ភ្នំពេញ៖ នៅមុនពេលចូលឆ្នាំថ្មីប្រពៃណីខ្មែរដែលនឹងប្រព្រឹត្តទៅនៅក្នុងខែមេសាខាងមុខនេះ គឺជារដូវកាលដែលប្រជាពលរដ្ឋនៅតាមសហគមន៍មួយចំនួនទទួលបានចំណូលពីការប្រមូលអនុផលព្រៃឈើផងដែរ ដូចជាផ្លែគុយ ផ្លែសិរមាន់ ផ្លែគូលេនព្រៃ និងផ្លែសាវម៉ាវព្រៃជាដើម។

អនុប្រធានសហគមន៍ភ្នំទ័ពជាង លោក ឡុង ណេត ទទួលបន្ទុកទេសចរណ៍បានប្រាប់ AMS ថា សហគមន៍របស់លោកមានតំបន់ទេសចរណ៍សំបូរណ៍បែប ស្ថិតនៅភូមិព្រះអង្គកែវ និងភូមិបាក់អង្រុត ឃុំដងពែង ស្រុកស្រែអំបិល ខេត្តកោះកុង​ ហើយក៏មានអនុផលព្រៃឈើជាច្រើនប្រភេទ ដែលប្រជាសហគមន៍បានចាប់ផ្តើមប្រមូលផលជាបណ្តើរៗនៅតាមតំបន់របស់ខ្លួន ដែលអនុផលទាំងនោះបានផ្តល់ចំណូលជូនដល់ពួកគាត់សម្រាប់ផ្គត់ផ្គង់គ្រួសារ។

សមាជិកប្រជាសហគមន៍ភ្នំទ័ពជាង ប្រមាណ១៥ នាក់/គ្រួសារ) ដែលបានប្រមូលអនុផលព្រៃឈើរួមមាន ផ្លែគុយ ផ្លែសិរ​មាន់ និងផ្លែឈើដទៃទៀត ប៉ុន្តែឆ្នាំនេះ ពួកគេបានផ្តោតសំខាន់ទៅលើផ្លែគុយតែមួយមុខប៉ុណ្ណោះ ដែលផ្តល់ផលមុនគេ និងទទួលបានតម្លៃថ្លៃជាងអនុផលព្រៃឈើដទៃទៀត។ នេះបើតាមលោក ឡុង ណេត បានបញ្ជាក់។

លោក ឡុង ណេត បានបញ្ជាក់ថា ដោយសារតែផ្លែគុយទើបនឹងចាប់ផ្តើមឱ្យផល ដូច្នះប្រជាសហគមន៍មួយចំនួនអាចរកបេះបានតិចតួចនៅឡើយ ពោលគឺម្នាក់អាចរកបានត្រឹម ៧ ទៅ ១០ គីឡូក្រាមតែប៉ុណ្ណោះក្នុងមួយថ្ងៃ ដោយតម្រូវឱ្យចូលតំបន់ព្រៃជ្រៅទើបមានផ្លែបេះ។ ក្រោយពេលប្រមូលផល ឬបេះផ្លែគុយបាន គឺមានអ្នកមកប្រមូលទិញទាំងអស់ ដោយក្នុង ១ គីឡូក្រាម អាចលក់បានប្រមាណចន្លោះពី ១៨ ០០០ រៀល ទៅ ២០ ០០០ រៀល សម្រាប់ការលក់បោះដុំ។

អ្នកស្រី សាំង ណារី ជាអាជីវករទទួលទិញអនុផលព្រៃឈើយកមកលក់នៅម្ដុំមុខមជ្ឈមណ្ឌលកម្សាន្ត ណាហ្គាវើល រាជធានីភ្នំពេញ បានឱ្យដឹងថា ផ្លែឈើព្រៃ​ទាំងនោះ ភាគច្រើន​មាន​ប្រភពពី​ភ្នំ​គូលែន តំបន់ភ្នំ​បូក តំបន់​ព្រៃ​ឧទ្យាន​អង្គរ និង​មួយផ្នែក​ទៀត​មាន​ប្រភពពី​ខេត្តឧត្ដរមានជ័យ​ និងខេត្តកោះកុង។​

