សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការដែលអាចនាំចេញកសិផលកម្ពុជា ទៅឈរជើងលើទីផ្សារសហភាពអឺរ៉ុប ដែលល្បីល្បាញខាងទាមទារស្តង់ដារគុណភាព និងសុវត្ថិភាពខ្ពស់បំផុតនោះ គឺជាសក្ខីភាពរស់បញ្ជាក់យ៉ាងច្បាស់ពីភាពធន់ និងសមត្ថភាពពិតប្រាកដរបស់កសិករ អ្នកកែច្នៃ និងអ្នកនាំចេញកម្ពុជា។ នេះជាការគូសបញ្ជាក់របស់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
មានប្រសាសន៍នៅក្នុងវេទិកាពាណិជ្ជកម្មគ្រាប់ស្វាយចន្ទី និងម្រេចឆ្នាំ២០២៦ ក្រោមមូលបទ «នាំកម្ពុជាទៅកាន់ពិភពលោក៖ ការជំរុញធុរកិច្ចឆ្ពោះទៅទីផ្សារអឺរ៉ុប» នៅសណ្ឋាគារសូហ្វីតែល ភូគីត្រា ភ្នំពេញ កាលពីព្រឹកថ្ងៃទី១០ ខែវិច្ឆិកា ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានគូសរំលេចថា រាជរដ្ឋាភិបាលកំពុងបន្តពង្រីកឱកាសនាំចេញកសិផលសក្តានុពល ពិសេសស្វាយចន្ទីនិងម្រេចទៅកាន់អឺរ៉ុបដើម្បីបង្កើតតម្លៃបន្ថែម និងទាញយកផលចំណេញសេដ្ឋកិច្ចជូនគ្រួសារកសិករ។
ឯកឧត្តមបានបន្ថែមថា ដើម្បីគាំទ្រដល់មហិច្ឆតានេះ ក្រសួងកសិកម្ម បានដាក់ចេញនូវយន្តការជាក់ស្តែងជាច្រើន រួមមាន៖ ការផ្តល់ហិរញ្ញប្បទាន ការចងក្រងសហគមន៍កសិកម្មទំនើប និងការដាក់ពង្រាយមន្ត្រីកសិកម្មឃុំ ដើម្បីជួយកសិករកាត់បន្ថយថ្លៃដើម អនុវត្តកសិកម្មល្អ (GAP) និងពង្រឹងគុណភាពឆ្លើយតបនឹងទីផ្សារអន្តរជាតិ។
ទន្ទឹមនឹងភាពជោគជ័យ វិស័យកសិ-ឧស្សាហកម្មកម្ពុជា ក៏នៅសល់លំហវិនិយោគដ៏ធំផងដែរ។ ក្នុងឆ្នាំ២០២៥ កម្ពុជា ផលិតស្វាយចន្ទីបានប្រមាណ ១លានតោន ប៉ុន្តែភាគច្រើនត្រូវបាននាំចេញជាគ្រាប់ឆៅ។ រោងចក្រ និងសហគ្រាសកែច្នៃក្នុងស្រុកមានសមត្ថភាពកែច្នៃសរុបប្រមាណ ៨៦.៨០០តោនក្នុង ១ឆ្នាំ ខណៈបរិមាណកែច្នៃជាក់ស្តែងមានត្រឹម ២២.៦០០តោន ឬប្រមាណ ២៦% នៃសមត្ថភាពដែលមានស្រាប់ ។ នេះបើតាមរបាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ។
ចំណែកឯវិស័យម្រេចវិញ ការចុះបញ្ជី «ម្រេចកំពត» ជាផលិតផលសម្គាល់ភូមិសាស្ត្រ (GI) នៅអឺរ៉ុប គឺជាគំរូជោគជ័យនៃការលក់គុណតម្លៃ និងអត្តសញ្ញាណជាតិ។ ក្នុងឆ្នាំ២០២៥ កម្ពុជានាំចេញម្រេចបានជាង ១១២តោន រកចំណូលបានជាង ២លានដុល្លារអាម៉េរិក ដែលតួលេខនេះកើនឡើងទ្វេដង បើធៀបនឹងឆ្នាំ២០២៤។
ជាមួយគ្នានេះ ក្រសួងកសិកម្ម រុក្ខាប្រមាញ់ និងនេសាទ បានសម្តែងការស្វាគមន៍យ៉ាងកក់ក្តៅចំពោះដៃគូអភិវឌ្ឍន៍ វិនិយោគិន និងធុរជនទាំងអស់ក្នុងការបន្តគាំទ្រ និងវិនិយោគលើការពង្រឹងខ្សែច្រវាក់តម្លៃផលិតផលកសិកម្មកម្ពុជា ដើម្បីប្រែក្លាយសក្តានុពលវិស័យកសិកម្មឱ្យទៅជាឱកាសសេដ្ឋកិច្ចប្រកបដោយចីរភាព និងនិរន្តរភាព ។
សូមជម្រាបថា វេទិកាពាណិជ្ជកម្មស្វាយចន្ទី និងម្រេច ឆ្នាំ២០២៦ រៀបចំឡើងរយៈពេល ២ ថ្ងៃ នៅថ្ងៃទី១០-១១ ខែវិច្ឆិកា ដោយប្រមូលផ្តុំអ្នកផលិត អ្នកកែច្នៃ អ្នកនាំចេញ អ្នកវិនិយោគ និងអ្នកជំនាញ ដើម្បីស្វែងយល់ពីតម្រូវការទីផ្សារអឺរ៉ុប ,ការពង្រឹងភាពជាដៃគូពាណិជ្ជកម្ម និងពង្រីកឱកាសទីផ្សារសម្រាប់ផលិតផលស្វាយចន្ទី និងម្រេចកម្ពុជា ៕ ដោយ៖ វណ្ណលុក
Account
Security
Favourite Content