សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ការងាកមកគាំទ្រ និងប្រើប្រាស់ទំនិញផលិតក្នុងស្រុកកាន់តែច្រើនពីសំណាក់ប្រជាពលរដ្ឋកម្ពុជា ត្រូវបានមើលឃើញថា កំពុងរួមចំណែកជំរុញកំណើនសេដ្ឋកិច្ចជាតិ តាមរយៈការបង្កើនការផលិត ការបង្កើតការងារ និងការទាក់ទាញការវិនិយោគថ្មីៗ ពិសេសក្នុងវិស័យផលិតកម្ម។
លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានប្រាប់បណ្ដាញព័ត៌មាន AMS ថា កម្ពុជាបានចំណាយថវិកានាំចូលទំនិញពីបរទេសរាប់ពាន់លានដុល្លារជារៀងរាល់ឆ្នាំ រួមទាំងទំនិញមួយចំនួនដែលអាចផលិតបាននៅក្នុងស្រុក។ លោកបានលើកឡើងថា ប្រសិនបើប្រជាពលរដ្ឋកម្ពុជាងាកមកទិញ និងប្រើប្រាស់ផលិតផលក្នុងស្រុកកាន់តែច្រើន នោះនឹងជួយជំរុញសេដ្ឋកិច្ចជាតិឱ្យកាន់តែរឹងមាំ។
លោកឧកញ៉ាបានបញ្ជាក់ថា កន្លងមក កម្ពុជាបានចំណាយថវិកាជាច្រើនលើការទិញទំនិញ និងការចាយវាយនៅក្រៅប្រទេស ជាពិសេសនៅប្រទេសថៃ។ ប៉ុន្តែចាប់តាំងពីមានជម្លោះព្រំដែនរវាងកម្ពុជា និងថៃ ប្រជាពលរដ្ឋកម្ពុជាស្ទើរទូទាំងប្រទេសបានពហិការឈប់ប្រើប្រាស់សេវាកម្ម និងទំនិញរបស់ថៃ ហើយអ្នកដែលធ្លាប់ទៅចាយវាយនៅប្រទេសថៃ ក៏បានផ្អាកការចំណាយនៅទីនោះផងដែរ។
លោកឧកញ៉ាបន្តថា ចាប់តាំងពីពាក់កណ្ដាលឆ្នាំ២០២៥មក ប្រជាពលរដ្ឋកម្ពុជាជាច្រើនបានងាកមកប្រើប្រាស់ទំនិញផលិតក្នុងស្រុក ដែលបានរួមចំណែកជំរុញកំណើនសេដ្ឋកិច្ច។
លោកឧកញ៉ា តែ តាំងប៉ មានប្រសាសន៍ថា៖ «បើសិនជាពលរដ្ឋកម្ពុជាកាន់តែច្រើន ងាកមកប្រើប្រាស់ទំនិញក្នុងស្រុក នឹងអាចជួយសេដ្ឋកិច្ចបានច្រើនណាស់។ ជាក់ស្ដែង នៅពេលមានការបញ្ជាទិញកាន់តែច្រើនលើទីផ្សារ អ្នកផលិតក្នុងស្រុកនឹងបង្កើនការផលិត ហើយសហគ្រាសផលិតនឹងមានតម្រូវការលើកម្លាំងពលកម្ម ក៏ដូចជាវត្ថុធាតុដើមដែលមានក្នុងស្រុកផងដែរ»។
ទោះបីជាទំនិញពីថៃបានថយចុះនៅលើទីផ្សារកម្ពុជាក៏ដោយ លោកឧកញ៉ាបានឱ្យដឹងថា អ្នកនាំចូលបានបង្វែរទៅនាំចូលពីប្រទេសផ្សេងជំនួស ដែលធ្វើឱ្យផលិតផលក្នុងស្រុកនៅតែប្រឈមនឹងការប្រកួតប្រជែង។ យ៉ាងណាក៏ដោយ លោកកត់សម្គាល់ថា ចាប់តាំងពីពាក់កណ្ដាលឆ្នាំ២០២៥មក សន្ទុះនៃការគាំទ្រផលិតផលខ្មែរបានកើនឡើងយ៉ាងខ្លាំង ដោយនៅពេលរៀបចំពិព័រណ៍ផលិតផលខ្មែរ ស្តង់លក់មួយចំនួនថែមទាំងអស់ស្តុកមុនពេលបិទកម្មវិធីទៀតផង។
លោកឧកញ៉ារំពឹងថា នៅចុងឆ្នាំ២០២៦ ឬដើមឆ្នាំ២០២៧ កំណើនសហគ្រាសផលិតទំនិញ ជាពិសេសផ្នែកចំណីអាហារ និងភេសជ្ជៈ នឹងកើនឡើងបន្ថែមទៀត ខណៈសហគ្រាសមួយចំនួនបានដំណើរការ ហើយមួយចំនួនទៀតកំពុងសាងសង់រោងចក្រ ដើម្បីត្រៀមដាក់ឱ្យដំណើរការក្នុងពេលឆាប់ៗខាងមុខ។
ជាមួយគ្នានេះ អ្នកឧកញ៉ា លាង ម៉េង សហស្ថាបនិក និងជាប្រធានក្រុមហ៊ុនជីប ម៉ុង គ្រុប បានថ្លែងថា ក្រុមហ៊ុនបានវិនិយោគទឹកប្រាក់ ២៥០ លានដុល្លារ សម្រាប់សាងសង់រោងចក្រផលិតចំណីអាហារ និងភេសជ្ជៈនៅកម្ពុជា ដើម្បីផ្គត់ផ្គង់ទីផ្សារក្នុងស្រុក។ លោកបានបញ្ជាក់ថា គម្រោងនេះនឹងបង្កើតការងារដោយផ្ទាល់ប្រមាណ ១,០០០ កន្លែង និងដោយប្រយោលប្រមាណ ៥,០០០ កន្លែង ព្រមទាំងនាំយកបច្ចេកវិទ្យាទំនើបពីបរទេស និងរួមចំណែកអភិវឌ្ឍធនធានមនុស្សក្នុងវិស័យផលិតកម្ម។
អ្នកឧកញ៉ា លាង ម៉េង បានបន្ថែមថា កម្ពុជាមិនអាចហាមឃាត់ការនាំចូលទំនិញពីបរទេសបាននោះទេ ប៉ុន្តែការកាត់បន្ថយថ្លៃដើមផលិតកម្មក្នុងស្រុក នឹងជួយឱ្យផលិតផលខ្មែរមានសមត្ថភាពប្រកួតប្រជែងជាមួយទំនិញនាំចូល និងជួយឱ្យកម្ពុជាអាចផលិតទំនិញសម្រាប់ប្រើប្រាស់ដោយខ្លួនឯងកាន់តែច្រើន៕
Account
Security
Favourite Content