ភ្នំពេញ ៖ នៅក្នុងរយៈពេល០២ឆ្នាំចុងក្រោយនេះ គេសង្កេតឃើញថា អត្រាប្រាក់បញ្ញើនៅតាមគ្រឹះ​ស្ថាន​ទទួលប្រាក់បញ្ញើនានាក្នុងប្រទេសកម្ពុជា មានការកើនឡើងខ្ពស់លើសកំណើនឥណទានដែលបានផ្តល់កម្ចីទៅដល់អតិថិជន។

លោក រ័ត្ន សោភ័ណ ប្រធានសមាគមធនាគារកម្ពុជាមានប្រសាសន៍ថា អត្រាប្រាក់បញ្ញើក្នុងស្រុកនៅក្នុងរយៈពេល ២ឆ្នាំចុងក្រោយនេះមានកំណើនខ្ពស់មិនធ្លាប់មានក្នុងប្រវត្តិសាស្រ្តក្នុង ៣ទសវត្សរ៍ចុងក្រោយនេះ។ រយៈពេល ២ឆ្នាំចុងក្រោយនេះ ជាពេលវេលាដំបូងនៅក្នុងប្រវត្តិសាស្រ្ត ដែលកំណើនប្រាក់បញ្ញើមានអត្រាខ្ពស់ជាងកំណើនឥណទានប្រមាណជាង ២០០០លានដុល្លារ គិតជាសាច់ប្រាក់ស្មើនឹង ៣,៣% ប៉ុន្តែកំណើនប្រាក់បញ្ញើឆ្នាំទៅមានជាង ៨០០០លានដុល្លារ ក្នុងវិស័យធនាគារ ស្មើនឹង១៦% ជិតស្មើនឹងជិត៤ដង ដូច្នេះ ធនាគារទាំងអស់សល់លុយ។

លោកបញ្ជាក់ថា ៖

«កត្តានេះហើយ បានធ្វើឱ្យអនុបាតរវាងឥណទាន និងប្រាក់បញ្ញើកើនឡើងជិតស្មើគ្នា ដែលជាចំណុចល្អទៅដល់ការផ្តល់ឥណទានដល់អតិថិជន ក្នុងការទទួលបានអត្រាការប្រាក់ទាបជាងមុន។ កាលណាកំណើនប្រាក់បញ្ញើឡើងខ្ពស់ ធ្វើឱ្យអត្រាការរប្រាក់ធ្លាក់ចុះ ហើយអតិថិជនដែលទទួលបានប្រាក់កម្ចីលក្ខណៈបុគ្គលក្តី ប្រើប្រាស់ក្នុងអាជីវកម្មក្តី ប្រើប្រាស់សម្រាប់ទិញគេហដ្ឋានក្តី គឺទទួលបានអត្រាការប្រាក់ទាបជាងមុន។ ធនាគារគ្រាន់តែអន្តរការីមួយដែលប្រមូលប្រាក់បញ្ញើ សម្រាប់ផ្តល់ឥណទានទៅវិញប៉ុណ្ណោះ នៅពេលថ្លៃដើមនៃប្រាក់បញ្ញើចុះថោក អត្រាការប្រាក់ឥណទានចុះថោកដូចគ្នា ដូច្នេះហើយទើបគេមើលឃើញថា រយៈពេល១២ខែចុងក្រោយនេះ និន្នាការនៃអត្រាការប្រាក់ថយចុះ»។

នៅអំឡុងពេលសេដ្ឋកិច្ចពិភពលោក ក៍ដូចជាសេដ្ឋកិច្ចក្នុងប្រទេសកម្ពុជាមានកំណើនយឺតមានការលើកឡើងថា គ្រឹះស្ថានធនាគារ និងមីក្រូហិរញ្ញវត្ថុ ហាក់មិនទម្លាក់កម្ចីទៅដល់អតិ​ថិជនដូចមុនទៀតនោះទ តែយ៉ាងណា សកម្មភាពផ្តល់ឥណទាននៅតែមានដំណើរការធម្មតាមិនដូចមតិលើកឡើងនោះទេ។

លោកជំទាវ ឌិត នីតា ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា មានប្រសាសន៍ថា គ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុ នៅតែផ្តល់ប្រាក់កម្ចីទៅដល់អតិថិជនដូចអំឡុងឆ្នំាមុនៗដដែល ប៉ុន្តែគ្រាន់តែការផ្តល់ឥណទានមានការប្រុងប្រយ័ត្ន និងមានការរឹតត្បិតជាងឆ្នាំមុនៗប៉ុណ្ណោះ។

