គាំទ្រផលិតផលខ្មែរ ថែសេដ្ឋកិច្ចជាតិ

ភ្នំពេញ ៖ សហគ្រិនខ្មែរ ក្នុងកិច្ចសហការជាមួយផ្សារអុីអន បានបិទបញ្ចប់ ពិព័រណ៍ផលិតផលក្នុងស្រុក លើកទី១ ដែលបានធ្វើឡើងរយៈពេលពីរសប្តាហ៍ចាប់ពីថ្ងៃទី១៩ ខែឧសភា ដល់ថ្ងៃទី០១ ខែមិថុនា នៅផ្សារអុីអនទាំងបីសាខា រួមមាន អុីអនភ្នំពេញ, សែនសុខ, និង មានជ័យ។

ពិព័រណ៍ឆ្នាំនេះមានលក្ខណៈកាន់តែពិសេសដោយជាលើកដំបូងដែលផ្សារអុីអនម៉ល​​​បានចូលរួមគាំទ្រក្នុងនាមជាដៃគូសហការជាមួយផ្សារអុីអន​ដែលជាជំហានថ្មីសម្រាប់ការលើកស្ទួយផលិតផលខ្មែរ និងជួយពង្រីកឱកាសផ្សព្វផ្សាយសម្រាប់សហគ្រាសធុនតូច និងមធ្យម នៅលើទីផ្សារដ៏ទូលំទូលាយ។​ ពិព័រណ៍បានទាក់ទាញចំណាប់អារម្មណ៍ខ្លាំងទាំងអតិថិជនជាតិ និងអន្តរជាតិ ដែលបានចូលរួមទិញផលិតផលសហគ្រិនក្នុងស្រុកជាង ៦០ សហគ្រាស ដែលបង្ហាញពីសក្តានុពលនៃផលិតផលជាតិក្នុងទីផ្សារទំនើប។

ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួកបន្ទុកជានាយកប្រតិបត្តិនៃសហគ្រិនខ្មែរ បានមានប្រសាសន៍ថា ៖

«សហគ្រាសធុនតូច និងមធ្យម ជាច្រើនដែលធ្លាប់ទទួលបានការគាំទ្រពីសហគ្រិនខ្មែរ ចាប់តាំងពីឆ្នាំ២០២០មកមានលទ្ធភាពចូលរួមជាមួយផ្សារអុីអនក្នុងពិព័រណ៍ផលិតផលក្នុងស្រុក។ ការចូលរួមគាំទ្ររបស់រាជរដ្ឋាភិបាលតាមរយៈសហគ្រិនខ្មែរ បានធ្វើឱ្យផលិតផលក្នុងស្រុកមាន​លក្ខណៈសម្បតិ្ដគ្រប់គ្រាន់ក្នុងការចូលរួមដាក់លក់ស្របតាមស្ដង់ដារ​ជាតិ និងអន្ដរជាតិ។ លើសពីនេះ ការចូលរួមពីប្រជាជនយ៉ាងច្រើនកុះករបា​​នបន្ថែមការលើកទឹកចិត្ត និងផ្តល់ភាពជឿជាក់មួយផ្នែកទៀតដល់សហគ្រាសធុនតូច និងមធ្យម។ »។

លោក ស៊ិន ពិសី អគ្គនាយកក្រុមហ៊ុន អុីអន (ខេមបូឌា) បានមានប្រសាសន៌ថា៖

«យើងមានសេចក្តីសោមនស្សរីករាយណាស់ដែលឃើញការគាំទ្រយ៉ាងច្រើនពីអតិថិជនរបស់យើងនៅក្នុងពិព័រណ៍ផលិតផលក្នុងស្រុកឆ្នាំនេះ។ ក្រោមពាក្យស្លោកពិព័រណ៍ផលិតផលក្នុងស្រុក  “គាំទ្រផលិតផលខ្មែរ ថែសេដ្ឋកិច្ចជាតិ” ក្នុងនាមជាអគ្គនាយកក្រុមហ៊ុន អុីអន (ខេមបូឌា) យើងនៅតែប្តេជ្ញាចិត្តក្នុងការបន្តគាំទ្រផលិតផលក្នុងស្រុក និងនាំយកនូវទំនិញក្នុងស្រុកថ្មីៗជូនទៅកាន់អតិថិជនរបស់យើង»។

បើប្រៀបធៀបជាមួយឆ្នាំមុនៗការគាំទ្រផលិតផលខ្មែរពីសំណាក់អតិថិជនរបស់ផ្សារទំនើបអុីអន មានការកើនឡើងកាន់តែច្រើន ក៏ដោយសារកត្តាចម្បងៗដូចជា ផលិតផលដែលបានដាក់តាំងក្នុងពិព័រណ៍ក្នុងស្រុកនេះ សុទ្ធតែជាផលិតផលដែលមានគុណភាព ផលិតទៅតាមស្តង់ដាអន្តរជាតិ គួបផ្សំជាមួយការដាក់តាំងលក់ផលិតផលបានកាន់តែច្រើនជាងឆ្នាំមុន និងការពង្រីកទីតាំងលក់ផលិតផលក្នុងស្រុកកាន់តែទូលំទូលាយ។ ចំណុចរួមទាំងអស់នេះបានជំរុញឱ្យពិព័រណ៍ផលិតផលក្នុងស្រុកឆ្នាំនេះកាន់តែរស់រវើក និងទទួលបានជោគជ័យ។

