ភ្នំពេញ៖ ធនាគារ ជីប ម៉ុង ដែលជាធនាគារពាណិជ្ជក្នុងស្រុកបង្កើតឡើងដោយវិនិយោគិនខ្មែរបានបន្តសាងភាពលេចធ្លោនៅលើឆាកអន្តរជាតិដោយទទួលបានពានរង្វាន់ដ៏មានកិត្យានុភាពចំនួន២ក្នុងពេលតែមួយសម្រាប់ឆ្នាំ២០២៦ពីស្ថាប័នអន្តរជាតិ Global Banking & Finance Review។ ពានរង្វាន់អន្តរជាតិទាំង ២ ដែលធនាគារ ជីប ម៉ុង ទទួលបានរួមមាន៖«ធនាគារឆ្នើមបំផុតសម្រាប់សហគ្រាសធុនតូច និងមធ្យម» (Best SME Bank Cambodia) និង «កម្មវិធីធនាគារឌីជីថលល្អបំផុតសម្រាប់អតិថិជន» (Best Retail Banking App Cambodia)។

ពានរង្វាន់ «ធនាគារឆ្នើមបំផុតសម្រាប់សហគ្រាសធុនតូច និងមធ្យម» គឺជាសក្ខីភាពបញ្ជាក់ពីការប្តេជ្ញាចិត្តខ្ពស់របស់ធនាគារក្នុងការជួយជ្រោមជ្រែងដល់អាជីវកម្មក្នុងស្រុក និងសហគ្រាសធុនតូច និងមធ្យមដែលជាកម្លាំងចលករដ៏សំខាន់នៃសេដ្ឋកិច្ចកម្ពុជា។ ធនាគារមិនត្រឹមតែផ្តល់នូវឥណទានប៉ុណ្ណោះទេ ប៉ុន្តែថែមទាំងបង្កើតភាពជាដៃគូយុទ្ធសាស្ត្ររយៈពេលវែង ផ្តល់ការប្រឹក្សា និងដំណោះស្រាយហិរញ្ញវត្ថុឆ្លាតវៃជូនដល់អតិថិជន។ ជាពិសេស ធនាគារបានដើរតួនាទីយ៉ាងសកម្មក្នុងការជួយដល់វិស័យកសិកម្ម ដូចជាវិស័យស្រូវអង្ករ និងស្វាយចន្ទី ដើម្បីជួយលើកកម្ពស់សេដ្ឋកិច្ច បង្កើតឱកាសការងារ និងកាត់បន្ថយចំណាកស្រុកក្នុងសហគមន៍ថែមទៀតផង។

ចំពោះពានរង្វាន់ «កម្មវិធីធនាគារឌីជីថលល្អបំផុតសម្រាប់អតិថិជន» វិញ បានបង្ហាញពីភាពជោគជ័យដ៏អស្ចារ្យលើការអភិវឌ្ឍប្រព័ន្ធធនាគារឌីជីថល។ កម្មវិធី CHIP MONG BANK APP ត្រូវបានទទួលស្គាល់ថាជាកម្មវិធីដែលផ្ដល់បទពិសោធន៍ទូទាត់ប្រកបដោយភាព «ឆ្លាតវៃ រហ័ស ទាន់ចិត្ត និងមានសុវត្ថិភាពខ្ពស់»។ អតិថិជនអាចធ្វើប្រតិបត្តិការជាច្រើនដូចជា ការផ្ទេរប្រាក់ ការទូទាត់វិក្កយបត្រ និងការបង់ពន្ធគ្រប់ប្រភេទបានយ៉ាងងាយស្រួល។ លើសពីនេះ ធនាគារតែងតែបង្កើតកម្មវិធីលើកទឹកចិត្តជាច្រើន ដូចជាការផ្តល់អត្រាការប្រាក់ពិសេសសម្រាប់ការភ្ជាប់ការបង់វិក្កយបត្រស្វ័យប្រវត្តិជាដើម ដែលផ្តល់តម្លៃបន្ថែមពិតប្រាកដដល់អ្នកប្រើប្រាស់។

