សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
រតនគិរី ៖ ប្រជាពលរដ្ឋជនជាតិដើមភាគតិច នៅខេត្តរតនគិរី បានទទួលបណ្ណកម្មសិទ្ធិសម្គាល់ម្ចាស់អចលនវត្ថុសមូហភាពស្របច្បាប់ ក្រោយរង់ចាំអស់រយៈពេលជាច្រើនឆ្នាំ ក្រោមវត្តមាន ឯកឧត្តម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ អញ្ជើញជាអធិបតី និងចូលរួមផ្ដល់កិត្តិយសប្រគល់ជូនដោយផ្ទាល់នាព្រឹកថ្ងៃទី២១ ខែមករា ឆ្នាំ២០២៦ ស្ថិតនៅភូមិខ្មែង ឃុំប៉ូយ ស្រុកអូរជុំ ខេត្តរតនគិរី ។
នៅក្នុងពិធីប្រគល់វិញ្ញាបនបត្រសម្គាល់ម្ចាស់អចលនវត្ថុសមូហភាពជូនពលរដ្ឋជនជាតិដើមភាគតិចនៅស្រុកអូរជុំ ខេត្តរតនគិរី ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ការអញ្ជើញមកកាន់ខេត្តមណ្ឌលគិរីនាពេលនេះ គឺដើម្បីបញ្ចប់ភាពមន្ទិលសង្ស័យ និងផ្ដល់ភាពស្របច្បាប់លើការកាន់កាប់ដីធ្លីរបស់បងប្អូនប្រជាពលរដ្ឋជនជាតិដើមភាគតិច។
ឯកឧត្តមបានមានប្រសាសន៍ថា ទោះបីជាពលរដ្ឋបានទទួលបណ្ណកម្មសិទ្ធិសមូហភាពរួចរាល់ហើយក្ដី តែរាជរដ្ឋាភិបាលក៏ដូចជាឯកឧត្តមផ្ទាល់ មិនចោលបងប្អូននោះទេ គឺនៅតែបន្តគាំទ្របងប្អូន ដើម្បីរួមគ្នាអភិវឌ្ឍន៍សហគមន៍របស់បងប្អូនពលរដ្ឋជនជាតិដើមភាគតិចឱ្យកាន់តែរីកចម្រើន ដូចជា ការអភិវឌ្ឍន៍ហេដ្ឋារចនាសម្ព័ន្ធ ផ្លូវទឹក ភ្លើង និងផ្លូវថ្នល់បន្ថែមទៀត ។
ឯកឧត្តមបានបញ្ជាក់ថា ៖
«រាជរដ្ឋាភិបាលកម្ពុជាតាំងពីសម័យសម្ដេចតេជោនៅជានាយករដ្ឋមន្ត្រី បានផ្ដោតលើការយកចិត្តទុកដាក់អភិវឌ្ឍន៍តំបន់ភូមិភាគឦសាន ហើយមកដល់សម័យសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ក៏នៅតែជំរុញការអភិវឌ្ឍខេត្តភូមិភាគឦសានបន្ថែមទៀត ។ ជាមួយគ្នានេះ សម្រាប់ចក្ខុវិស័យរបស់ក្រសួងរៀបចំដែនដី គឺបញ្ចប់ការវាស់វែងដីធ្លី ចុះបញ្ជី ចេញបណ្ណ និងប្រគល់ជូនពលរដ្ឋឱ្យបានគ្រប់ៗគ្នា ដើម្បីបញ្ចប់ភាពចម្រូងចម្រាស់នៅក្នុងសហគមន៍»។
លោក បៀន សុគុន មេឃុំប៉ូយ ស្រុកអូរជុំ ខេត្តរតនគិរី បានឱ្យដឹងថា ក្នុងនាមជាអាជ្ញាធរក្នុងមូលដ្ឋាន ពិតជាមានក្ដីរំភើប សប្បាយរីករាយជាមួយនឹងពលរដ្ឋរបស់លោក ដែលទទួលបានបណ្ណកម្មសិទ្ធិសមូហភាពពីក្រសួងរៀបចំដែនដី នគរូបនីយកម្ម និងសំណង់ ក្រោយពួកគាត់រង់ចាំអស់រយៈពេលជាច្រើនឆ្នាំមកហើយ។
លោកបានបន្តថា កាលពីមុន ភាពចម្រូងចម្រាស ឬទំនាស់ព្រំដី តែងតែកើតមានជាហូរហែ ហើយអាជ្ញាធរក៏បានខិតខំសម្របសម្រួលបញ្ចប់ ប៉ុន្តែនៅពេលពួកគាត់ទទួលបានបណ្ណកម្មសិទ្ធិនេះរួចរាល់ ភាពចម្រូងចម្រាស់នឹងលែងកើតមានទៀតហើយ ដែលនឹងធ្វើឱ្យពលរដ្ឋក្នុងសហគមន៍រស់នៅកាន់តែសុខសាន្ត និងរួមសាមគ្គីគ្នា ៕
Account
Security
Favourite Content