ក្ភ្នំពេញ ៖ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់នាពិធីសម្ពោធដាក់ឱ្យប្រើប្រាស់អគារ ធនាគារ វីង ថៅវើ នៅព្រឹកថ្ងៃទី២០ ខែធ្នូ ឆ្នាំ២០២៣នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍រំលេចអំពីសារៈសំខាន់នៃវិស័យធនាគារ ដោយប្រៀបទៅនឹងបេះដូងនៅក្នុងសរីរាង្គ។

សម្ដេចធីបតីបានថ្លែងដូច្នេះថា ៖

« ធនាគារប្រៀបដូចជាបេះដូង ដែលប្រមូលឈាមមក​ហើយបញ្ចេញឈាមទៅវិញដើម្បីចិញ្ចឹមសរីរាង្គ បើបេះដូងដើរមិនល្អ សុខភាពក៏មិនល្អដែរ។»

ក្នុងន័យនេះ សម្ដេចនាយករដ្ឋមន្ត្រីបានថ្លែងបន្តថា ក្នុងការរស់នៅប្រចាំថ្ងៃ ពិតជាត្រូវការលុយជាចាំបាច់ ប៉ុន្តែបើមានលុយហើយ មិនមានប្រព័ន្ធគ្រប់គ្រងច្បាស់លាស់ ចរន្ដរបស់លុយនៅទូទាំងប្រទេសក៏មិនល្អនោះដែរ។ ដូច្នេះហើយ ធនាគារគឺមានសារៈសំខាន់ជាខ្លាំងក្នុងការប្រមូលទុន ទទួលបញ្ញើរ ហើយបង្វិលប្រាក់ទាំងនោះទៅកាន់ប្រជាជនដែលមានតម្រូវការ ដើម្បីជាការគាំទ្រដំណើរការសេដ្ឋកិច្ចឱ្យមានលំហូរល្អ។

ដោយឡែក​ ដើម្បីឱ្យសមស្របជាមួយនឹងការអភិវឌ្ឍសង្គមបច្ចុប្បន្ន វិស័យធនាគារក៏មានភាពចាំបាច់ក្នុងការសម្របខ្លួនទៅនឹងវិស័យឌីជីថលផងដែរ។ ដោយវិស័យឌីជីថលនេះ នឹងជំរុញឱ្យដំណើរការក្នុងការប្រមូលឈាមចូលបេះដូង និងបញ្ចេញឈាមទៅតាមសរីរាង្គវិញមានភាពរហ័ស និងងាយស្រួលជាងមុន។

ជាការជំរុញសេដ្ឋកិច្ចសង្គមឌីជីថល រដ្ឋាភិបាលអាណត្តិថ្មីនេះ​ក៏បានដាក់ចេញនូវយុទ្ធសាស្ត្រ​បញ្ចកោណដំណាក់កាលទី១ សំដៅសម្រេចចក្ខុវិស័យឆ្នាំ២០៣០ និងឆ្នាំ២០៥០ និងដើម្បីឆ្លើយ​តបទៅនឹងបដិវត្តន៍ឧស្សាហកម្ម ៤.០។

សម្ដេចធីបតីក៏បានថ្លែងឱ្យដឹងទៀតថា រាជរដ្ឋាភិបាលក៏បានដាក់ឱ្យអនុវត្តនូវគោលនយោបាយ​អភិវឌ្ឍន៍បច្ចេកវិទ្យាហិរញ្ញវត្ថុកម្ពុជា ឆ្នាំ២០២៣-២០២៨ ដែលមានចក្ខុវិស័យរយៈពេលវែងក្នុងការអភិវឌ្ឍន៍បច្ចេកវិទ្យាហិរញ្ញវត្ថុ ដោយឈរលើមូលដ្ឋាននៃការលើកកម្ពស់បរិយាបន្នហិរញ្ញវត្ថុ ការរក្សាស្ថិរភាពវិស័យហិរញ្ញវត្ថុ ការជំរុញនវានុវត្តន៍ហិរញ្ញវត្ថុ ដើម្បីចាប់យកអត្ថ​ប្រយោជន៍​នៅក្នុងវិស័យហិរញ្ញវត្ថុ និងលើកកម្ពស់ភាពប្រកួតប្រជែងនៅក្នុងវិស័យធនាគារ។

សម្ដេចធីបតីក៏បានសង្កត់ធ្ងន់ដែរថា គោលនយោបាយអភិវឌ្ឍន៍បច្ចេកវិទ្យាហិរញ្ញវត្ថុ កម្ពុជា ឆ្នាំ២០២៣-២០២៨ នេះ ប្រៀបបាននឹងសមិទ្ធផលជាទីមោទនៈសម្រាប់ជាមគ្គុទេសក៍ក្នុងការជំរុញ​ការប្រើប្រាស់បច្ចេកវិទ្យានៅក្នុងវិស័យហិរញ្ញវត្ថុ បច្ចេកវិទ្យាហិរញ្ញវត្ថុ (Fintech) សំដៅចូលរួមលើក​កម្ពស់បរិយាបន្នហិរញ្ញវត្ថុ រក្សាស្ថិរភាពវិស័យហិរញ្ញវត្ថុ និងជំរុញនវានុវត្តន៍ហិរញ្ញវត្ថុ៕