ភ្នំពេញ ៖ ស្របពេលវិស័យធនាគារ និងហិរញ្ញវត្ថុនៅកម្ពុជាកំពុងមានរីកចម្រើន ធនាគារ ហត្ថា បាននិងកំពុងដើរតួនាទីយ៉ាងសំខាន់ក្នុងការចូលរួមចំណែកដល់ការអភិវឌ្ឍន៍សេដ្ឋកិច្ចរបស់ប្រជាពលរដ្ឋ ក៏ដូចជាសេដ្ឋកិច្ចជាតិ តាមរយៈការផ្តល់ផលិតផលហិរញ្ញវត្ថុសម្បូរបែបជូនប្រជាពលរដ្ឋ និងនាំមកនូវបច្ចេកវិទ្យាហិរញ្ញវត្ថុ ដើម្បីសម្រួលដល់ការប្រើប្រាស់សេវាធនាគារប្រចាំថ្ងៃរបស់ពួកគាត់។

លោកឧកញ៉ា ហួត អៀងតុង ប្រធានអគ្គនាយក ធនាគារ ហត្ថា បានមានប្រសាសន៍ថា បច្ចុប្បន្ននេះ វិស័យធនាគារ និងហិរញ្ញវត្ថុនៅកម្ពុជា នៅតែមានភាពរឹងមាំ ហើយទន្ទឹមនឹងនេះ ធនាគារ ហត្ថា ចូលរួមចំណែកយ៉ាងច្រើនក្នុងការអភិវឌ្ឍន៍សេដ្ឋកិច្ចរបស់ប្រជាពលរដ្ឋ តាមរយៈការផ្តល់សេវាហិរញ្ញវត្ថុជូនដល់អ្នកប្រើប្រាស់ ឬអតិថិជនរបស់ធនាគារ។

លោកឧកញ៉ា ហួត អៀងតុង  បានបញ្ជាក់ដូច្នេះថា ៖

“យើងឃើញថា យើងបានផ្តល់សេវាហិរញ្ញវត្ថុទៅដល់ប្រជាពលរដ្ឋ ហើយប្រជាពលរដ្ឋដែលជាអតិថិជនប្រើប្រាស់សេវាហិរញ្ញវត្ថុ របស់ធនាគារ ហត្ថា មានចំនួនជាង ៣០ ម៉ឺននាក់ ដែលបានយកទុនពីធនាគារ ហត្ថា ទៅប្រើប្រាស់ក្នុងមុខរបរទទួលទាន។ បច្ចុប្បន្ន ទុនរបស់ធនាគារ ហត្ថា កើនឡើងដល់ជា ១,៩ ពាន់លានដុល្លារ ដែលជាចំនួនកើនឡើងគួរកត់សម្គាល់។”

លោកឧកញ៉ា បានបញ្ជាក់ប្រាប់ថា ៖

“ធនាគារ ហត្ថា មានគោលដៅរួមមួយ គឺការចូលរួមជំរុញ និងលើកកម្ពស់កម្រិតជីវភាពរបស់ប្រជាពលរដ្ឋយើង។ យើងផ្តោតអារម្មណ៍ច្រើនទៅលើមុខរបររកស៊ីទទួលទាន ធម្មតាយើងហៅថា SMEs (សហគ្រាសធុនតូច និងមធ្យម) ដែលធនាគារ ហត្ថា ផ្តោតអារម្មណ៍ក្នុងការផ្គត់ផ្គង់ហិរញ្ញវត្ថុ ដើម្បីជួយជំរុញមុខជំនួញអាជីវកម្មទាំងអស់នោះ ឱ្យពួកគាត់មានដើមទុនគ្រប់គ្រាន់ ក្នុងការពង្រីកអាជីវកម្មរបស់ពួកគាត់។”

ជាមួយគ្នានេះ បច្ចេកវិទ្យានៅក្នុងវិស័យធនាគារ និងហិរញ្ញវត្ថុនៅកម្ពុជា ក៏កំពុងមានការរីកចច្រើនផងដែរនោះ ធនាគារ ហត្ថា បានវិនិយោគលើការនាំមកនូវបច្ចេកវិទ្យាហិរញ្ញវត្ថុចុងក្រោយសម្រាប់ទីផ្សារកម្ពុជា ពិសេសការអភិវឌ្ឍ Hattha Mobile ដើម្បីសម្រួលដល់ប្រជាជនក្នុងការប្រើប្រាស់សេវាកម្មហិរញ្ញវត្ថុនានារបស់ធនាគារដោយផ្ទាល់។

