សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្វាយរៀង៖ សហគមន៍ព្រៃឈើត្រពាំងពិការ ក្នុងឃុំអំពិល ស្រុករមាសហែក ខេត្តស្វាយរៀង កំពុងផ្ដល់អត្ថប្រយោជន៍ដល់ប្រជាពលរដ្ឋជាង ៤០០ គ្រួសារ តាមរយៈការប្រមូលអនុផលព្រៃឈើ និងការទាក់ទាញភ្ញៀវទេសចរ ខណៈសហគមន៍នេះក៏កំពុងរៀបចំតំបន់អេកូទេសចរណ៍ ដើម្បីបង្កើនប្រភពចំណូលជូនសមាជិក។
សហគមន៍ព្រៃឈើត្រពាំងពិការ ទទួលបានការគាំទ្រពីអាជ្ញាធរមូលដ្ឋាន ចាប់ពីថ្នាក់ភូមិ ឃុំ ស្រុក និងខេត្ត ជាពិសេសពីក្រុមហ៊ុនសោម៉ាគ្រុប ដែលបានចូលរួមរៀបចំផែនការអាជីវកម្ម និងបណ្ដុះបណ្ដាលអប់រំដល់សមាជិកសហគមន៍ ដើម្បីឱ្យពួកគេអាចទាញយកប្រយោជន៍ពីធនធានព្រៃឈើបានកាន់តែច្រើន ជាពិសេសតាមរយៈការទាក់ទាញភ្ញៀវទេសចរ។
លោក ទូច ស្រី ប្រធានសហគមន៍ព្រៃឈើត្រពាំងពិការ បានប្រាប់បណ្តាញសារព័ត៌មាន AMS ថា សហគមន៍នេះត្រូវបានបង្កើតឡើងតាំងពីឆ្នាំ ២០០៣ ក្នុងគោលបំណងដំបូងគឺការពារព្រៃឈើមិនឱ្យបាត់បង់ និងស្ដារព្រៃឈើដែលបានបាត់បង់ឡើងវិញ។
លោកបានឱ្យដឹងថា ដំបូងឡើយ មានប្រជាពលរដ្ឋក្នុងសហគមន៍ចូលរួមតែប្រមាណ ៤០ គ្រួសារប៉ុណ្ណោះ។ ក្រោយមក ចំនួនសមាជិកបានកើនឡើងជាបន្តបន្ទាប់ រហូតដល់បច្ចុប្បន្ន (៤០០ គ្រួសារ) ប្រជាពលរដ្ឋក្នុងភូមិស្ទើរតែទាំងអស់បានចូលរួមជាសមាជិក និងកំពុងទទួលបានអត្ថប្រយោជន៍ពីព្រៃសហគមន៍ជាប្រចាំ។ លោកបន្តថា សមាជិកសហគមន៍ដែលចូលរួមក្នុងសកម្មភាពការពារព្រៃឈើ អាចប្រមូលផលពីព្រៃ ដូចជា ផ្សិត ឃ្មុំ និងផ្លែឈើព្រៃ ជាពិសេសផ្លែគុយ ដែលជាផ្លែឈើពេញនិយម។
លោកបានថ្លែងដូច្នេះថា៖ «បច្ចុប្បន្ន សហគមន៍ព្រៃឈើត្រពាំងពិការ កំពុងរៀបចំតំបន់នេះជាតំបន់អេកូទេសចរណ៍ ដោយមានការគាំទ្រពីក្រុមហ៊ុនសោម៉ាគ្រុប ក៏ដូចជា ឯកឧត្តម សុខ សូកេន អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុករមាសហែក»។