នៅក្នុងបទសម្ភាសជាមួយអ្នកសារព័ត៌មាន ក្នុងឱកាស «វេទិកាដៃគូពាណិជ្ជកម្ម ជីប ម៉ុង» កាលពីថ្ងៃទី១១ ខែកក្កដា អ្នកឧកញ៉ា លាង ម៉េង អគ្គនាយក ធនាគារ ជីប ម៉ុង បានថ្លែងថា៖ទំនុកចិត្តរបស់អតិថិជន និងដៃគូអាជីវកម្ម គឺជាមូលដ្ឋាននៃសមិទ្ធផលនេះ។ ធនាគារ ជីប ម៉ុង សូមថ្លែងអំណរគុណយ៉ាងជ្រាលជ្រៅចំពោះទំនុកចិត្ត និងការគាំទ្ររបស់អតិថិជន។ ធនាគារប្តេជ្ញាបន្តផ្តល់ជូននូវដំណោះស្រាយហិរញ្ញវត្ថុប្រកបដោយភាពច្នៃប្រឌិត សុវត្ថិភាព និងគុណភាពខ្ពស់ ដើម្បីបំពេញតម្រូវការហិរញ្ញវត្ថុរបស់អតិថិជន និងគាំទ្រការរីកចម្រើននៃអាជីវកម្មនៅកម្ពុជា។សមិទ្ធផលនេះឆ្លុះបញ្ចាំងពីចក្ខុវិស័យរបស់ធនាគារ ជីប ម៉ុង ក្នុងការក្លាយជាធនាគារដែលទទួលបានទំនុកចិត្តខ្ពស់ពីអតិថិជន តាមរយៈការផ្តល់ដំណោះស្រាយហិរញ្ញវត្ថុប្រកបដោយនវានុវត្តន៍ ការកសាងភាពជាដៃគូរយៈពេលវែង និងបទពិសោធន៍ឌីជីថលដ៏ល្អ ដើម្បីគាំទ្រការរីកចម្រើនរបស់អតិថិជន ម្ចាស់អាជីវកម្ម។

អ្នកឧកញ៉ា បានបន្ថែមថា៖

«ជោគជ័យរបស់អតិថិជន គឺជាជោគជ័យរបស់យើង។ ធនាគារ ជីប ម៉ុង មិនត្រឹមតែផ្តល់ដំណោះស្រាយហិរញ្ញវត្ថុប៉ុណ្ណោះទេ ប៉ុន្តែថែមទាំងផ្តល់ចំណេះដឹង ការប្រឹក្សា និងគំនិតវែងឆ្ងាយ ដើម្បីជួយឱ្យសហគ្រាស និងអាជីវកម្មខ្មែររីកចម្រើនប្រកបដោយនិរន្តភាព។ធនាគារបានកសាងទំនុកចិត្ត តាមរយៈការវិនិយោគលើបច្ចេកវិទ្យាទំនើប ការគ្រប់គ្រងប្រកបដោយសុវត្ថិភាព និងការបន្តលើកកម្ពស់ស្នាដៃខ្មែរ ឱ្យទទួលបានការទុកចិត្ត និងការទទួលស្គាល់កាន់តែទូលំទូលាយ ទាំងក្នុង និងក្រៅប្រទេស»។

ជាមួយនឹងចក្ខុវិស័យក្នុងការក្លាយជាស្ថាប័នហិរញ្ញវត្ថុឈានមុខគេមួយក្នុងប្រទេសកម្ពុជា ធនាគារ ជីប ម៉ុង បន្តផ្តោតលើការអភិវឌ្ឍនវានុវត្តន៍ ផលិតផល និងសេវាកម្មហិរញ្ញវត្ថុដែលមានភាពទំនើប ងាយស្រួល និងឆ្លើយតបទៅនឹងតម្រូវការរបស់អតិថិជន។ ទន្ទឹមនឹងនេះ ធនាគារក៏បន្តវិនិយោគលើបច្ចេកវិទ្យាឌីជីថល ការពង្រឹងសុវត្ថិភាពប្រព័ន្ធ និងការអភិវឌ្ឍធនធានមនុស្ស ដើម្បីធានាបាននូវសេវាកម្មដែលមានប្រសិទ្ធភាពខ្ពស់ និងបទពិសោធន៍អតិថិជនដ៏ល្អឥតខ្ចោះ។ ធនាគារ ជីប ម៉ុង បន្តដើរតួនាទីយ៉ាងសកម្មក្នុងការគាំទ្រកំណើនសេដ្ឋកិច្ចជាតិ ជាពិសេសតាមរយៈការផ្តល់ដំណោះស្រាយហិរញ្ញវត្ថុដល់វិស័យកសិកម្ម និងសហគ្រាសធុនតូច និងមធ្យម (SMEs) ដែលជាកម្លាំងស្នូលនៃសេដ្ឋកិច្ចកម្ពុជា។ តាមរយៈផលិតផល និងសេវាកម្មដែលស្របតាមតម្រូវការអាជីវកម្ម ធនាគារមិនត្រឹមតែផ្តល់សេវាធនាគារប៉ុណ្ណោះទេ ប៉ុន្តែថែមទាំងរួមចំណែកបង្កើតឱកាស លើកកម្ពស់សមត្ថភាពប្រកួតប្រជែង និងគាំទ្រការអភិវឌ្ឍប្រកបដោយចីរភាពសម្រាប់សហគ្រាសក្នុងស្រុកផងដែរ។