លោកឧកញ៉ា ហួត អៀងតុង  បានលើកឡើងថា ប្រទេសកម្ពុជាទាំងមូល ក៏ដូចជាប្រជាពលរដ្ឋ កំពុងមានការរីកចម្រើន និងទទួលយកនូវបច្ចេកវិទ្យាថ្មីៗ ដូច្នេះដើម្បីដើរឱ្យស្របនឹងទីផ្សារ ធនាគារ ហត្ថា បានផ្តោតលើការវិនិយោគលើបច្ចេកវិទ្យាហិរញ្ញវត្ថុ។ បច្ចេកវិទ្យាឈានមុខគេនាពេលបច្ចុបន្នក្នុងវិស័យហិរញ្ញវត្ថុ គឺ Mobile App ដែលយើងគិតថា ជា App មួយ ជួយសម្រួលដល់អតិថិជនរបស់យើងបានច្រើន ក្នុងការធើ្វប្រតិបត្តិការហិរញ្ញវត្ថុ ដោយមិនចាំបាច់មកធនាគារដោយផ្ទាល់។ ដូច្នេះ វាចំណេញពេលវេលា និងថវិកា ដោយមិនចាំបាច់ប្រើថវិកាធ្វើដំណើរមករកសាខាការិយាល័យ ហើយអតិថិជនអាចធ្វើប្រតិបត្តិការគ្រប់យ៉ាងតាមរយៈទូរសព្ទដៃរបស់ពួកគាត់ នៅគ្រប់ទីកន្លែង និងគ្រប់ពេលវេសា។

លោកឧកញ៉ា ហួត អៀងតុង  បានថ្លែងថា ៖

“មាន Mobile Banking ឬ Hattha Mobile របស់យើង គឺដូចមានសេវាធនាគារគ្រប់សព្វ […] មាន Mobile Banking មួយ ហាក់ដូចជាមានធនាគារនៅក្នុងដៃ ដូច្នេះអតិថិជនអាចគ្រប់គ្រងគណនីរបស់គាត់ ពិនិត្យតុល្យភាព សាច់ប្រាក់ក្នុងគណនី ធ្វើប្រតិបត្តការសាច់ប្រាក់ ធ្វើប្រតិបត្តិការមិនមែនសាច់ប្រាក់។ អតិថិជនអាចធ្វើការទូទាត់លើការទិញទំនិញ ផ្ទេរសាច់ប្រាក់ទៅកាន់គ្រប់ធនាគារទាំងអស់ និងសេវាផ្សេងៗទៀត។ និយាយជារួម មាន Hattha Mobile App នៅក្នុងទូរសព្ទដៃ ដូចជាមានធនាគារមួយនៅក្បែរខ្លួន។”

ដោយឡែក សម្រាប់គោលដៅក្នុងរយៈពេលមធ្យម និងរយៈពេលវែងរបស់ធនាគារ ហត្ថា ក្នុងការលើកកម្ពស់វិស័យហិរញ្ញវត្ថុនៅកម្ពុជា ពិសេសេសេដ្ឋកិច្ចជាតិ និងសេដ្ឋកិច្ចប្រជាជន លោកឧកញ៉ា បានថ្លែងបញ្ជាក់ថា ធនាគារ ហត្ថា នៅតែមានជំហរក្នុងការចូលអភិវឌ្ឍន៍សេដ្ឋកិច្ចរបស់ប្រជាពលរដ្ឋ តាមរយៈការផ្តល់សេវាហិរញ្ញវត្ថុគ្រប់ប្រភេទទាំងអស់ ដែលអតិថិរបស់យើងត្រូវការ ហើយយើងផ្តល់សេវាកម្មថ្មីៗជាច្រើនទៀត ពិសេសផ្តល់ឥណទាន និងជួយដល់ SMEs ក្នុងការទទួលបានកម្ចី ដើម្បីឆ្លើយតបនឹងមុខរបរទទួលទានរបស់ពួកគាត់។

សូមបញ្ជាក់ផងដែរថា ធនាគារ ហត្ថា បានផ្តល់សេវាកម្មហិរញ្ញវត្ថុយ៉ាងទូលំទូលាយសម្រាប់អតិថិជន រួមមានប្រាក់កម្ចី ប្រាក់បញ្ញើសន្សំ សេវាផ្ទេរប្រាក់ក្នុងស្រុក សេវាផ្ទេរប្រាក់ឆ្លងធនាគារទៅកាន់ធនាគារក្នុងស្រុក សេវាផ្ទេរប្រាក់ឆ្លងប្រទេស សេវាអេធីអឹម សេវាធនាគារចល័ត (Hattha Mobile) សេវាបើកប្រាក់បៀវត្សរ៍ ក៏ដូចជាភ្នាក់ងារធានារ៉ាប់រង​ និងសេវាកម្មហិរញ្ញវត្ថុជាច្រើនទៀត។ គ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត បានប្រែក្លាយជា ធនាគារពាណិជ្ជជាផ្លូវការក្នុងនៅ ខែសីហា ឆ្នាំ ២០២០ បន្ទាប់ពីបានផ្តល់សេវាហិរញ្ញវត្ថុក្នុងប្រទេសកម្ពុជាអស់រយៈពេលជិត ៣០ ឆ្នាំ។ គិតត្រឹមខែមីនា ឆ្នាំ ២០២៣ ធនាគារ ហត្ថា មានការិយាល័យសាខាសរុបចំនួន ១៧៧ ការិយាល័យ ATM ចំនួន ១៤៣ ទីតាំង និងគណនីរបស់អតិថិជនជាង ៦៤៣ ពាន់គណនី ដែលមានផលប័ត្រសរុបជាង ១.៩ ពាន់លានដុល្លារ និងផលប័ត្រសន្សំសរុបជាង ១.៣ ពាន់លានដុល្លារ៕