ភ្នំពេញ៖ រាជរដ្ឋាភិបាលកម្ពុជា និងរដ្ឋាភិបាលហ្វីលីពីន បានចុះកិច្ចព្រមព្រៀងលើវិស័យសំខាន់ៗចំនួន៣ រួមមាន វិស័យអប់រំ វិស័យអាកាសចរណ៍ និងកិច្ចសហប្រតិបត្តិការក្នុងការប្រយុទ្ធប្រឆាំងឧក្រិដ្ឋកម្មឆ្លងដែន។ ពិធីនេះត្រូវបានធ្វើឡើងក្នុងឱកាសដំណើរទស្សនកិច្ចផ្លូវរដ្ឋរបស់ លោក ម៉ាកូស (Ferdinand Romualdez Marcos Jr.) ប្រធានាធិបតីនៃសាធារណរដ្ឋ ហ្វីលីពីន មកកាន់កម្ពុជា ដែលមានរយៈពេល៣ថ្ងៃ (ថ្ងៃទី០៧-០៩ ខែកញ្ញា)។

កិច្ចព្រមព្រៀងនេះ ត្រូវបានចុះហត្ថលេខាក្រោមអធិបតីភាព សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោក Ferdinand Romualdez Marcos Jr. ប្រធានាធិបតីនៃសាធារណរដ្ឋ ហ្វីលីពីន បន្ទាប់ពីមេដឹកនាំនៃប្រទេសទាំងពីរបញ្ចប់ជំនួបពិភាក្សាទ្វេភាគី នៅព្រឹកថ្ងៃទី០៨ ខែសីហា ឆ្នាំ២០២៥ នៅវិមានសន្តិភាព។

ឯកសារទាំង៣នោះរួមមាន ៖

ឯកសារទី១៖ អនុស្សរណៈយោគយល់ស្តីពីវិស័យសហប្រតិបត្តិការនានារវាងនគរបាលជាតិនៃព្រះរាជាណាចក្រកម្ពុជា និង នគរបាលជាតិនៃសាធារណរដ្ឋហ្វីលីពីន ស្តីពីកិច្ចសហប្រតិបត្តិការក្នុងការប្រយុទ្ធប្រឆាំងឧក្រិដ្ឋកម្មឆ្លងដែន ចុះហត្ថលេខាដោយ លោក Maria Theresa P. Lazaro រដ្ឋមន្ត្រីក្រសួងការបរទេសនៃសាធារណរដ្ឋហ្វីលីពីន និងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា។

ទី២៖ អនុស្សារណៈយោគយល់រវាងក្រសួងអប់រំ យុវជន និងកីឡាកម្ពុជា និង គណៈកម្មការឧត្តមសិក្សានៃសាធារណរដ្ឋហ្វីលីពីន ចុះហត្ថលេខាដោយ លោកស្រីបណ្ឌិត Shirley C. Agrupis ប្រធានគណៈកម្មការឧត្តមសិក្សានៃសាធារណរដ្ឋហ្វីលីពីន និងឯកឧត្តមបណ្ឌិត ហង្ស ជួនណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា កម្ពុជា។

ទី៣៖ អនុស្សរណៈយោគយល់ ស្តីពីកិច្ចព្រមព្រៀងសេវាកម្មអាកាសចរណ៍រវាងព្រះរាជាណាចក្រកម្ពុជា ​និងសាធារណរដ្ឋហ្វីលីពីន ចុះហត្ថលេខាដោយ លោក Jim C. Syndiongco អនុរដ្ឋលេខាធិការអាកាសចរណ៍ និងអាកាសយានដ្ឋាននៃសាធារណរដ្ឋហ្វីលីពីន និងឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីប្រតិភូ ទទួលបន្ទុករដ្ឋលេខាធិការដ្ឋានអាកាសចរណ៍ស៊ីលវិលនៃព្រះរាជាណាចក្រកម្ពុជា។

សូមជម្រាបដែរថា កម្ពុជា និងហ្វីលីពីន បានបញ្ជាក់អំពីការតាំងចិត្តក្នុងការរឹតបន្តឹងចំណងមិត្តភាពដ៏រឹងមាំ និងការប្តេជ្ញាលើកកម្ពស់ទំនាក់ទំនងរវាងប្រទេសទាំងពីរឱ្យកាន់តែខ្ពស់ថែមទៀត ជាពិសេស បង្កើននូវទំហំពាណិជ្ជកម្ម និងលើកកម្ពស់សេដ្ឋកិច្ចរួមគ្នា៕