ភ្នំពេញ៖ នៅក្នុងឆ្នាំ២០២៤កន្លងទៅនេះ តាមរយៈអគ្គនាយកដ្ឋានគយ និងរដ្ឋាករកម្ពុជា បានរកចំណូលប្រមាណ ២៥៩០លានដុល្លារអាម៉េរិក កើនឡើង ១៣.៨ភាគរយ ធៀបទៅនឹងឆ្នាំ២០២៣។ នេះបើតាមទិន្នន័យ​ក្នុង​​​កិច្ចប្រជុំបូកសរុបការងារប្រចាំឆ្នាំ២០២៤ និងទិសដៅអនុវត្តបន្តរបស់​អគ្គ​នាយកដ្ឋាន​គយ និង​រដ្ឋាករកម្ពុជា កាល​ពី​ថ្ងៃ​ទី​១០ ខែ​កុម្ភៈ ​ឆ្នាំ២០២៥កន្លងទៅនេះ។

ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានរាយការណ៍ពីលទ្ធផលការងារសំខាន់ៗមួយចំនួន ដែលសម្រេចបានក្នុងឆ្នាំ២០២៤ រួមមាន ការប្រមូលចំណូ​លពន្ធ និងអាករចំនួន ១០ ៥៤២.២ ប៊ីលានរៀល (ស្មើនឹងប្រមាណ ២ ៥៩០.៣ លានដុល្លារអាមេរិក) កើនឡើងប្រមាណ ១៣.៨% ធៀបនឹងចំណូលប្រមូលបានក្នុងឆ្នាំ២០២៣។

របាយការណ៍បានបង្ហាញថា ការប្រមូលចំណូលក្នុងឆ្នាំ២០២៤ នេះជួបប្រទះនឹងបញ្ហាប្រឈមធំៗមួយចំនួនមានជាអាទិ៍ កំណើនជាបន្តបន្ទាប់ទាំងវិសាលភាព និងភាពស៊ីជម្រៅនៃការអនុវត្តកិច្ចព្រមព្រៀងពាណិជ្ជកម្មសេរី ការរីកលូតលាស់នៃផលិតកម្មក្នុងស្រុក ជំនួសការនាំចូល ការអនុគ្រោះពន្ធនិងអាករ កាន់តែធំទូលាយដើម្បីទាក់ទាញការវិនិយោគ និន្នាការកើនឡើងនៃការប្រើប្រាស់រថយន្តដែលមានទំហំស៊ីឡាំងតូច និងរថយន្តអគ្គិសនី និងការបន្តមាននូវសកម្មភាពរត់គេចពន្ធក្នុងរូបភាពថ្មីៗកាន់តែស្មុគស្មាញ។

ឯកឧត្តមបណ្ឌិត គុណ ញឹម បានគូសបញ្ជាក់ថា បើគិតជាសមាសភាគចំណូលតាមប្រភេទពន្ធ និងអាករធៀបនឹងចំណូលសរុប អាករលើតម្លៃបន្ថែមមានប្រមាណ ៤១.៣%, អាករពិសេសមានប្រមាណ ៣២.១%, ពន្ធគយមានប្រមាណ ១៨%, អាករបន្ថែមលើផលិតផលប្រេងកាតមានប្រមាណ ៤.៤% និងអាករនាំចេញនិងកម្រៃផ្សេងៗមានប្រមាណ ៤.២%។

ឯកឧត្តមបណ្ឌិត គុណ ញឹម បានបញ្ជាក់ថា៖

«ចំពោះសមាសភាគនៃចំណូល តាមក្រុមទំនិញធៀបនឹងចំ​ណូលសរុប ក្រុមទំនិញចម្រុះមានប្រមាណ ៣៤.៧% យានយន្ត និងគ្រឿងចក្រមានប្រមាណ ៣១.១% ប្រេងឥន្ធនៈនិងថាមពលមានប្រមាណ ២៦.៩%, និងសម្ភារសំណង់និងកម្រៃផ្សេងៗមានប្រមាណ ៧.៣%។ ទន្ទឹមគ្នានេះ ទំហំពាណិជ្ជកម្មនាំចូលមានចំនួន ២៨ ៥៤៥.៤ លានដុល្លារអាម៉េរិក កើនឡើងប្រមាណ ១៨% ធៀបនឹងឆ្នាំ២០២៣ ដែលក្នុងនោះទំនិញនាំចូលសំខាន់ៗមានជាអាទិ៍ ផលិតផលតេលសិលា វត្ថុធាតុដើម និងគ្រឿងម៉ាស៊ីនបម្រើដល់គម្រោងវិនិយោគ គ្រឿងសំណង់ យានយន្តនិងគ្រឿងចក្រ គ្រឿងឧបភោគបរិភោគ និងទំនិញចម្រុះផ្សេងទៀត»។