លោក អិនដូ ហ៊្វូមីហីកុ អគ្គនាយកក្រុមហ៊ុន អុីអន ម៉ល (ខេមបូឌា) បានមានប្រសាសន៌ថា៖

«ខ្ញុំមានកិត្តិយសណាស់ដែលបានសហការជាមួយ អុីអន (ខេមបូឌា) និងសហគ្រិនខ្មែរ ជាផ្នែកមួយក្នុងការជួយពង្រីកការតាំងពិព័រណ៍ផលិតផលក្នុងស្រុកនេះបានកាន់តែធំជាងមុន ហើយមាននៅគ្រប់សាខាផ្សារទំនើប អុីអន ម៉ល។  ការរៀបចំពិព័រណ៍ផលិតផលក្នុងស្រុកនេះ គឺបានផ្តោតសំខាន់ទៅលើផលិតផលក្នុងស្រុក ដែលរួមមានដូចជា គ្រឿងទេស បន្លែស្រស់ អាហារ និងរបស់របរប្រើប្រាស់ជាច្រើនទៀត»។

ជាមួយគ្នានេះផងដែរ ផ្សារទំនើប អុីអន ម៉ល ប្តេជ្ញាយ៉ាងមុតមាំក្នុងការផ្សព្វផ្សាយផលិតផលក្នុងស្រុក និងគាំទ្រដល់កសិករក្នុងស្រុក រួមទាំងសហគ្រាសធុនតូច និងមធ្យម។ តាមរយៈការតាំងពិព័រណ៍នេះ ផ្សារទំនើប អុីអន ម៉ល មានគោលបំណងជួយផ្សព្វផ្សាយផលិតផលដែលផលិតក្នុងស្រុកឲ្យបានកាន់តែទូលំទូលាយជាងមុន ទាំងក្នុងស្រុក និងក្រៅស្រុក ទៅដល់អតិថិជនក៏ដូចជាជួយឱ្យមានការរីកចម្រើនអាជីវកម្មក្នុងស្រុកបន្ថែម និងបង្កើនទំនាក់ទំនងជាមួយវិស័យឯកជនផងដែរ។

លោក អិនដូ ហ៊្វូមីហីកុ បានបន្តថា ៖

«ផ្សារទំនើប អុីអន ម៉ល ក៏សូមអញ្ជើញ និងស្វាគមន៍យ៉ាងកក់ក្តៅដល់អតិថិជនគ្រប់រូបឱ្យចូលរួមគាំទ្រផលិតផលក្នុងស្រុក និងទទួលបានបទពិសោធន៍ថ្មីៗ ជាមួយការរៀបចំកម្មវិធីនានា ដូចជា ការតាំងបង្ហាញពីសិប្បកម្មខ្មែរ និងការសម្តែងសិល្បៈវប្បធម៌នៅផ្សារទំនើប អុីអន ម៉ល។ ជាចុងក្រោយ ផ្សារទំនើប អុីអន ម៉ល យើងខ្ញុំសង្ឃឹមថានឹងមានកិច្ចសហការជាមួយសហគ្រិនខ្មែរនៅក្នុងគម្រោងផ្សេងៗទៀតនាពេលអនាគត ដើម្បីចូលរួមចំណែកដល់ការអភិវឌ្ឍន៍ប្រកបដោយចីរភាព និងភាពជោគជ័យយូរអង្វែងរបស់សហគមន៍កម្ពុជា»។

បន្ទាប់ពីភាពជោគជ័យនៃព្រឹត្តិការណ៍នេះ សហគ្រិនខ្មែរ និងផ្សារ អុីអន សូមប្រកាសបន្ថែមថា ពិព័រណ៍ផលិតផលក្នុងស្រុកលើកបន្ទាប់នឹងត្រូវរៀបចំឡើងនៅ ខែធ្នូ ឆ្នាំ២០២៥ ដោយមានផែនការបង្កើនចំនួនសហគ្រាសចូលរួម និងការផ្តោតលើការផ្សព្វផ្សាយផលិតផលទៅកាន់សាធារណជនក្នុងវិសាលភាពធំបន្ថែមទៀត។

សូមកុំភ្លេចមកគាំទ្រផលិតផលខ្មែរជាមួយគ្នា ពង្រឹងសេដ្ឋកិច្ចជាតិ និងជំរុញសហគ្រិនក្នុងស្រុកឲ្យរីកចម្រើន!