អ្នកស្រីបានបន្តឱ្យដឹងថា ផ្លែគុយដែលដាក់លក់នៅទីតាំងខាងលើនេះ មិនថាចំពោះអ្នកស្រីផ្ទាល់ និងអាជីវករដទៃទៀតនោះទេ គឺទើបតែចាប់ផ្តើមទទួលយកមកលក់នៅដើមខែមីនានេះតែប៉ុណ្ណោះ ហើយក៏មិនសូវមានច្រើននោះដែរ ដោយលក់ក្នុងតម្លៃ៣៥០០០រៀលក្នុងមួយគីឡូក្រាម។

អ្នកនាង ស៊ីន មុំ ជាអ្នកលក់អនុផលព្រៃឈើ ដែលទទួលផ្លែគុយយកមកពីខេត្តកោះកុង ដាក់លក់នៅម្តុំទួលគោក រាជធានីភ្នំពេញបានប្រាប់ឱ្យដឹងថា ផ្លែគុយដែលយកមកពីខេត្តកោះកុង លក់ក្នុងតម្លៃ ៤០០០០រៀល ក្នុង១ គីឡូ​ក្រាម ហើយការលក់នេះទៀតសោតទើបតែចាប់ផ្តើមប្រមាណ ២សប្ដាហ៍តែប៉ុណ្ណោះ។ ដោយឡែក ផ្លែគុយនៅតំបន់អង្គរឆ្នាំនេះមិនសូវសម្បូរទេ។ 

លោក ទា គឹមសុទ្ធ ប្រធានមន្ទីរកសិកម្ម ​ខេត្តសៀមរាប បានប្រាប់ឱ្យដឹងថា ផ្លែគុយ និងអនុផលឈើព្រៃនៅតំបន់ព្រៃអង្គរ ពុំទាន់ហុចផលឱ្យពលរដ្ឋក្នុងតំបន់នេះបានបេះយកមកលក់នៅឡើយទេ ពិសេសផ្លែគុយ មិនទាន់ទុំ និងផ្លែផ្សេងទៀត ក៏មិនទាន់ឃើញដាក់លក់ដែរ ហើយបើមានលក់នៅតំបន់មួយចំនួន ក៏លក់ក្នុងតម្លៃថ្លៃដែរ ដោយកន្លែងខ្លះអាចលក់រហូតដល់ ៥០០០០រៀលក្នុងមួយគីឡូក្រាម។

សូមជម្រាបថា ផ្លែគុយ ជាផ្លែឈើហូបផ្លែម្យ៉ាងដែលដុះនៅតាមទីដែលមានព្រៃ។ ឈ្មោះរបស់វាហៅម្យ៉ាងទៀតថា វល្លិ៍គុយ វាឱ្យផល​ចាប់ពី​ដើមខែមីនា រហូតដល់ខែឧសភា ដោយដុះតោងដើមឈើធំៗក្នុងព្រៃក្រាស់ ដែលមានប្រវែងរហូតដល់ ៣០ម ។ ដើមវាមានសណ្ឋានជាឈើមានទំហំធំជាងវល្លិ៍ដទៃទៀត និងជារុក្ខជាតិស្ទើរគ្មានស្លឹក។ សំបក​ដើម​មាន​សភាព​រលោង និង​មា​នពណ៌ត្នោត ផ្នែកនីមួយៗនៃដើម មានជ័រពណ៌សដូចទឹកដោះគោ ច្រើនមានដុះនៅ​ក្នុង​ព្រៃធំ ព្រៃ​ស្រោង​ ព្រៃ​ស្បាត និង​ព្រៃ​របោះតាមចម្រាក់ភ្នំ គុយជា​រុក្ខជាតិ​ដែល​បន្ត​ពូជ​ដោយ​គ្រាប់៕