ការបណ្តុះកូនទុរេនលក់ គឺជារបរមួយដែលកំពុងលាក់មុខនៅក្នុងប្រទេសកម្ពុជា ប៉ុន្តែទោះជាដូច្នេះ របរនេះកំពុងមានការគាំទ្រខ្លាំងនៅលើទីផ្សារ ដោយសារកសិករខ្មែរនៅតាមបណ្តាខេត្តឆា្ងយៗ មានទំនោរ​ដាំទុរេនកាន់តែច្រើនឡើងៗ។

លោក ផាន់ រក្សា ម្ចាស់កសិដ្ឋានបណ្តុះកូនទុរេន នៅភូមិដីក្រហម សង្កាត់អូតាវ៉ៅ ក្រុងប៉ៃលិន បានចាប់យករបរបណ្តុះកូនទុរេនលក់អស់រយៈពេលជាង ១០ ឆ្នាំមកហើយ ដោយមានការគាំទ្រខ្លាំងពីកសិករខ្មែរនៅក្នុងប្រទេស និងចុងក្រោយនេះ ទទួលបានការគាំទ្រពីក្រុមហ៊ុនធំៗរបស់ចិន ដែលចូលមកដាំទុរេននៅកម្ពុជាទៀតផង។

លោកបានថ្លែងថា៖

“ដោយសារឃើញសក្តានុពលដាំដុះទុរេន ក្រុមហ៊ុនចិនជាច្រើនបានចូលមកបណ្តាក់ទុនដាំទុរេននៅកម្ពុជា ជាក្រុមហ៊ុនខ្នាតធំដាំដុះទុរេននៅលើផ្ទៃដីចាប់ពី ១០០ ហិកតាឡើងទៅ ដែភាគច្រើននៅខេត្តស្ទឹងត្រែង ក្រចេះ រតនគីរី មណ្ឌលគីរី និងតំបន់សំឡូតខេត្តបាត់ដំបង។”

ម្ចាស់កសិដ្ឋានខាងលើ មានទីតាំងបណ្តុះកូនទេរេនមួយកន្លែងផ្សេងទៀត ស្ថិតនៅស្រុកសំឡូត ខេត្តបាត់ដំបង នៅក្បែរគម្រោងអភិរក្សព្រៃឈើនិងសត្វព្រៃរបស់លោកស្រី Angelina Jolie តារាសម្តែង Hollywood។ ជារៀងរាល់ឆ្នាំ កសិដ្ឋានទាំងពីរទីតាំងខាងលើផ្គត់ផ្គង់កូនទុរេនទៅដល់កសិករនៅទូរទាំងប្រទេស បានចន្លោះពីជាង ១០ ម៉ឺនកូនទៅដល់ ២០ ម៉ឺនកូន ដោយ ០១ ដើមលក់ចេញក្នុងតម្លៃជាមធ្យមចន្លោះពី ២០,០០០ រៀលទៅដល់ ២៨,០០០រៀល សម្រាប់កូនទុរេនដែលមានអាយុជិត ០១ឆ្នាំ។​

របរបណ្តុះកូនទុរេននេះ អាចចាត់ទុកថាជារបរលាក់មុខមួយ ដោយសារមិនមានអ្នកចេះជំនាញបណ្តុះកូនទុរេនច្រើននោះទេនៅក្នុងប្រទេសកម្ពុជា ហើយក៍មិនមានគ្រូជំនាញ បើកវគ្គបណ្តុះបណ្តាលបង្រៀនបណ្តុះកូនទុរេននោះដែរ ប៉ុន្តែដោយសារម្ចាស់កសិដ្ឋានខាងលើ ធ្លាប់មានបទពិសោធន៍ធ្វើការជាកម្មករបណ្តុះកូនទុរេននៅក្រៅប្រទេសជាង ២ ឆ្នាំ ទើបចាប់យករបរនេះ នៅពេលត្រឡប់មកដល់ស្រុកកំណើតវិញ។ ទោះជាដូច្នេះលោកអះអាងថា លោកនឹងបង្រៀនវគ្គបណ្តុះកូនទុរេននេះទៅដល់ប្រជាជនខ្មែរនៅពេលខាងមុខ។

លោកនិយាយថា៖

“ប៉ុន្តែនៅពេលក្រោយ ខ្ញុំនឹងបើកវគ្គបង្រៀនបណ្តុះកូនទុរេននេះទៅដល់យុវជនខ្មែរ ឱ្យមានជំនាញបណ្តុះកូនទុរេនឱ្យបានកាន់តែច្រើន ដោយសារដំណាំប្រភេទនេះកំពុងពេញនិយមនៅលើទីផ្សារប្រទេសកម្ពុជា ដែលអាចជួយរកចំណូលបានសមរម្យជូនកសិករ។”  

ចំពោះវិធីសាស្រ្ត​បណ្តុះកូនទុរេនវិញ ដំបូងឡើយកសិករត្រូវយកគ្រាប់ពូជល្អមកបណ្តុះ សម្រាប់ធ្វើជាជើងទម្រ និងត្រូវជ្រើរើសមែកទុរេនពូជល្អដូចគ្នា សម្រាប់ធ្វើការបំបៅទុក។ លុះកូនទុរេនអាយុ ៤៥ ថ្ងៃ និងមែកទុរេនមានអាយុ ៨០ ថ្ងៃ កសិករអាចកាត់មកផ្សាំភ្ជាប់គ្នាបាន ហើយត្រូវយកទៅផ្សាំទុកនៅក្នុងរោងមួយ ដែលអាចរក្សាសីតុណ្ហភាពបានល្អកុំឱ្យក្តៅពេក​ឬត្រជាក់ពេក ជៀសវាងផលប៉ះពាល់ដល់ការផ្សាំកូនទុរុន ហើយត្រូវថែទាំដោយយកចិត្តទុកដាក់ ទៅតាមដំណាក់កាលនីមួយៗជាបន្តបន្ទាប់រហូតកូនទុរេនអាយុ ០៦ ខែ គេអាចចាប់ផ្តើមបញ្ចេញលក់បានជាបណ្តើរៗ។

លោក ផាន់ រក្សា អះអាងថា ដោយសារតែកម្ពុជាធ្វើពិហិការលែងប្រើផលិតផលថៃ និងលែងនាំចូលពូជទុរេនពីប្រទេសថៃ បានធ្វើឱ្យកសិករងាកមកគាំទ្រកូនទុរេនក្នុងស្រុកកកាន់តែច្រើនឡើងៗ។ ករណីនេះលោកនឹងពង្រីកទីតាំងបណ្តុះកូនធុរេនខាងលើចំនួន ២ ហិកតាបន្ថែមទៀត ក្នុងគោលដៅផ្គត់ផ្គង់កូនទុរេនឱ្យបានកាន់តែច្រើន។  

យោងតាមរបាយការណ៍ក្រសួងកសិកម្ម រុក្ខាប្រមាញ់និងនេសាទ ឱ្យដឹងថា កម្ពុជាមានផ្ទៃដីដាំដុះទុរេនជាង ១៦,០០០ ហិចតា និងមានផ្ទៃដីប្រមូលផលជាង ៩ ៦០០ ហិកតា ដែលអាចប្រមូលលបានប្រមាណប្រមាណ ១៣,៥០០ តោនជារៀងរាល់ឆ្នាំ៕