លោក ទូច ស្រី បានឱ្យដឹងទៀតថា ផែនការអភិវឌ្ឍតំបន់អេកូទេសចរណ៍នេះ រួមមានការរៀបចំកន្លែងបោះតង់ស្នាក់នៅ និងអាហារដ្ឋាន សម្រាប់ភ្ញៀវទេសចរជាតិ និងអន្តរជាតិមកពីទីជិត និងទីឆ្ងាយ មកលេងកម្សាន្តក្នុងសហគមន៍។
លោកបន្ថែមថា នៅពេលគម្រោងនេះលេចជារូបរាង ពលរដ្ឋដែលជាសមាជិកសហគមន៍ នឹងអាចទទួលបានអត្ថប្រយោជន៍កាន់តែច្រើន តាមរយៈការផ្ដល់សេវាកម្មទេសចរណ៍ លក់ម្ហូបអាហារ និងផ្ដល់សេវាស្នាក់នៅជូនភ្ញៀវទេសចរជាតិ និងអន្តរជាតិ។
បន្ថែមពីនេះ សហគមន៍មានគម្រោងរៀបចំព្រែកប្រឡាយនៅក្នុងតំបន់ព្រៃសហគមន៍ សម្រាប់ភ្ញៀវជិះទូកលេងកម្សាន្ត ស្ទូចត្រី និងស្ទូចបង្កង ព្រមទាំងដាំបន្លែសុវត្ថិភាពសម្រាប់ផ្គត់ផ្គង់ក្នុងអាហាររបស់សហគមន៍។
ថ្លែងក្នុងកម្មវិធីសំណេះសំណាលជាមួយប្រជាសហគមន៍ព្រៃឈើត្រពាំងពិការ កាលពីថ្ងៃទី ១៩ ខែកញ្ញា ឆ្នាំ ២០២៦ ឯកឧត្តម សុខ សូកេន រដ្ឋមន្ត្រីក្រសួងអធិការកិច្ច មានប្រសាសន៍ថា នៅទូទាំងខេត្តស្វាយរៀង មានសហគមន៍ចំនួន ៦ ហើយសហគមន៍ព្រៃឈើត្រពាំងពិការ គឺជាសហគមន៍ដែលធំជាងគេ។
ឯកឧត្តមបានលើកឡើងថា៖ «នៅថ្ងៃអនាគត សហគមន៍នេះនឹងចូលរួមក្នុងការពង្រឹងសេដ្ឋកិច្ចមូលដ្ឋាន តាមរយៈការរៀបចំជាគោលដៅទេសចរណ៍មួយក្នុងខេត្តស្វាយរៀង។ ការអភិវឌ្ឍនេះត្រូវការការចូលរួមពីប្រជាពលរដ្ឋ អាជ្ញាធរមូលដ្ឋាន និងក្រសួងស្ថាប័នពាក់ព័ន្ធ ដូចជា ក្រសួងអភិវឌ្ឍន៍ជនបទ ក្រសួងកសិកម្ម រុក្ខាប្រមាញ់ និងនេសាទ និងក្រសួងទេសចរណ៍»។
ឯកឧត្តម សុខ សូកេន ក៏បានកោតសរសើរដល់ក្រុមការងាររបស់ក្រុមហ៊ុនសោម៉ាគ្រុប ដែលបានចូលមកគាំទ្រសហគមន៍ព្រៃឈើត្រពាំងពិការ ប្រមាណជាង ១ ឆ្នាំមកនេះ។ ឯកឧត្តមបានលើកឡើងថា ទោះបីក្រុមហ៊ុនទើបចូលមកគាំទ្រសហគមន៍ក្នុងរយៈពេលមិនយូរក៏ដោយ ក៏សហគមន៍មានការរីកចម្រើនលូតលាស់យ៉ាងលឿន។
ឯកឧត្តមរំពឹងថា ក្នុងពេលឆាប់ៗខាងមុខ តំបន់សហគមន៍មួយនេះនឹងក្លាយជាទីទាក់ទាញភ្ញៀវទេសចរមកពីទីជិត និងទីឆ្ងាយ ហើយជួយជំរុញសេដ្ឋកិច្ចគ្រួសាររបស់សមាជិកសហគមន៍ឱ្យកាន់តែរីកចម្រើនទៅមុខបន្តទៀត៕
Account
Security
Favourite Content