ភ្នំពេញ ៖ ក្រុមហ៊ុន ម៉ាស្ទ័រកាត បានប្រកាសតែងតាំង លោក ហ្សារ៉ាដ ជេន (Sharad Jain) ជាអ្នកគ្រប់គ្រងប្រចាំប្រទេសវៀតណាម កម្ពុជា និងឡាវ។ លោក ហ្សារ៉ាដ មានតួនាទីដឹកនាំ និងត្រួតពិនិត្យយុទ្ធសាស្ត្ររបស់ក្រុមហ៊ុន និងប្រតិបត្តិការអាជីវកម្មនៅទូទាំងទីផ្សារទាំងបីនេះ។ លោកនឹងជំរុញកិច្ចខិតខំប្រឹងប្រែងរបស់ក្រុមហ៊ុន ម៉ាស្ទ័រកាត ក្នុងការពង្រឹងការទូទាត់បែបឌីជីថលប្រកបដោយសុវត្ថិភាព និងពង្រឹងកិច្ចសហប្រតិបត្តិការជាមួយ រាជរដ្ឋាភិបាល ធនាគារដៃគូ និងស្ថាប័ននានានៅប្រទេសកម្ពុជា។

ជាមួយនឹងបទពិសោធអន្តរជាតិជាង ២២ ឆ្នាំនៅក្នុងវិស័យហិរញ្ញវត្ថុ នៅតំបន់អាស៊ី និងមជ្ឈិមបូព៌ា លោក ហ្សារ៉ាដ (Sharad) មានបទពិសោធលើការទូទាត់ បច្ចេកវិទ្យាទូទាត់សម្រាប់អ្នកប្រើប្រាស់និងធុរកិច្ច​ ការផ្តល់ធនធានដល់អ្នកប្រើប្រាស់ (Consumer Finance) និង ការផ្លាស់ប្តូរទៅឌីជីថល (Digital Transformation)។ ក្នុងតួនាទីថ្មីនេះ លោកនឹងផ្តោតលើការជំរុញការទូទាត់ឌីជីថលប្រកបដោយនវានុវត្តន៍ សុវត្ថិភាព និងភាពងាយស្រួលដោយសហការជាមួយស្ថាប័ននានាទាំងនៅក្នុងវិស័យសាធារណៈ និងឯកជន ទន្ទឹមនឹងការលើកកម្ពស់បរិយាបន្នផ្នែកហិរញ្ញវត្ថុ និងឌីជីថលដើម្បីបន្តគាំទ្រប្រទេសកម្ពុជាក្នុងការឆ្ពោះទៅរកសេដ្ឋកិច្ចឌីជីថលប្រកបដោយប្រសិទ្ធភាព។

លោក សាហ្វដា ខាន (Safdar Khan) ប្រធានប្រចាំតំបន់អាស៊ីអាគ្នេយ៍នៃក្រុមហ៊ុន ម៉ាស្ទ័រកាត បានមានប្រសាសន៍លើការតែងតាំងនេះថា៖

«យុទ្ធសាស្រ្ត និងបទពិសោធទូលំទូលាយរបស់លោក ហ្សារ៉ាដ (Sharad) ទាំងថ្នាក់អន្តរជាតិ និងថ្នាក់តំបន់ រួមទាំងចំណេះដឹងខ្ពស់អំពីការទូទាត់ និងវិស័យធនាគារ ធ្វើឱ្យលោកក្លាយជាអ្នកដឹកនាំដ៏ស័ក្ដិសមរបស់ក្រុមហ៊ុន ម៉ាស្ទ័រកាត នៅប្រទេសវៀតណាម កម្ពុជា និងឡាវ។ លោកយល់ច្បាស់អំពីទីផ្សារ និងបានបង្កើតទំនាក់ទំនងនៅក្នុងទីផ្សារទាំងនេះ បញ្ជាក់យ៉ាងច្បាស់ពីការប្តេជ្ញាចិត្តរបស់យើងក្នុងកិច្ចសហការរយៈពេលវែង និងនវានុវត្តន៍ដែលអាចផ្តល់ជាគុណតម្លៃជូនរាជរដ្ឋាភិបាល ធនាគារ និងពាណិជ្ជករនៅក្នុងប្រទេសទាំងនេះបាន»។