ក្នុងនាមជាធនាគារខ្មែរ ដែលបង្កើតឡើងដោយកូនខ្មែរ ធនាគារ ជីប ម៉ុង ប្តេជ្ញាបន្តដើរតួនាទីជាដៃគូហិរញ្ញវត្ថុយូរអង្វែង តាមរយៈការគាំទ្រអាជីវកម្មក្នុងស្រុក ការពង្រឹងសមត្ថភាពសហគ្រិនខ្មែរ និងការចូលរួមជំរុញកំណើនសេដ្ឋកិច្ចជាតិឱ្យកាន់តែមានភាពធន់ និងប្រកបដោយចីរភាព។

គួរជម្រាបផងដែរថា៖ អាណាចក្រអាជីវកម្ម ជីប ម៉ុង បានរៀបចំ «វេទិកាដៃគូពាណិជ្ជកម្ម ជីប ម៉ុង» ដែលជាព្រឹត្តិការណ៍ដ៏ធំប្រចាំឆ្នាំ ដើម្បីថ្លែងអំណរគុណ និងពង្រឹងទំនាក់ទំនងជាមួយដៃគូពាណិជ្ជកម្មទូទាំងប្រទេស ដែលបានរួមដំណើរជាមួយក្រុមហ៊ុនក្នុងការជំរុញកំណើនអាជីវកម្ម និងការអភិវឌ្ឍជាបន្តបន្ទាប់អស់រយៈពេលជាង ៤ ទសវត្សរ៍។ព្រឹត្តិការណ៍នេះ ប្រព្រឹត្តទៅក្រោមវត្តមានដ៏ខ្ពង់ខ្ពស់របស់ លោកអ្នកឧកញ៉ា ភាព ហៀក, លោកអ្នកឧកញ៉ា លាង ឃុន, អ្នកឧកញ៉ា លាង ម៉េង និងសមាជិកក្រុមប្រឹក្សាភិបាល ជីប ម៉ុង ព្រមទាំងថ្នាក់ដឹកនាំគ្រប់ជាន់ថ្នាក់របស់ក្រុមហ៊ុន។ ជាមួយគ្នានេះ ក៏មានការចូលរួមយ៉ាងច្រើនពីដៃគូពាណិជ្ជកម្មទូទាំងប្រទេស ភ្ញៀវកិត្តិយស សិល្បករ-សិល្បការិនី និង KOLs មកពីគ្រប់ទិសទីផងដែរ។ ក្នុងឱកាសនោះ ជីប ម៉ុង បានបង្ហាញនូវទស្សនីយភាពដ៏អស្ចារ្យ និងការសម្តែងពិសេសពីថ្នាក់ដឹកនាំក្រុមហ៊ុន ជាមួយពិធីទូងស្គរជ័យ ដែលជានិមិត្តរូបនៃការរីកចម្រើន ភាពរឹងមាំ និងការបន្តឆ្ពោះទៅមុខរបស់ក្រុមហ៊ុន ជីប ម៉ុង។

វេទិកាដៃគូពាណិជ្ជកម្មនេះ បានឆ្លុះបញ្ចាំងពីការប្តេជ្ញាចិត្តរបស់ ជីប ម៉ុង ក្នុងការកសាងទំនាក់ទំនងយូរអង្វែង និងបង្កើតភាពរីកចម្រើនរួមជាមួយដៃគូពាណិជ្ជកម្មទាំងអស់ ដែលជាកម្លាំងដ៏សំខាន់ក្នុងការពង្រីកអាជីវកម្ម និងផ្តល់តម្លៃជូនអតិថិជនទូទាំងប្រទេស។
ទស្សនវិស័យនៃការរីកចម្រើនជាមួយគ្នានេះហើយ គឺជាមូលដ្ឋានដ៏រឹងមាំដែលធ្វើឱ្យ ជីប ម៉ុង ទទួលបានការជឿទុកចិត្ត និងគាំទ្រពីដៃគូពាណិជ្ជកម្ម និងអតិថិជនជាបន្តបន្ទាប់អស់រយៈពេលជាង ៤ ទសវត្សរ៍ ៕