ទំហំពាណិជ្ជកម្មនាំចេញមានចំនួន ២៦ ៤៧២.៨ លានដុល្លារអាមេរិក កើនឡើងប្រមាណ ១៥.៨% ធៀបនឹងឆ្នាំ២០២៣ ដែលក្នុងនោះ ផលិតផលវិនិយោគកាត់ដេរមានកំណើន ២៣.៣%, ផលិតផលវិនិយោគមិនមែនកាត់ដេរ (មានជាអាទិ៍ សំបកកង់រថយន្ត, គ្រឿងបំណែកអេឡិចត្រូនិក, បង្គុំខ្សែភ្លើង, ផលិតផលពីឈើ, កង់, ផលិតផលប្លាស្ទិច, អំពូល, ស្បែកសត្វកែច្នៃ, គ្រឿងបន្លាស់រថយន្ត និងផលិតផលឧស្សាហកម្មផ្សេងៗទៀត) មានកំណើន ២.៦%, និងកសិផល (មានជាអាទិ៍ ស្រូវ, កៅស៊ូ, ដំឡូងមី, អង្ករ, ចេក, គ្រាប់ស្វាយចន្ទី និងកសិផលផ្សេងៗទៀត) មានកំណើន ១១.៦%។

បន្ថែមពីលើការងារប្រមូលចំណូល អគ្គនាយកដ្ឋានគយ និងរដ្ឋាករកម្ពុជា ក៏សម្រេចបាននូវវឌ្ឍនភាពល្អប្រសើរលើការងារសំខាន់ៗផ្សេងទៀត ដូចជា៖ ១- ការធ្វើឌីជីថលភាវូបនីយកម្មនីតិវិធី ២- ការអនុវត្តកិច្ចសម្រួលពាណិជ្ជកម្មដល់ធុរជនមានអនុ​លោ​ម​ភាពខ្ពស់ ៣- ការពង្រឹងការងារបច្ចេកទេសគយ ៤- ការងារបង្ការនិងបង្ក្រាបអំពើរត់គេចពន្ធ និងការអនុវត្តច្បាប់ ៥- ការងារសវនកម្មនិងការគ្រប់គ្រងហានិភ័យ ៦- កិច្ចសហការជាមួយផ្នែកឯកជន និងស្ថាប័នពាក់ព័ន្ធ ៧- កិច្ចសហប្រតិបត្តិការអន្តរជាតិលើការងារគយ (៨- ការចូលរួមកសាងច្បាប់និងបទប្បញ្ញត្តិពាក់ព័ន្ធ ៩- ការអភិវឌ្ឍធនធានមនុស្ស និងស្ថាប័ន និង ១០- ការងារសង្គម មនុស្សធម៌ សិល្បៈនិងកីឡា។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីគយ និងរដ្ឋាករគ្រប់ជាន់ថ្នាក់ ក្នុងការសម្រេចបាននូវលទ្ធផលប្រសើរលើការប្រមូលចំណូល និងបានលើកទឹកចិត្តឱ្យថ្នាក់ដឹកនាំ និងមន្ត្រីគយ និងរដ្ឋាករគ្រប់ជាន់ថ្នាក់បន្តយកចិត្តទុកដាក់ខិតខំប្រឹងប្រែងអនុវត្តតួនាទី ភារកិច្ចរបស់ខ្លួនប្រកបដោយស្មារតីទទួលខុសត្រូវ ហើយក្រសួងសេដ្ឋកិច្ចនិងហិរញ្ញវត្ថុ នឹងនៅតែបន្តគាំទ្រ អគ្គនាយកដ្ឋានគយ និងរដ្ឋាករកម្ពុជា ក្នុងការអនុវត្តការងាររបស់ខ្លួនឱ្យកាន់តែមានប្រសិទ្ធភាព។

ឯកឧត្តមអគ្គបណ្ឌិតសភាចារ្យ ក៏បានផ្ដល់ការណែនាំសំខាន់ៗសម្រាប់អនុវត្តក្នុងឆ្នាំ២០២៥ នូវការងារមួយចំនួនពាក់ព័ន្ធនឹង ការប្រមូលចំណូលឱ្យអស់សក្ដានុពល, ការបង្ការ និងបង្ក្រាបអំពើរត់គេចពន្ធ និងពង្រឹងអនុលោមភាព ការពង្រឹងការគ្រប់គ្រងពាណិជ្ជកម្មតាមប្រព័ន្ធអេឡិចត្រូនិក ការធ្វើទំនើបកម្មនិងការអភិវឌ្ឍស្ថាប័ន ការជំរុញការរៀបចំសេចក្ដីព្រាងច្បាប់ស្ដីពីគយ (ថ្មី) ដើម្បីបង្កើនប្រសិទ្ធភាពប្រមូលចំណូលនិងការងារផ្សេងទៀតរបស់ អគ្គនាយកដ្ឋានគយ និងរដ្ឋាករផងដែរ៕