ការឡើងកាន់តំណែងរបស់លោក ហ្សារ៉ាដ (Sharad) ធ្វើឡើងក្នុងពេលវេលាដ៏សំខាន់មួយសម្រាប់ប្រទេសកម្ពុជា ខណៈដែលប្រទេសកម្ពុជាកំពុងបន្តជំរុញសេដ្ឋកិច្ចឌីជីថលរបស់ខ្លួនតាមរយៈការពន្លឿនបរិយាប័ន្នហិរញ្ញវត្ថុ ការទូទាត់ប្រាក់ឆ្លងដែន និងលើកកម្ពស់ដល់សហគ្រាសធុនតូច និងមធ្យម។ ទិដ្ឋភាពនៃការវិវឌ្ឍប្រព័ន្ធទូទាត់នៅប្រទេសកម្ពុជា បានបង្ហាញពីឱកាសជាច្រើន ជាមួយនឹងការប្រើប្រាស់ទូរសព្ទដៃនៅប្រទេសកម្ពុជាមានប្រមាណដល់ ១៤៥%[1] នៃចំនួនប្រជាជនសរុប និងការផ្តួចផ្តើមរបស់រដ្ឋាភិបាលដូចជាក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ឆ្នាំ២០២១-២០៣៥ ដែលជំរុញការផ្លាស់ប្តូរទៅឌីជីថល (Digital Transformation) នៅប្រទេសកម្ពុជា។

លោក ហ្សារ៉ាដ ជេន (Sharad Jain) អ្នកគ្រប់គ្រងប្រចាំប្រទេសវៀតណាម កម្ពុជា និងឡាវ នៃក្រុមហ៊ុន ម៉ាស្ទ័រកាត បានមានប្រសាសន៍ថា៖

«ខ្ញុំមានមោទនភាព និងសោមនស្សយ៉ាងខ្លាំងសម្រាប់តួនាទីមួយនេះនៅក្នុងតំបន់ដែលមានសក្តានុពល និងភាពរីកចម្រើនយ៉ាងឆាប់រហ័ស។ ល្បឿននៃការផ្លាស់ប្តូរទៅឌីជីថលនៅក្នុងប្រទេសកម្ពុជា មានភាពគួរឱ្យកត់សម្គាល់ នេះជាឱកាសធំមួយក្នុងការផ្តល់ជូនការទូទាត់ និងកម្ចីជាមួយនឹងបច្ចេកវិទ្យា និងនវានុវត្តន៍ ទន្ទឹមនឹងការចូលរួមក្នុងសហគមន៍មូលដ្ឋានផងដែរ។ ខ្ញុំរីករាយនឹងរួមការងារយ៉ាងជិតស្និទ្ធជាមួយស្ថាប័នដៃគូនានា ក្នុងការសហការផ្តល់សុវត្ថិភាពនិងបរិយាបន្ននៅក្នុងប្រព័ន្ធឌីជីថល និងសហការជាមួយក្រុមការងារម៉ាស្ទ័រកាត ក្នុងការបន្តការងារសំខាន់ៗរបស់ពួកយើងដែលកំពុងដំណើរការសម្រាប់ជាប្រយោជន៍ដល់ប្រជាជនកម្ពុជា»។

