សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅពេលនិយាយអំពីការគ្រប់គ្រងលុយ មិនមានវិធីសាស្ត្រ ឬក្រិតក្រមណាមួយល្អជាងមួយណានោះទេ ព្រោះមនុស្សម្នាក់ៗតែងតែមានវិធីសាស្ត្រខុសៗគ្នាក្នុងការគ្រប់គ្រងលុយរបស់ខ្លួន។ ប៉ុន្តែនៅតែមានរឿងមួយចំនួនដែលអ្នកអាចធ្វើឱ្យប្រសើរឡើងនូវការគ្រប់គ្រងលុយរបស់អ្នក និងកំហុសសាមញ្ញមួយចំនួនដែលត្រូវជៀសវាង។
អ្វីដែលអ្នកត្រូវធ្វើមុនគេនោះគឺ អ្នកត្រូវចាប់ផ្តើមពីឥឡូវនេះក្នុងការធ្វើឱ្យប្រសើរឡើងជាងមុននូវការគ្រប់គ្រងលុយ ហើយអាចចាប់ផ្តើមធ្វើឱ្យបានល្អជៀសវាងកំហុសសាមញ្ញមួយចំនួន ដែលអាចឱ្យបាត់បង់លុយ។ ថ្ងៃនេះ យើងសូមលើកឡើងកំហុសទូទៅចំនួន ៤ នៅពេលនិយាយពីការគ្រប់គ្រងលុយ។
១.ចំណាយលុយលើសខ្ទង់ ៖ ប្រសិនបើអ្នកមិនមានផែនការគ្រប់គ្រងលុយកាក់ ឬអ្នកចាយលុយគ្មានគោលដៅ នោះវាងាយស្រួលណាស់ក្នុងការចំណាយលើសខ្ទង់។ នោះហើយជាមូលហេតុសំខាន់ក្នុងការស្វែងយល់ថា តើអ្នកអាចចំណាយប្រាក់ប៉ុន្មានក្នុងមួយសប្តាហ៍ ពីរសប្តាហ៍ ឬមួយខែ? នៅពេលអ្នកដឹងថា អ្នកកំពុងស្ថិតក្នុងស្ថានភាពចំណាយលើសខ្ទង់ អ្នកគួរបែងចែកកញ្ចប់លុយសម្រាប់ការចំណាយជាប្រចាំ ដូចជាលើម្ហូបអាហារ ការញ៉ាំអាហារក្រៅផ្ទះ និងការកម្សាន្តជាដើម។ ការអនុវត្តតាមផែនការរបស់អ្នក មិនមែនមានន័យថា អ្នកកំពុងដាក់ទណ្ឌកម្មលើខ្លួនឯងនោះទេ ប៉ុន្តែមានន័យថា អ្នកកំពុងគ្រប់គ្រងការចំណាយក្នុងមធ្យោបាយរបស់អ្នកបានល្អប្រសើរ។
២. មិនមានផែនការសម្រាប់លុយរបស់អ្នក ៖ ពេលនិយាយពីគ្រប់គ្រងលុយ អ្នកត្រូវចំណាយពេលវេលាមួយចំនួនដើម្បីរៀបចំផែនការសម្រាប់រយៈពេលវែង។ បើមិនដូច្នេះទេ លុយនឹងត្រូវចាយវាយដោយគ្មានគោលដៅ និងបាត់បង់យ៉ាងឆាប់រហ័សដោយមិនដឹងខ្លួន។ ដូច្នេះ ជំហានដំបូង អ្នកត្រូវកំណត់គោលដៅមួយចំនួនសម្រាប់លុយរបស់អ្នក ដូចជាកំណត់ការចាយវាយប្រចាំថ្លៃ កញ្ចប់សន្សំ កញ្ចប់លុយសម្រាប់គ្រាអាសន្ន និងផែនការនៅពេលចូលនិវត្តន៍ជាដើម។ ការរស់នៅប្រចាំថ្ងៃទាមទារការចំណាយលុយជាប្រចាំ ហើយនាពេលខ្លះ ក៏ត្រូវការចំណាយច្រើនក្នុងគ្រាអាសន្នណាមួយ ដូចជាឈឺថ្កាត់ ឬគ្រោះថ្នាក់ណាមួយដែលយើងមិនអាចឃើញទុកមុនជាដើម។ និយាយជារួម មនុស្សម្នាក់ៗត្រូវមានផែនការសម្រាប់ការចំណាយរបស់ខ្លួន។
៣. មិនចេះសន្សំលុយ ៖ ជាធម្មតា អ្នកដែលទទួលបានប្រាក់តិចតែងរអ៊ូថា ខ្លួនមានប្រាក់ខែតិច ហើយថាតើសន្សំយ៉ាងម៉េច? ទោះតិចក្តី អ្នកគួរចាប់ផ្តើមសន្សំលុយតិចទៅច្រើន។ ឧទាហរណ៍ អ្នកទទួលបានប្រាក់ខែ ១ លានរៀល ដូច្នេះអាចនិយាយបានថា ក្នុងមួយសប្តាហ៍ អ្នកទទួលប្រាក់ ២៥ ម៉ឺនរៀល។ ជាយោបល់ អ្នកត្រូវកំណត់ខ្លួនឯងយ៉ាងណាឱ្យចំណាយ ២០ ម៉ឺនរៀល ហើយនៅសល់ ៥ ម៉ឺនរៀលសម្រាប់សន្សំ។ ការសន្សំអាចជួយអ្នកបានច្រើន ដូចជារបស់របរដែលចង់បាននៅពេលអ្នកឈឺ និងគ្រាអាសន្នណាមួយ ដែលទាមទារចំណាយលុយ។
៤. ខ្ចីលុយមកប្រើប្រាស់ដោយគ្មានគោលដៅ ៖ មនុស្សមួយចំនួនខ្ចីលុយដោយមិនមានគោលដៅ និងផែនការច្បាស់លាស់។ វាពិតជារឿងសំខាន់ក្នុងការស្វែងយល់ពីលុយដែលអ្នកខ្ចី ព្រោះលុយកម្ចីនេះគឺការប្រាក់ប្រចាំខែ។ ដូច្នេះហើយ បើអ្នកគ្មានគោលដៅ ឬផែនការច្បាស់លាស់ទេ អ្នកគួរកុំខ្ចីលុយប្រើប្រាស់អី។ មួយវិញទៀត នៅពេលអ្នកមានបំណងខ្ចីលុយ អ្នកត្រូវមានផែនការច្បាស់លាស់ ឱទាហរណ៍ខ្ចីលុយមកបើកអាជីវកម្មថ្មី និងពង្រីកអាជីវកម្មជាដើម ព្រោះធនាគារ និងគ្រឹះស្ថានមីក្រូហិរញ្ញវត្ថុរង់ចាំផ្តល់កម្ចីជានិច្ច នៅពេលអ្នកមានផែនការច្បាស់លាស់។ លើសពីនេះ ធនាគារ និងគ្រឹះស្ថានមីក្រូហិរញ្ញវត្ថុតែងតែចង់បានអតិថិជនល្អៗ ដើម្បីរីកចម្រើនទៅមុខទាំងគ្នាសម្រាប់សង្គម សេដ្ឋកិច្ចជាតិ៕
Account
Security
Favourite Content