាប្រយោជន៍សម្រាប់បង្កើតទ្រព្យ បង្កើនលំហូរសាច់ប្រាក់សម្រាប់ផ្គត់ផ្គង់ជីវភាពរស់នៅដោយការប្រុងប្រយ័ត្ន និងគ្រប់គ្រង់ហានិភ័យបានល្អ គឺត្រូវបានចាត់ទុកថាជាបំណុលល្អ។ តែផ្ទុយទៅវិញបើយកបំណុលទៅទិញសម្ភារៈនិយម ដោយមិនបានពិនិត្យមើលពីស្ថានភាពហិរញ្ញវត្ថុខ្លួនឯង ឬស្ថានភាពចំណូលខ្លួនឯង ឬធ្វើការវិនិយោគរយៈពេលវែង ដែលមានហានិភ័យខ្ពស់ គឺត្រូវបានចាត់ទុកថាជាបំណុលអាក្រក់។ បំណុលអាចបង្កើតទ្រព្យ ហើយបំណុលក៍អាចក្លាយជាបំណុលវណ្ឌ៍ក៍បានដែរ។ ដូច្នេះសូមប្រើប្រាស់បំណុលដោយការប្រុងប្រយ័ត្នចៀសវាងការប្រើប្រាស់បំណុលដើម្បីសម្ភារៈនិយម។​

ទន្ទឹមនេះ មានសំនួរលើកឡើងថា តើអ្វីទៅជាបំណុលល្អ និងបំណុលអាក្រក់?

បំណុលល្អគឺជា​បំណុលដែលជួយផ្ដល់ផលចំណេញដល់យើងសម្រាប់ពេលបច្ចុប្បន្ន និងពេលអនាគត។ បំណុលល្អអាចជួយបង្កើនទ្រព្យឱ្យយើងកាន់តែច្រើនថែមទៀត នៅពេលដែលយើងប្រើប្រាស់កម្ចីត្រូវទៅតាមគោលដៅ ហើយលើសពីនេះ បំណុលល្អជាទូទៅមានការប្រាក់ទាបសមរម្យ ឬកម្ចីផ្លូវការពីធនាគារ និងគ្រឹះស្ថានហិរញ្ញវត្ថុ ដែលមានច្បាប់ការពារត្រឹមត្រូវ។ ឧទាហរណ៍ ៖ បំណុលល្អ គឹយើងយកលុយទាំងអស់នោះទៅទិញផ្ទះ ឬអចលនទ្រព្យ ព្រោះវាមិនត្រឹមតែផ្ដល់ភាពងាយស្រួលដល់ការរស់នៅរបស់យើងនោះទេ វាថែមទាំងកើនតម្លៃពីមួយឆ្នាំទៅមួយឆ្នាំទៀតផង។ មួយទៀត ការវិនិយោគលើការសិក្សា គឺជាការវិនិយោគទៅលើអនាគតរបស់អ្នក ព្រោះបុគ្គលជោគជ័យគ្រប់ៗរូបតែងតែបង្កើនចំណេះដឹង ព្រោះផលតបស្នងរបស់វាវិញ គឺច្រើនលើសលប់ នៅពេលមានចំណេះដឹងជ្រៅជ្រះ។ លើសពីនេះ ការប្រើប្រាស់កម្ចីផ្លូវការដើម្បីពង្រីកអាជីវកម្ម ដោយមានផែនការច្បាស់លាស់ អាចជួយឱ្យបង្កើនចំណូលបន្ថែម នៅពេលអាជីវកម្មរីកចម្រើន។ ការខ្ចីបុលដើម្បីពង្រីកអាជីវកម្មគឺក៏ជាបំណុលល្អផងដែរ ហើយគ្រប់អាជីវកម្មទាំងអស់ទាមទារដើមទុនដើម្បីពង្រីក និងរកផលចំណេញ។ នៅពេលដែលអ្នកអាចរកផលចំណេញបានហើយ នោះអ្នកអាចទូទាត់សងបំណុលបានងាយស្រួល។

បំណុលអាក្រក់៖ បំណុលអាក្រក់គឺបង្កើនបន្ទុកបន្ថែមដល់យើង ហើយវាមានការប្រាក់ក៏ខ្ពស់ផងដែរ ដូចជាកម្ចីក្រៅផ្លូវការ ឬចងការអ្នកផ្តល់កម្ចីក្រៅផ្លូវការ ដែលអាចឱ្យយើងធ្លាក់ចូលទៅក្នុងអន្ទាក់បំណុល និងពិបាកទូទាត់សង ដោយសារការប្រាក់ខ្ពស់រហូតដល់ ៣០%ក្នុងមួយខែក៏មាន និងការជំរិតទារប្រាក់ជាដើម។

មួយទៀត ការប្រើប្រាស់បំណុលទៅទិញទៅទិញសម្ភារៈនិយម និងហ៊ឺហាបង្អួតគេ។ យើងសូមលើកជាឧហរណ៍មួយ ៖ ការចំណាយទៅលើរបស់របរដែលឆាប់ធ្លាក់ថ្លៃ ហើយទាមទារឱ្យយើងអ្នកចំណាយទៅលើវាជាប្រចាំថែមទៀត ដូចជាការទិញឡានសម្រាប់ហ៊ឺហា (បើយើងទិញឡានដើម្បីបម្រើដល់គោលបំណងអាជីវកម្ម នោះវាអាចជាបំណុលល្អ) ព្រោះពេលខ្លះអ្នកអាចខ្ចីលុយគេក្រៅផ្លូវការ ដើម្បីមកទិញឡានជាមួយការប្រាក់ខ្ពស់ ហើយក៏ត្រូវចំណាយលើវាជាប្រចាំផងដែរ ដូចជាទៅលើការចាក់សាំង ម៉ាស៊ូត ការជួសជុលជាដើម។ លើសពីនេះ តម្លៃរបស់វាគឺមានតែចុះមិនងាយនឹងកើនឡើងនោះទេ។ និយាយរួម គឺផលប្រយោជន៍ដែលឡានផ្ដល់ឱ្យ គឺតិចជាការចំណាយទៅលើវាដែលអ្នកអាចចាត់ទុកវាថាជាបំណុលអាក្រក់។

សូមបញ្ជាក់ផងដែរថា មិនមែនបំណុលទាំងអស់សុទ្ធតែអាក្រក់នោះទេ សំខាន់ឱ្យតែអ្នកចេះប្រើបំណុលនោះឱ្យចំគោលដៅ ហើយវាអាចបង្កើនចំណូលដល់អ្នក និងមិនដាក់សម្ពាធលើសលប់ជាដើម៕