លោកជំទាវមានប្រសាសន៍ថា ៖

«ពេលខ្លះការសិក្សារកឃើញថា ចំណូលអតិថិជនអាចទទួលយកកម្ចីបានទាប មិនបានច្រើនដូចការចង់បាន ដូច្នេះហើយធនាគារ ឬគ្រឹះស្ថានមីក្រូហិរញ្ញវត្ថុ មិនអាចផ្តល់បានច្រើនដូចការចង់បានរបស់អតិថិជនទេ ជាហេតុធ្វើឱ្យអាក់ខានក្នុងការផ្តល់កម្ចីនោះ»។

លោក អឿ សុធារ័ត្ន នាយកប្រតិបត្តិក្រុមហ៊ុន ក្រេឌីត ប្យ៊ូរ៉ូ កម្ពុជា(CBC) មានប្រាសាសន៍ដែរថា ទោះយ៉ាងណា ការផ្តល់ប្រាក់កម្ចីរបស់គ្រឹះស្ថានធានាគារ ឬគ្រឹះស្ថានមីក្រូហិរញ្ញវត្ថុ នៅតែមានសកម្មភាពដដែល ព្រោះថាធនាគារ ឬគ្រឹះស្ថានមីក្រូហិរញវត្ថុ ក៍ទទួលប្រាក់កម្ចីពីធនាគារធំៗនៅក្រៅប្រទេស ឬកម្ចីពីអតិថិជនតាមរយៈការដាក់បញ្ញើ ដែលត្រូវបង់សងត្រឡប់ទៅដល់ម្ចាស់កម្ចីខាងលើដែរ ដូច្នេះបើសិនជាមិនមានសកម្មភាពផ្តល់កម្ចីដល់អតិថិជននោះទេ ក៍មិនមានប្រាក់សម្រាប់សងត្រឡប់ទៅដល់ម្ចាស់កម្ចីធំៗ ឬអតិថិជនដែលដាក់ប្រាក់បញ្ញើនោះដែរ។

សម្រាប់អ្នកវិភាគសេដ្ឋកិច្ចបានលើកឡើងថា អត្រាប្រាក់បញ្ញើក្នុងវិស័យធនាគារមានការកើនឡើងជាមុង ដោយសារកត្តាសេដ្ឋកិច្ចមានកំណើនយឺត នៅរយៈពេលចុងក្រោយដែលធ្វើឱ្យការប្រកបអាជីវកម្ម មិនសូវទទួលបានប្រាក់ចំណេញ ដូច្នេះហើយអតិថិជនភាគច្រើនបានផ្លាស់ប្តូរផ្នត់គំនិតយកប្រាក់ទៅដាក់បញ្ញើនៅតាមគ្រឹះស្ថានធនាគារនានាដើម្បីទទួលបានការប្រាក់ទៀងទាត់ ជាជាងការយកប្រាក់មកធ្វើអាជីវកម្មទាំងប្រថុយប្រថាន។

គួរបញ្ជាក់ថា ប្រាក់បញ្ញើត្រូវបានចែកចេញជាពីរប្រភេទ រួមមានប្រាក់បញ្ញើជារៀល និងប្រាក់បញ្ជើជារូបិយប័ណ្ណបរទេស មានដូចជាប្រាក់បញ្ញើចរន្ត ប្រាក់បញ្ញើសន្សំ ប្រាក់បញ្ញើមានកាលកំណត់ និប្រាក់បញ្ញើផ្សេងៗ។ ក្នុងនោះប្រាក់បញ្ញើជារៀលសរុបក្នុងឆ្នាំ២០២៤ មានចំនួន ២៤ ៤៨៨,២ ប៊ីលានរៀល កើនលើសឆ្នាំ២០២៣ មានប្រមាណជា ២១ ៤២៨,៣ ប៊ីលានរៀល ចំណែកប្រាក់បញ្ញើជារូបិយប័ណ្ណឆ្នាំ២០២៤ មាចំនួនសរុប ១៩២ ៥៨៥,២ ប៊ីលានរៀល កើនលើសឆ្នាំ២០២៣ មានចំនួន ១៦៦ ៦៤២,៤ ប៊ីលានរៀល៕  វិន ឈុនហ៊ាត