មុនពេលឡើងកាន់តំណែងថ្មីនេះ លោក ហ្សារ៉ាដ (Sharad) គឺជាអនុប្រធាន គ្រប់គ្រងគម្រោងប្រចាំតំបន់អាស៊ីអាគ្នេយ៍ នៃក្រុមហ៊ុន ម៉ាស្ទ័រកាត នៅប្រទេសសិង្ហបុរី ដែលលោកបានដឹកនាំយុទ្ធសាស្រ្តគ្រប់គ្រងគម្រោង​សម្រាប់ស្ថាប័នហិរញ្ញវត្ថុឈានមុខគេនៅទូទាំងតំបន់។ លោក ហ្សារ៉ាដ (Sharad) ឡើងបន្តតំណែងពីអ្នកស្រី វីនី វង្ស (Winnie Wong) ដែលបច្ចុប្បន្ន អ្នកស្រីជាអ្នកគ្រប់គ្រងប្រចាំប្រទេសថៃ និងមីយ៉ាន់ម៉ា។

លោក សាហ្វដា ខាន់ (Safdar Khan)បានមានប្រសាសន៍បន្ថែមថា៖

«ខ្ញុំសូមអរគុណអ្នកស្រី វីនី (Winnie) ចំពោះការរួមចំណែករបស់អ្នកស្រីទៅលើអាជីវកម្មរបស់យើងក្នុងប្រទេសវៀតណាម កម្ពុជា និងឡាវអស់រយៈពេលប្រាំមួយឆ្នាំកន្លងមកនេះ។ ភាពជាអ្នកដឹកនាំ និងសមិទ្ធផល​របស់អ្នកស្រីនៅក្នុងទីផ្សារទាំងបីនេះ គឺពិតជាមានភាពលេចធ្លោ។ ខណៈពេលដែលយើងអបអរការផ្លាស់ប្តូរអ្នកដឹកនាំនេះ ខ្ញុំមានទំនុកចិត្តថា លោក ហ្សារ៉ាដ (Sharad) នឹងបន្តកសាងសមិទ្ធផលបន្ថែមទៀតនៅក្នុងទីផ្សារទាំងនេះជាមួយនឹងភាពជាអ្នកដឹកនាំ និងជំនាញដែលលោកមាន លោកនឹងនាំមកនូវសន្ទុះថ្មីដើម្បីជំរុញអាជីវកម្មរបស់យើងបន្តទៀត»។

អំពីក្រុមហ៊ុន ម៉ាស្ទ័រកាត

ក្រុមហ៊ុន​ ម៉ាស្ទ័រកាត ទ្រទ្រង់ដល់សេដ្ឋកិច្ច និងបង្កើតឱកាសដល់មនុស្សប្រមាណជាង ២០០ ប្រទេស និងតំបន់ជុំវិញពិភពលោក។ រួមគ្នាជាមួយអតិថិជនរបស់យើង យើងកំពុងកសាងសេដ្ឋកិច្ចមានភាពធន់ដែលមនុស្សគ្រប់គ្នាអាចរីកចម្រើនរួមគ្នាបាន។ យើងផ្តល់នូវជម្រើសទូទាត់ឌីជីថលយ៉ាងទូលំទូលាយ ដែលធ្វើឱ្យប្រតិបត្តិការទូទាត់ប្រាក់មានសុវត្ថិភាព សាមញ្ញ ឆ្លាតវៃ និងអាចប្រើប្រាស់បាន។ យើងផ្តល់បច្ចេកវិទ្យា និងនវានុវត្តន៍រួមជាមួយនឹងភាពជាដៃគូ និងបណ្តាញរបស់យើង ផ្តល់នូវផលិតផល និងសេវាកម្មដែលដើម្បីគាំទ្រនូវ​សក្តានុពលរបស់អ្នកប្រើប្រាស់ អាជីវកម្ម និងរាជរដ្ឋាភិបាល។

www.mastercard.com   

ទំនាក់ទំនងក្រុមការងារ ម៉ាស្ទ័រកាត ផ្នែកទំនាក់ទំនងតាមរយៈ
Shivani Goswami, +65 8798 0933 

shivani.goswami@mastercard.com 

ទំនាក់ទំនងភ្នាក់ងារទំនាក់ទំនងរបស់ក្រុមហ៊ុន ម៉ាស្ទ័រកាត​ តាមរយៈ

Pisen Sou (ស៊ូ ពិសែន)

+855 17 719 346 

Pisen.Sou@ruderfinnera.com