សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ថ្ងៃទី ២៧ ខែតុលា ឆ្នាំ ២០២៥ — សហគ្រិនខ្មែរ (Khmer Enterprise) បានរៀបចំកម្មវិធី សហគ្រិនបច្ចេកវិទ្យាវគ្គ “សង្វៀនរ៉ូបូត” រដូវកាលទី៤ ចាប់ពីថ្ងៃទី២៥-២៦ ខែតុលា ឆ្នាំ២០២៥ នៅសាកលវិទ្យាល័យ អាមេរិកាំងភ្នំពេញ ដោយមានការចូលរួមពីក្រុមសិស្ស-និស្សិត និងយុវជនច្រើនជាង ៣០ក្រុម ក្រោមកិច្ចសហការជាមួយក្រុមហ៊ុន AI Farm Robotics Factory, សមាគមអភិវឌ្ឍន៍ឧស្សាហកម្មរ៉ូបូតកម្ពុជា និងក្រុមការងារ Battlebotx។
កម្មវិធីនេះត្រូវបានបង្កើតឡើងក្នុងគោលបំណងបំផុសផ្នត់គំនិតសហគ្រិនភាព បណ្ដុះជំនាញបច្ចេកវិទ្យា និងអភិវឌ្ឍគំរូ រ៉ូបូតជាក់ស្ដែង ព្រមទាំងដំណោះស្រាយបច្ចេកវិទ្យានានា។ តាមរយៈការបណ្ដុះបណ្ដាល និងការប្រកួតប្រជែង អ្នកចូលរួម ទទួលបានបទពិសោធន៍ក្នុងការអនុវត្តជំនាញ ដើម្បីដោះស្រាយបញ្ហាជាក់ស្តែងឱ្យមានប្រយោជន៍សម្រាប់សង្គម និង ក្លាយជាកត្ដាមួយដែលជំរុញការផ្លាស់ប្តូរដ៏វិជ្ជមានក្នុងជីវភាពប្រចាំថ្ងៃ។
កម្មវិធីនេះបែងចែកជាវគ្គបណ្ដុះបណ្ដាលបច្ចេកទេស ការរចនា និងបង្កើតរ៉ូបូត និងការប្រកួតប្រជែងរយៈពេលពីរថ្ងៃ។ ក្រុមនីមួយៗទទួលបានការប្រឹក្សាយោបល់ពីអ្នកជំនាញមកពីឧស្សាហកម្មរ៉ូបូត និងវត្ថុធាតុដើមសម្រាប់ផលិតរ៉ូបូតនេះ ផងដែរ។ រ៉ូបូតនីមួយៗត្រូវបានរចនាឡើងដែលស្របតាមទម្ងន់កំណត់ជាក់លាក់ និងផលិតដោយប្រើបច្ចេកវិទ្យាបោះពុម្ព 3D។ ទោះជាយ៉ាងណាក្ដី ការស្រមើស្រមៃ និងនវានុវត្តន៍គឺគ្មានដែនកំណត់ឡើយ។
ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិនៃសហគ្រិនខ្មែរ បានមាន ប្រសាសន៍ថា “កម្មវិធី សហគ្រិនបច្ចេកវិទ្យា បានទាក់ទាញចំណាប់អារម្មណ៌សិស្សានុសិស្ស ក្នុងការអភិវឌ្ឍវិស័យ បច្ចេកវិទ្យា និងថែមទាំងលើកកម្ពស់ទេពកោសល្យយុវជន។ ការកសាងវិស័យបច្ចេកវិទ្យា មានការចូលរួមពីរាជរដ្ឋាភិបាល ដូចជា ការផ្តួចផ្តើមគោលនយោបាយ និងកៀរគរថវិកា ដើម្បីពង្រឹងគ្រឹះស្ថានស្រាវជ្រាវបច្ចេកវិទ្យា ដែលផ្តល់ជាសេវាកម្ម ទៅវិស័យឯកជន និងសាធារណៈ។
ជាលទ្ធផល កម្មវិធីបានផ្ដល់ពានរង្វាន់ និងទឹកប្រាក់ទៅកាន់ក្រុមជ័យលាភីឯកចំនួន ៣ ដែលបានឆ្លងកាត់ការប្រកួត ជាច្រើនជុំ។ ដោយឡែក ក្រុមប្រកួតចំនួន ៧ ចុងក្រោយផ្សេងទៀត ក៏នឹងទទួលបានរង្វាន់លើកទឹកចិត្តលើការច្នៃប្រឌិត និងនវានុវត្តន៍។ ការប្រគល់ពានរង្វាន់នេះ មិនមែនគ្រាន់តែជាការទទួលស្គាល់លទ្ធផលនៃការខិតខំរបស់ក្រុមដែលបាន ឈ្នះនោះទេ ប៉ុន្តែជាការលើកទឹកចិត្តដល់យុវជនទាំងអស់ឱ្យបន្តស្វែងរកចំណេះដឹងថ្មីៗ និងបង្កើតវិជ្ជាជីវៈសម្រាប់អនាគត ប្រទេសជាតិ៕
Account
Security
Favourite Content