សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្រូវ ជាដំណាំមានសក្ដានុពលខ្ពស់មួយរបស់កម្ពុជា ខណៈដែលប្រមុខរាជរដ្ឋាភិបាលដែលមានក្រសួងកសិកម្ម រុក្ខាប្រមាញ់ និងនេសាទ ជាសេនាធិការ បានយកចិត្តទុកដាក់ដាក់ចេញនូវយុទ្ធសាស្ត្រជាច្រើនក្នុងគោលបំណងពង្រឹង និងបង្កើនលទ្ធភាពក្នុងការផលិត ជាពិសេសផ្តោតទៅលើគុណភាពដើម្បីប្រកួតប្រជែងនៅលើទីផ្សារអន្តរជាតិ ខណៈដែលស្រូវ-អង្ករកម្ពុជា ជាប់ចំណាត់ថ្នាក់អង្ករល្អដាច់គេលើពិភពលោក។
សម្រាប់ពូជស្រូវនៅក្នុងប្រទេសកម្ពុជាមានច្រើនប្រភេទណាស់ ប៉ុន្តែប្រភេទស្រូវដែលត្រូវបានគេស្គាល់យ៉ាងទូលាយជាងគេរួមមានដូចជា ស្រូវសែនពិដោរ ស្រូវក្រអូបផ្ការំដួល និងស្រូវក្រអូបផ្ការំដេង ដែលសុទ្ធសឹងតែផ្ដល់ទិន្នផលខ្ពស់ មានក្លិនក្រអូប មានគុណភាពអង្ករល្អ ភ្លឺថ្លា វែងរលូន និងបាយទន់ឆ្ងាញ់ ពិសេសជាពូជមានប្រភេទអង្ករតម្លៃខ្ពស់ទាំងនៅក្នុងទីផ្សារក្នុងស្រុក និងអន្តរជាតិ។
ចំពោះស្រូវសែនពិដោរ ជាប្រភេទពូជស្រូវស្រាល និងជាពូជស្រូវក្រអូបដែលបានបញ្ចេញ និងផ្សព្វផ្សាយឱ្យកសិករប្រើប្រាស់តាំងពីឆ្នាំ២០០២ ហើយមកដល់បច្ចុប្បន្នស្រូបនេះកំពុងប្រើប្រាស់ក្នុងផលិតកម្មស្រូវប្រាំង និងស្រូវស្រាលដើមរដូវដោយកសិករនៅទូទាំងប្រទេស។ ពូជស្រូវនេះ អាចផ្ដល់ទិន្នផលពី ៣.៥តោន -៥.៥តោនក្នុងមួយហិកតា ឬស្ថិតក្នុងលក្ខខណ្ឌអំណោយផលវាអាចផ្ដល់ផលដល់ ៨-១០តោនក្នុងមួយហិកតា។
ពូជសែនពិដោរ ជាប្រភេទពូជស្រូវមិនប្រកាន់រដូវ ដែលអាចដាំដុះបាននៅគ្រប់រដូវកាល ជាពិសេសស្រូវដើមរដូវវស្សា ស្រូវប្រដេះទឹក និងស្រូវរដូវប្រាំង។ ពូជនេះមានអាយុកាលចាប់ពីថ្ងៃសាប ដល់ថ្ងៃច្រូតកាត់គឺ ១១០-១២០ថ្ងៃ មានកម្ពស់ដើមពី ៩៥-១១០សង់ទីម៉ែត្រ ចំនួនដើមបែកផ្ដល់ផលពី ៥-២០ដើមក្នុងមួយគុម្ព ប្រវែងកួរមានពី ២០-៣០សង់ទីម៉ែត្រ និងចំនួនគ្រាប់ក្នុងមួយកួរមានពី ១១០-១៧០គ្រាប់។
ចំណែកពូជស្រូវក្រអូបផ្ការំដួល ជាប្រភេទស្រូវកណ្ដាលប្រកាន់រដូវ ដែលត្រូវបានបញ្ចេញ និងផ្សព្វផ្សាយឱ្យកសិករប្រើប្រាស់តាំងពីឆ្នាំ ១៩៩៩ ហើយមកដល់ពេលនេះវាក៏នៅតែពេញនិយមនៅក្នុងផលិតកម្មស្រូវវស្សាផងដែរ។ ស្រូវប្រភេទនេះចាប់ចេញផ្កានៅពាក់កណ្ដាលខែតុលា និងច្រូតកាត់នៅពាក់កណ្ដាលខែវិច្ឆិកាអាស្រ័យតាមអាកាសធាតុ និងពេលវេលាដាំដុះ។
វាមានកម្ពស់ដើមពី ១១០-១៧០សង់ទីម៉ែត្រ ចំនួនដើមបែកផ្ដល់ផលពី ៥-១០ដើមក្នុងមួយគុម្ព ហើយក្នុងលក្ខខណ្ឌដីមានជីជាតិល្អ និងអនុវត្តដាំដុះតាមប្រព័ន្ធប្រពលវប្បកម្មដំណាំស្រូវ ចំនួនដើមបែក អាចផ្ដល់ផលដល់ទៅ ១៤-១៨ដើមក្នុងមួយគុម្ព។ ស្រូវនេះមានប្រវែងេកួរមានពី ២០-៣០សង់ទីម៉ែត្រ និងចំនួនគ្រាប់ក្នុងមួយកួរមានពី ១១០-១៥០គ្រាប់។ ពូជផ្ការំដួល ជាប្រភេទពូជធន់នឹងការលិចទឹកជំនន់បានល្អតែវាមិនសូវធន់នឹងមមាចត្នោតទេ ហើយអាចមានទិន្នផលពី ៣.៥-៥.៥ តោនក្នុងមួយហិកតា។
ចុងក្រោយគឺពូជស្រូវក្រអូបផ្ការំដេង ត្រូវបានបញ្ចេញ និងផ្សព្វផ្សាយឱ្យកសិករប្រើប្រាស់នៅឆ្នាំ២០០៦ ហើយមកដល់បច្ចុប្បន្ននេះ ពូជស្រូវផ្ការំដេង កំពុងពេញនិយមប្រើប្រាស់ និងប្រជាកសិករធ្វើការដាំដុះនៅក្នុងផលិតកម្មស្រូវរដូវវស្សា។ ពូជនេះមានទិន្នផលខ្ពស់ ឯគុណភាពអង្ករក៏មានភាពភ្លឺថ្លា វែងរលូនល្អ ហើយបាយក៏ទន់ឆ្ងាញ់ពិសារ។
ពូជស្រូវផ្ការំដេង ជាពូជដែលធន់នឹងការលិចទឹក ឬទឹកជំនន់រយៈពេលវែង រីឯទិន្នផល អាចទទួលបានពី ៣.៥-៥.៨តោនក្នុងផ្ទៃដីមួយហិកតា។ ពូជស្រូវប្រភេទនេះ ជាពូជដែលប្រកាន់រដូវមធ្យម ចាប់ចេញផ្កាពីពាក់កណ្ដាលខែតុលា អាស្រ័យទៅលើអាកាសធាតុ និងពេលវេលាដាំដុះ។ កម្ពស់ដើមរបស់ពូជផ្ការំដួលប្រែប្រួលពី ៨០-១៧៥សង់ទីម៉ែត្រ និងចំនួនដើមបែបផ្ដល់ផលពីចាប់ពី ៨-២០ដើម ក្នុងមួយគុម្ពអាស្រ័យទៅតាមប្រភេទដី។ ចំនួនគ្រាប់ក្នុងមួយកួរមានចាប់ពី ១១០-១៥០គ្រាប់ និងមានប្រវែងកួរ ១៩-៣១សង់ទីម៉ែត្រ៕
Account
Security
Favourite Content